ལྡི་ལིར་བོད་དོན་ལས་འགུལ།
ཟླ་འདིའི་ཚེས་༩ ཉིན་བོད་མི་ལས་འགུལ་བ་༣༢ ཙམ་རྒྱ་གར་གྱི་རྒྱལ་ས་ལྡི་ལིའི་རྒྱ་ནག་གཞུང་ཚབ་ཁང་དུ་རྒོད་མཆོང་བྱེད་ཐབས་བྱས་ཡོད་ནའང། རྒྱ་གར་སྐོ་སྲུང་བས་ལས་འགུལ་བ་རྣམས་འཇུ་བཟུང་བཀག་ཉར་བྱས་ཡོད་པ་རེད།
ཉིན་དེའི་ཆུ་ཚོད་༡༡ ཐོག་ལས་འགུལ་བ་རྣམས་རྒྱ་ནག་གཞུང་ཚབ་མདུན་ཐང་དུ་སླེབས་སྐབས། རྒྱ་གར་སྐོར་སྲུང་བས་བཀག་འགོག་བྱས་པར་བརྟེན། ལས་འགུལ་བ་ཁག་ཅིག་གིས་ལྕགས་ཐག་གིས་སོ་སོ་གློག་རྡུང་ལ་བཅིངས་ཡོད་པར་བརྟེན། སྐོར་སྲུང་བས་ལམ་སང་བཙན་ཁྲིད་བྱེད་ཐུབ་མེད་པ་དང། ཁོང་ཚོས་སྐབས་དེར་རྒྱ་ནག་གིས་བོད་བཙན་བཟུང་བྱས་ནས། ལོ་ངོ་ཧྲིལ་པོ་ལྔ་བཅུ་འཁོར་གྱི་ཡོད་པ་དང། རྒྱ་ནག་གཞུང་གིས་ད་དུང་བོད་ནང་དྲག་གནོན་མུ་མཐུད་བྱེད་བཞིན་ཡོད་པ་དེ་མཚམས་འཇོག་དགོས་སྐོར་བརྗོད་ཡོད་པ་རེད། ལས་འགུལ་དེ་བོད་ཀྱི་གཞོན་ནུ་ལྷན་ཚོགས་ཀྱིས་གོ་སྒྲིག་བྱས་པ་ཞིག་ཡིན་པ་དང། ལས་འགུལ་བ་ལོ་ན་ཆེ་ཤོས་༧༠ ཙམ་དང། གྲྭ་པ། མཐོ་རིམ་སློབ་མ་སོགས་ཡོད་འདུག།།

འབར་རྫས་ཀྱི་དོན་རྐྱེན་འོག་ནས་མི་མང་འདས་གྲོངས།

ཟླ་འདིའི་ཚེས་༡ ཉིན་བྷི་བྷི་སི་གསར་ཁང་ནས་གནས་ཚུལ་བ་ལྟར་ན། ཨི་རག་ཏུ་ཉེས་མེད་མི་མང་ཁྲོད་དུ་བུད་མེད་ཅིག་གིས་རང་སྲོག་བློས་གཏོང་གིས་ འབར་རྫས་གཏོར་ནས་མི་མང་༤༠ བསད་པ་དང་༡༠༦ རྨས་སྐྱོན་ཕོག་ཡོད་པ་རེད།

འཇོ་མདའ་རྫོང་གི་གྲྭ་པ་གསུམ་འཛིན་བཟུང།

ལོ་སྔོན་མའི་ཟླ་བ་༡༢ པ་དང། ཟླ་འདིའི་སྟོད་དུ་ཁམས་ཆབ་མདོ་ས་ཁུལ་འཇོ་མདའ་རྫོང་ཁོངས་ཀྱི་དགོན་པ་ཞིག་གི་ སྤྲུལ་སྐུ་བྱང་ཆུབ་དང། གྲྭ་སངས་རྒྱས་རྒྱ་མཚོ། གྲྭ་ཨ་བྷུ་མ་བཅས་སྔ་རྗེས་སུ་རྒྱ་གཞུང་གིས་འཛིན་བཟུང་བྱས་ཡོད་པ་རེད།