འཛུམ་གྱིས་བསུས་སྟངས་དང་ལྕེ་ལེ་ནར་སྟངས་འདིས་
མི་བསད་པ་ཐེངས་ཉུང་མིན།
ལྟ་གྲུབ་མ་འདུམ་རི་གྲོང་གཏམ་གྱིས་སྤུད།།
ལོ་རྒྱུས་འཆམ་པའི་གདོང་གཤིས་ལྷང་ལ་བུད།།
ལྐོག་གྱུར་ཇུས་ངན་འགྲིམ་པའི་དུར་སོ་ནས།།
གསུབ་མེད་ལག་རྗེས་ནག་པོས་གསལ་བཤད་མཐོང་།།
ཁ་བྱང་གི་གསལ་བཤད།
རྟོག་འགྱུ་འཁྲུལ་སྣང་ཐིམ་པའི་ཆེ་རློམ་གྱི་ང་རོས།།
བདེན་དོན་ཁྱུར་མིད་གཏོང་བའི་དམར་སྲོལ་གྱི་བྲན་ལུགས།།
ཞི་བདེའི་ཁོར་ཡུག་རྙོག་པའི་གླང་སྨྱོན་གྱི་གཏུམ་སྤྱོད།།
སེམས་ཀྱི་ལྷིང་འཇགས་དྭངས་མ་ཉེན་ཁ་ལ་གཏད་འདུག།
རྡོ་དང་དབྱུག་པས་ཀླན་ཀའི་ལམ་སྲོལ་དེ་འཆི་ཡང་།།
མནར་གཅོད་ཐག་པ་སྒྲིམ་མའི་ཁྲིམས་ལུགས་ཀྱི་གཤེར་མས།།
དྲང་བདེན་སེམས་ཀྱི་ཁྱེའུ་ཤི་རྨས་ལ་ཐུག་ཀྱང་།།
མུན་པའི་ཁོར་ཡུག་འདི་ནས་འགྲོ་ལམ་ཞིག་མ་ཚོར།།
འོད་ཀྱི་ཕ་སར་འཚོལ་བའི་ཁ་བྱང་ལ་འཁྱུད་དེ།།
ཞི་བདེའི་སེམས་ཀྱིས་བཞེངས་བའི་རྒྱལ་ཁ་ཞིག་མངོན་ཡང་།།
ཁ་དམག་མཚོན་གྱི་རྣོ་ངར་རང་རིགས་གཏད་པས།།
མེས་པོའི་བཀའ་ཆེམས་མདའ་མོ་དེ་ཚོ་ལ་ཕོག་འདུག།
འཕགས་ཡུལ་རིག་པའི་གྲོང་དེར་བག་ཕེབས་ཤིག་ཡོད་སྐད།།
དངོས་ཤུགས་ཚོར་བ་ལྕི་མོས་སྐྱུར་ཁ་དེ་གཟན་པས།།
སེམས་ཀྱི་དབྱངས་རྟ་ཉན་པའི་ངལ་གསོ་ལ་མོས་ཀྱང་།།
ད་ནི་དམར་པོའི་ཚལ་ཁ་རུས་རྐང་ལ་འཐིམ་འདུག།
ཞེ་འཁྲེང་སེམས་ཀྱི་རོལ་དབྱངས་མཐོ་སྒང་ནས་མཆེད་ཀྱང་།།
སྒོ་ལྔའི་དབང་བཀག་སྟེ་ཉན་མཁན་ཞིག་མ་བྱུང་།།
རྒྱ་གྲོང་རྣམ་ཤེས་འཁྱམས་པོས་མིག་བལྟས་ལ་གཟན་དུས།།
དྲང་བདེན་ཞལ་ལྕེ་ཟེར་བའི་ཚུགས་ཐུབ་ཅིག་མ་ཚོར།།
བང་ཆེན་དྲ་རྒྱའི་ཐོག་གི་ལྕོག་ཕུར་བའི་ཟིན་བྲིས་ལས་བཤུས།
