བྱང་ཨ་རིའི་སྐུ་ཚབ་དོན་གཅོད་བཀའ་ཟུར་བློ་བཟང་སྙན་གྲགས་མཆོག་ལ་ཁ་པར་བརྒྱུད་བཀའ་འདྲི་ཞུས་པ།

དྲི་བ། ཟླ་འདིའི་ཕྱི་ཚེས་༡༨ ཉིན་གོང་ས་མཆོག་དང་ཨ་རིའི་སྲིད་འཛིན་ཨོ་བྷ་མ་མཆོག་གཉིས་མཇལ་འཕྲད་གནང་བའི་སྐབས་དེར་སྐུ་ངོ་མཆོག་ལྷན་བཅར་ཞུས་ཡོད་སྟབས་དེའི་གནས་སྟངས་སྐོར་ངོ་སྤྲོད་གནང་རོགས།
ལན། ཡག་པོ་ཞེ་དྲག་བྱུང་སོང། གཙོ་བོ་༧གོང་ས་༧སྐྱབས་མགོན་ཆེན་པོ་མཆོག་ཨ་མི་རི་ཀར་ཆིབས་བསྒྱུར་གནང་བ་དེ། ཨ་རིའི་སྲིད་འཛིན་མཆོག་དང་མཇལ་འཕྲད་གནང་རྒྱུའི་ཆེད་དུ་རེད། ཝ་ཤིན་ཊན་ཌི་སི་རུ་ཡོད་པའི་ཕོ་བྲང་དཀར་པོ་རུ་ཨ་རི་སྲིད་འཛིན་མཆོག་དང་མཇལ་འཕྲད་གནང་བའི་སྐབས་༧གོང་ས་མཆོག་གིས་དོན་དག་གཙོ་བོ་གསུམ་ལྟ་བུ་ཞིག་གསུངས་སོང། གཅིག་དེ་འཛམ་བུ་གླིང་འདིའི་ནང་དུ་རྒྱལ་ཁབ་མང་ཆེ་བས་འཛམ་གླིང་སྤྱི་ཡོངས་ཀྱི་ཁེ་ཕན་དེ་ཟུར་དུ་བཞག་ནས། རྒྱལ་ཁབ་སོ་སོའི་ཁེ་ཕན་དེ་གལ་ཆེན་པོར་བརྩིས་ནས་འགྲོ་བ་མི་སྤྱི་ཡོངས་ཀྱི་ཁེ་ཕན་ལ་གནོན་སྐྱོན་གྱི་རང་བཞིན་ཞིག་ཆགས་བསྡད་ཡོད་དུས་དེ་ཚོའི་ཐོག་ལ་དགོངས་པ་བཞེས་དགོས་པའི་བཀའ་སློབ་ཅིག་གནང་སོང།

དྲི་བ། ཁྱེད་ཀྱི་དཔེ་དེབ་ཁག་ངོ་སྤྲོད་མདོར་བསྡུས་ཤིག་གནང་རོགས།
ལན། སྤྱིར་བཏང་དབྱིན་ཡིག་གི་ཐོག་ནས་སྙན་ངག་ཕྱོགས་བསྡུས་རེད། ༢༠༠༢ ལོར་<<བོད་ཀྱི་མེ་ཏོག་ཁོལ་མ་>>(Dandelions of Tibet) ཞེས་པའི་དེབ་ཅིག་བརྩམས་ཡོད། ༡༩༣༠ ལོ་ཡས་མས་ནས་བོད་པས་དབྱིན་ཡིག་ཐོག་བྲིས་པའི་སྙན་ངག་ཁག་ཕྱོགས་བསྡུས་བྱས་ཏེ། <<བཙན་བྱོལ་ནང་གི་མནོ་བསམ་>>(Muses in Exile) ཞེས་པའི་དེབ་ཅིག་བཏོན་ཡོད། ༢༠༠༦ ལོར་<<Conflicts of Duality>> ཞེས་པའི་དེབ་གཅིག་བརྩམས་ཡོད།