20:03:18
ཕན་བདེའི་ཟླ་བ་གངས་རིའི་རྩེ་ནས་འཚར༎
དཀར་གསལ་འོད་སྣང་འཛམ་གླིང་ཁྱོན་ལ་བརྡལ༎
བྱམས་བརྩེའི་དཀྱིལ་འཁོར་ནམ་མཁའི་དབྱིངས་ནས་རྫོགས༎
མུན་སེལ་འོད་ཐིགས་ནམ་ཡང་སིལ་གྱུར་ཅིག།
སྟོང་གསལ་སེམས་ཉིད་རིག་པའི་ཁྱེའུ་ལ༎
ཀུན་རྟོག་མངར་སྐྱུར་ངེས་མེད་བྲོ་བའི་རོ༎
སྟེར་མཁས་སྒོ་ལྔའི་སྤྲེ་འུའི་འགྲོ་འདུག་གིས༎
ངེས་མེད་འགྱུར་འགྲོས་རྩེན་པ་སུ་ཡིས་འགོག།
མ་དག་སྣང་བ་བརྩེགས་པའི་དགྲ་རྫོང་ཆེ༎
སྟོང་པ་རང་ངོ་འཕྲོད་པའི་ཐོ་ཆེན་གྱིས༎
བསྟོར་བཅོམ་སིལ་བུའི་ཀློང་དུ་མ་བརྫངས་པར༎
འོད་གསལ་ཉི་མའི་དཀྱིལ་འཁོར་སུ་ཡིས་བསུ༎
གཉུག་སེམས་ངོ་བོ་ག་འུ་ཁ་སྦྱོར་དབར༎
གཟུང་འཛིན་ན་བུན་དབྱིངས་སུ་མ་ཡལ་བར༎
སྣང་སྟོང་རེས་འཇོག་བྲལ་བའི་ཁང་བཟང་དུ༎
བདེ་སྟོང་ལྷན་སྐྱེས་དགའ་བཞི་སུ་ཡིས་མྱོང༌༎
འཁོར་འདས་རོ་གཅིག་འདྲེས་པའི་དབྱིངས་རུམ་ནས༎
སྲིད་ཞི་མཉམ་པར་གཟིགས་པའི་སྤྱན་ཞགས་ཀྱིས༎
ཀུན་རྟོག་བྲག་རི་ཐེར་ཟུག་མ་འབིགས་པར༎
སྒྲིབ་བྲལ་གཉུགས་མའི་ཐང་ཆེན་སུ་ཡིས་གཞལ༎
དབྱིངས་རིག་མི་ཕྱེད་སྟོང་གསལ་འདྲེས་པའི་ཀློང༎
སྤྲོས་བྲལ་སེམས་ཀྱི་གནས་ལུགས་གསལ་རིག་གིས༎
གཟུང་འཛིན་སྒྲིབ་གཡོག་དབྲལ་བ་མ་བྱས་པར༎
ཆོས་དབྱིངས་དགའ་མའི་ལང་ཚོར་སུ་ཡིས་སྤྱོད༎
གཟུང་འཛིན་ན་བུན་སེམས་ཀྱི་མཁའ་ལ་འཐིབས༎
སྣང་བ་བདེན་ཞེན་ཀུན་རྟོག་རུམ་ན་རྩེན༎
སྤྲོས་པའི་དྲ་བ་འཛིངས་པའི་ཅོང་རོང་ན༎
ཀུན་རྫོབ་སྟོང་པའི་རང་ངོ་སུ་ཡིས་འཕྲོད༎
སྤྲོས་པའི་ནགས་རྫོབ་འདི་ཡི་ཕ་རོལ་ན༎
སྟོང་སངས་སེམས་ཀྱི་རྒྱལ་མོའི་ཚུན་རོལ་ན༎
དབྱིངས་རིག་གཅིག་ཏུ་འདྲེས་པའི་རྟེན་འབྱུང་གི༎
ངོ་མཚར་སྒྱུ་མའི་སྤྲུལ་གཞི་སུ་ཡིས་བཤིགས༎
གཉུགས་སེམས་གཅིག་ཏུ་འཁྱིལ་བའི་མཚོ་མོ་ན༎
གློ་བུར་འཆར་སྒོ་བ་ཚྭའི་འདམས་ཀྱི་ཀློང༌༎
དགའ་སྐྱོ་ཁྲོ་ཆགས་རླབས་རིས་གཡོ་བའི་སྣེ༎
སྟོན་རླུང་འཚུབ་མའི་འགྱུར་འགྲོས་སུ་ཡིས་བཟློག།
2༽
ཀུན་བཏགས་རྨོངས་པའི་ཆུ་རིས་འཕྱོ་བའི་རླབས༎
ལྷན་སྐྱེས་མ་རིག་འཐུག་པའི་གཏིང་ཐག་རིང༌༎
མ་དག་བ་ཚྭས་སྙོགས་པ་འཁོར་བའི་གྲོང༌༎
འཇིགས་རུང་ཆུ་སྲིན་རྒྱུ་བའི་གཡུལ་ས་མང༌༎
གཟུགས་ཁམས་བཅུ་བདུན་གནམ་གྱི་མཐོངས་ན་རྩེན༎
འདོད་ལྷ་རིགས་དྲུག་ལྷུན་པོའི་ཁོར་ལག་འགྱིངས༎
གཟུགས་མེད་སྐྱེ་མཆེད་ཏིང་འཛིན་ཀློང་ན་འཁྱིལ༎
ལྷ་ཡི་འཇིག་རྟེན་མི་ཡི་ཡུལ་ལས་འགངས༎
དམྱལ་བ་ཡི་དྭགས་ས་འོག་འཇིག་རྟེན་གནས༎
ལྷ་མིན་འཇིག་རྟེན་གསེར་རིའི་གསེབ་ན་འཚང༌༎
མགོ་ནག་མི་ཡི་འཇིག་རྟེན་ཟླུམ་པོ་འདི༎
འཇིག་རྟེན་མི་ཡིས་སྐྱོང་བའི་ཞིང་ཁམས་ཉིད༎
ལྷ་དམག་འཁྲུགས་ནས་འཇིག་རྟེན་བསྟོར་ཡང་རུང༌༎
ཀླུ་གཉན་འཐབ་ནས་རྒྱ་མཚོ་འཕྱུར་ཡང་རུང༌༎
འཇིག་རྟེན་མི་ཡིས་བར་འདུམ་མི་ནུས་པས༎
ལྷ་མཆོད་འདྲེ་རྡུང་རྨོངས་པའི་ལྷག་བསམ་ཙམ༎
འཛམ་གླིང་ཤར་ནུབ་ཆུ་དང་རི་ཡིས་ཆོད༎
རྒྱ་བོད་ཧོར་གསུམ་སྲིད་པ་རྒན་པོས་འབྱེད༎
རང་བྱུང་ཁོར་ཡུག་རང་ངོས་མ་གྲུབ་ཀྱང༌༎
རང་རང་སོ་སོར་བདག་པའི་ཡིག་ཚང་མཆིས༎
རྩམ་ཟོན་བོད་མི་བོད་ཀྱི་ཡུལ་དུ་སྐྱིད༎
འབུ་ཟོན་རྒྱ་མི་རྒྱ་ཡི་ཡུལ་ན་བདེ༎
ཁྱིམ་མཚེས་ཁྲུན་ལོག་ཐེབས་པའི་གྲུ་ཟུར་ནས༎
ཆུ་ཁྲག་འོ་གསུམ་འདྲེས་པའི་རླབས་རིས་འཕྱུར༎
གོས་ཆེན་ན་བཟའ་གཟི་མདངས་གཞན་ལས་ཆེ༎
གསེར་གྱི་ཐམ་ཀའི་ཁ་རིས་ལྷག་པར་བཀྲ།
དྭ་ཡང་དཀར་པོའི་གྲུ་ཆར་འབབ་པའི་ཤུལ༎
སྤྲོ་སྐྱིད་མྱུ་གུ་འབུས་མིན་གཟིགས་མཛོད་དང༌༎
རྒྱབ་ནས་མེ་མདའི་སྐག་སྒྲ་མཛེར་པའི་ཁྲོད༎
མདུན་ནས་དྲག་པོའི་དམག་གི་བཀག་བསྐྱིལ་དབར༎
ཀླད་ནས་གནམ་གྲུའི་མདའ་རྫས་དབབ་པའི་འོག།
གཤིན་རྗེ་གྲོང་འདབས་དེད་པའི་སྐྱོ་གར་རིང༌༎
མ་ཡུལ་རྒྱབ་དུ་ལུས་པའི་བྱིས་པ་ཚོ༎
ཁྱིམ་མཚེས་ཨ་མའི་བྱམས་བརྩེའི་འཛུམ་འབག་འོག།
ཁ་ནས་མངར་མོའི་བུ་རམ་ལྡུད་པ་དང༌༎
མགོ་ནས་རྒྱུག་པ་བཞུས་པའི་སྣང་བརྙན་སྐྱོ༎
ཞོགས་པའི་ཉི་གཞོན་ནུབ་རིར་ལྷུང་བ་དང༌༎
ཟླ་གཞོན་ཤར་མཐར་མཛེགས་པ་ཉུང་ཉུང་མིན༎
ལོ་ཟླའི་ཕྲེང་བ་དུས་ཀྱིས་བགྲངས་པའི་སྣེ༎
དུས་རབས་ཕྱེད་ཀ་མི་རྟག་སྲིན་མོས་ཟོས༎
3༽
ལ་ཁའི་དར་ལྕོག་རླུང་གིས་བདས་ནས་ཟད༎
ལུང་མདོའི་མཚེའུ་དུས་ཀྱི་ཐན་པས་བསྐམས༎
མེས་པོའི་ཟུངས་ཁྲག་ས་ལ་ཐིམ་པའི་ཤུལ༎
ཝ་མོའི་ངུར་རྒྱངས་འཛེར་བས་ལྷིང་འཇགས་འཕྲོགས༎
གནམ་སྔོན་དགུང་ལ་འདེབས་པ་བྲག་རིའི་རྩེ༎
སྤྲིན་ཀྱི་ལ་ཐོད་དཀྲིས་པའི་གཡས་གཡོན་ནས༎
ཉི་ཟླའི་རྣ་ཆ་འོད་ཀྱིས་འཚེར་ན་ཡང༌༎
ཐང་དཀར་རྒོད་པོ་སྔ་ས་ཉིད་ནས་འཕུར༎
བསམ་འཕེལ་ནོར་བུ་རྒྱ་མཚོའི་གཏིང་ན་གནས༎
དགུན་འཁྱགས་ལྷག་པའི་དར་ཁ་སྔ་ནས་སྒྲིག།
དེད་དཔོན་མཁས་པའི་གཡོ་གྲུ་སྐུལ་ན་ཡང༌༎
མཚོ་འགྲིམས་ཚོང་པའི་རེ་བ་རྨི་ལམ་ཙམ༎
སྤྲིན་དང་ན་བུན་བར་སྣང་དབྱིངས་ནས་ཡལ༎
ཉི་ཟེར་སབ་སིབ་གནམ་གྱི་མཐོངས་ནས་འབབ༎
སྣ་ལྔའི་འཇའ་རིས་འཁྱིལ་བའི་གུར་ཁང་ནང༌༎
རང་སྣང་དག་པའི་སྣང་བ་དགུང་ལ་འཆར༎
ཉི་མ་དམར་པོའི་འོད་སྣང་ཤར་ནས་མཆེད༎
རི་རྩེའི་ཁ་བ་ཀླུང་གི་གཞུང་དུ་འཇོ༎
གྲུ་འཛིན་ཕོ་བྲང་ཐལ་འཚུབ་གསེབ་ཏུ་འཚང༌༎
ཡར་ཀླུང་གཙང་པོའི་རླབས་རྒྱུན་ཁྲག་དང་འགྲོགས༎
རླུང་འཚུབ་བསྣོལ་མ་འཐབ་པའི་མཚོ་དཀྱིལ་དུ༎
རླབས་ཀྱི་བང་རིམ་འཁྲུག་པོའི་རྔམས་ཁ་ནས༎
དགའ་ལྡན་ཕོ་བྲང་སྲིད་ཀྱི་གྲུ་བོ་ཆེ༎
དར་ཆེན་ཁ་ཕྱོགས་གང་དུ་བསྒྱུར་ན་འཚམས༎
ས་བྱི་ཞི་རྒོལ་ཁ་བ་ཇི་བཞིན་འབབ༎
དྲག་པོའི་གནོན་ཤུགས་མེ་ལྕེ་བཞིན་དུ་འབར༎
དམར་པོའི་རླུང་རླབས་ད་དུང་ཇེ་ཆེ་རེད༎
བྱི་བའི་ཆག་སྒོ་སྣེ་མོ་གླང་ལ་ཐུག།
སྟོང་གསལ་རིག་པའི་ཁྱེའུ་གྲུང་ཤ་ཅན༎
བདེན་གཉིས་རོ་གཅིག་མྱོང་པའི་སྔ་རོལ་དུ༎
རྒྱུ་འབྲས་རྟེན་འབྱུང་རིག་པའི་འཕུལ་མཚམས་ནས༎
ཡང་དག་འཇིག་རྟེན་ལུགས་ལའང་བརྟག་པར་རིགས༎
གཅིན་སྐྱག་མགོ་ལ་གཏོང་པའི་བརྙས་བཅོས་དང༌༎
ཤ་རུས་སིལ་བུར་གཏོར་བའི་གནར་གཅོད་འོག།
ལོ་ཟླའི་ཕྲེང་བ་བགྲང་པའི་གཞིས་ལུས་བོད༎
སྐྱོབ་པའི་ལམ་སྟོན་ཡོད་ན་དུས་ལ་བབས༎
བཀའ་སྤྱི་ལྷན་དགྱེས་འཛོམས་པའི་སྡིངས་ཆ་ཐོག༎
དབང་ཆེན་དཔོན་པོ་ཚོགས་པའི་གྲོས་རྭ་ནང༌༎
སེམས་ཀྱི་རང་མདངས་འཕོས་པའི་ཚིག་རིས་འདི༎
དྲན་པའི་སྐུལ་འདེབས་འགྱུར་བའི་རེ་སྨོན་ཉིད༎
2008/3/21/ཉིན་བྲིས།
 |
|