11:36:42
ཀ་རྩོམ་ཚིགས་བཅད་གཅིག་ཙམ་མི་ཤེས༎
ཁ་ནས་གཞན་ལ་རྫིག་རྫིག་བཤད་མཁན༎
ག་དུས་ཡིན་ན་སྦོ་ཤོབ་ཚ་བའི༎
ང་ཚོའི་དྲ་གྲོགས་འདི་ཚོ་ཤ་ཚ༎
ཅ་ཅོ་བཤད་ལ་དགའ་བ་ཙམ་ལས༎
ཆ་རྒྱུས་ཡོད་པའི་གནས་ལུགས་མི་ཤེས༎
ཇ་དང་ཁ་ལག་རག་ཙམ་བྱུང་དུས༎
ཉ་བ་བཞིན་དུ་དགའ་ཐག་ཆོད་འགྲོ༎
ཏ་རེ་མི་ཆེན་གྲས་མ་མི་ཚུད༎
ཐ་ཤལ་སྐྱེ་བོའི་གྲལ་གསེབ་འཚང་ནས༎
ད་དུང་གཞན་སྐྱོན་འཚོལ་ཁུལ་བྱེད་པ༎
ན་གཞོན་འདི་ཚོ་ངོ་མ་ཤ་ཚ༎
པ་ལོ་བསགས་ནས་གྲྭ་ལོག་ཆགས་རྗེས༎
ཕ་རྒན་ཚོ་དང་མཉམ་དུ་འཛོམས་ནས༎
བ་གླང་ཉོ་ཚོང་ཙམ་རེ་འཇོན་པའི༎
མ་རབས་འདི་ཚོ་ངོ་མ་ཤ་ཚ༎
ཙ་གི་ཙི་གི་འཚོང་འདྲ་བཤད་ནས༎
ཚ་གི་ཚི་གི་གཡམ་རྒྱུག་བྱེད་བཞིན༎
ཛ་རེ་ཛོ་རེ་མི་ཚེ་སྐྱེལ་བའི༎
ཝ་མོ་འདི་ཚོ་ངོ་མ་ཤ་ཚ༎
ཞ་ལྟར་འཁྱོགས་པའི་ཕྱོགས་རེས་ཆེ་བ༎
ཟ་འདྲེ་ཇི་བཞིན་གཞན་ལ་གནོད་པ༎
འ་རེ་འི་རེ་བཀྲུགས་ཤིང་རྒྱག་མཁན༎
ཡ་མེད་འདི་ཚོ་ངོ་མ་ཤ་ཚ༎
ར་དང་ལུག་བཞིན་མགོ་བོ་རྨོངས་ཀྱང༌༎
ལ་ལའི་མདུན་སར་མཁས་པར་བརྫུས་ཏེ༎
ཤ་རུས་གཅིག་པའི་ནང་ཁུལ་བཀྲུགས་མཁན༎
ས་མཐའི་ཁྱི་རྒན་འདི་ཚོ་ཤ་ཚ༎
ཧ་རེ་ཧོ་རེ་རྩེད་མོའི་ཟོལ་གྱིས༎
ཨ་མ་ཨོ་ལོ་བདེན་གཏམ་རེ་གཉིས༎
ཀ་ཕྲེང་སྒྲིག་པའི་ཕལ་རྩོམ་ནང་དུ༎
ཁ་སྐད་གོ་བདེའི་ཚིག་འགར་ཤོར་སོང༌༎
ལྡི་ལི་མ་ཇུག་ཊིག་ལ་པོ་ཏ་ལ་མགྲོན་ཁང་དུ་བྲིས། གྲོགས་པོ་ཚོ་དུས་ཚོད་འདྲ་ཡོད་ན་མུ་མཐུད་རོགས།
 |
|