The Tibet Express

སྙན་པོ་ཆགས་སོང་བསམ་པ་གང་ཡང་མེད༎
ཀ་རྩོམ་འབྲི་རྒྱུའི་དཔེ་ཙམ་བཀོད་པ་ཡིན༎
ཁ་ལྕེ་སྐམ་པོས་མི་ཚེ་མི་སྐྱེལ་བར༎
རིག་པ་དཔེ་ཐོག་འགོད་ལ་ཕན་པར་ཤོག།
དྲ་གྲོགས་ཚོ། མུ་མཐུད་རོགས་གྱིས།

 

ཀ་རྩོམ་བྲིས་ནས་བྲོད་ཁོག་མི་འགྲང་ཡང་།།
ཁ་བསྟོད་ཙམ་གྱི་མིང་གི་ཐ་སྙད་ལ།།
ག་ལེར་འཇུག་པའི་གཡོ་སྒྱུ་ཡིན་ལས་ཆེ།།
ང་དྲག་བསམ་ནས་བྲིས་པ་མིན་ནམ་ཅི།།

 

ཀ་ཁ་ག་ང་བོད་ཀྱི་སྐད་ཡིག་རེད།།
ཁ་བ་གངས་ཅན་བོད་ཀྱི་ཕ་ས་རེད།།
ག་པར་སོང་ཡང་སེམས་ནས་མ་བརྗེད་དང།།
ང་ཡི་དྲ་གྲོགས་བོད་རིགས་སྤུན་ཟླ་ཚོ།།

 

མེག་སི་ཁོའི་གླང་རྫི་ཚོའི་ཞྭ་མོ་འདྲ་བ་ཞིག་གྱོན་ནས་ད་དུང་ཅིག་ཅིག་ཅིག་སེམས་ནས་མ་བརྗེད་ཅེས་ཟེར་ཁུལ་བྱེད་ཀྱིན་འདུག

 

ཀ་ཁ་ག་ང་བོད་ཀྱི་ཕུང་འདྲེ་ཡིན།།
ཁ་བ་གངས་ཅན་བོད་ཀྱིས་གནའ་ནས་དོར།།
གར་སོང་ས་ན་ཁྱོད་ལ་དོ་སྣང་མེད།།
སྙིང་ན་ཡོད་པ་ཕྱི་གླིང་རིག་པའི་གཞུང་།།

 

ཅ་ལག་མང་པོ་མེད་ཀྱང་ཆོག་ལེ་རེད༎
ཆ་རྒྱུས་ཆེན་པོ་མེད་ཀྱང་འགྲིགས་ལེ་རེད༎
ཇ་ཆང་དངུལ་དངོས་དཔལ་འབྱོར་ལོངས་སྤྱོད་ཆེད༎
ཉ་རྗེས་རྒྱ་བཞིན་མ་རྒྱུག་དྲ་གྲོགས་ཚོ༎
(མུ་མཐུད་རོགས།)

 

ཏཱ་ཐ་གཱ་ཏའི་སྐྱེས་ཆེན་ཀུན་ལ་སྨོད༎
ཐ་སྙད་གཙུག་ལག་མཁས་པ་ཀུན་ལ་སྡང༌༎
ད་དུང་དྲང་ཚུགས་ཡིན་མདོག་བྱེད་མཁན་གྱི༎
ན་གཞོན་གྲྭ་ལོག་དེ་ཚོར་དོགས་ཟོན་གྱིས༎
ད་ཁྱོད་ཚོས་བྲིས་ཨ།

 

བེ་རི་བ་འདི་དངོས་གནས་ནར་སོན་རྒྱུ་མེད་པ་འདྲ། སྤྱིར་བཏང་མི་སུ་ཡིན་ཡང་ལོ་ན་སོན་རིམ་བཞིན་མཐོང་ཐོས་ཀྱི་རྒྱ་ཇེ་ཆེར་གྱུར་ནས་ལྟ་གྲུབ་ཀྱི་འཁོར་ཕྱོགས་ལ་ཡང་འགྱུར་བ་ཆེན་པོ་འགྲོ་བཞིན་ཡོད་མོད་བེ་རི་བ་འདི་ད་དུང་ཡང་སྔོན་མ་བཞིན་ཀ་རྩོམ་ཀྱག་ཀྱོག་རེ་ཨེ་འཁྱོང་བལྟ་བ་ཙམ་ལས་གང་ཡང་མི་འདུག

 

དྲ་གྲོགས་ལགས་ཁྱེད་ཀྱི་མིག་ལ་ག་དུས་ཡང་ཀྱག་ཀྱོག་རེ་མ་གཏོགས་མཐོང་རྒྱུ་མེད་པ་ནི་རང་གི་དབང་པོ་ནར་སོན་པ་བརྒྱུད་བེད་སྤྱོད་མེད་པ་ཆགས་པའི་རྟགས་མཚན་རེད། བེ་རིའི་ཀ་རྩོམ་གྱི་ནང་དོན་ཟབ་ཅིང་བརླིང་པ་དང་། གནད་ཐོག་དོན་འཁྱོལ་ཡོད་པ། རྣམ་དཔྱོད་ཡོད་མཁན་ཞིག་ཡིན་ན་ཏག་ཏག་ཤེས་ཀྱི་རེད། འདི་ནི་ཟུར་ཟའི་རི་མོ་མིན་ལ་གཡས་ཀྱོག་གཡོན་ཀྱོག་དེ་བས་ཀྱང་མིན། ཡིད་མ་ཆེས་ན་གཟབ་གཟབ་གྱིས་ཀློག་དང་།

 

པ་ཊ་བཞིན་དུ་སེམས་པ་བཀྱོགས༎
པ་རྒན་ལས་ཀྱང་སྤྱོིད་པ་ངན༎
བ་ལང་ལྟ་བུའི་རྨོངས་འཐོམ་པ༎
མ་རབས་དུད་ངན་མཱ་ར་ཡ༎
ངའི་སྐལ་བ་དེ་ཡིན། ད་ཁྱོད་ཚོས་བྲིས་ཨ།

 

ཝར་ཎའི་ཕྱེ་ལེབ་དཀར་པོ།

ར་མདའ།
——–
ཀ་མ་ལ་ཡི་མེ་ཏོག་བཞད་འདྲའི།།
ཁ་འབྲས་མཚར་བའི་བུ་མོ་ཆུང་ཆུང་།།
ག་ནས་འོང་མིན་ཆ་རྒྱུས་མེད་ཀྱང་།།
ང་ཡི་སེམས་པ་ཁྱོད་ལ་ཤོར་སོང་།།

ཅ་ཅོ་བྲལ་པའི་སྐད་ངག་ཁུ་བྱུག།
ཆ་བྱད་མཛེས་པའི་ཞལ་རས་ཟླ་བ།།
ཇ་ཡུན་ཙམ་ཡང་ཁྱེད་ཀྱི་རུམ་ལ།།
ཉ་མོ་བཞིན་དུ་འཁྱུག་ན་འདོད་ཀི།

ཏ་ལའི་ལོ་མའི་གྲིབ་བསིལ་འོག་ཏུ།།
ཐ་མག་བཞིན་དུ་ཁྱོད་ཀྱི་མཆུ་སྒྲོས།།
ད་ལྟ་བརྔུབས་ནས་འདུག་རྒྱུ་བྱུང་ན།།
ན་རག་དམྱལ་བར་ལྷུང་ཡང་མི་འགྱོད།།

པ་ལོ་བཅད་ནས་གྲྭ་པ་བྱས་ཀྱང་།།
ཕ་བཟང་བུ་མོ་ཁྱོད་ལ་ཐུག་དུས།།
བ་གམ་ཅན་གྱི་ཉལ་ཁང་ནང་ནས།།
མ་བསྒོམས་ཁྱོད་ཞལ་མིག་ལ་འཁོར་བྱུང་།།

ཙ་རིའི་འཕྲང་ལམ་རྡོག་པས་མནན་ནས།།
ཚ་བ་ཆེ་བའི་རྒྱ་གར་སླེབས་དུས།།
ཛ་ཡས་ཆོས་འཁོར་བསྐོར་བའི་གནས་མཆོག།
ཝ་ར་ཎ་སིར་ཁྱོད་ལ་མཇལ་བྱུང་།།

ཞ་སྙུག་བྲིས་འདྲའི་ཟུར་མིག་འཁྱོག་པོས།།
ཟ་འཕྲུག་ཚོར་བ་སེམས་ལ་སྤྲད་སོང་།།
འ་ཅག་བར་ན་ལས་དབང་ཡོད་ན།།
ཡ་གིའི་ལྷ་ཡིས་བཀག་ཀྱང་མི་ཁོག།

ར་ཚང་ཕག་ཚང་ཉལ་ས་བྱས་ནས།།
ལ་ཕུག་ལོ་མ་ཟ་དགོས་བྱུང་ཡང་།།
ཤ་ཁྲག་ལུས་སེམས་འདྲེས་རྒྱུ་བྱུང་ན།།
ས་མཐའི་འཚོ་བར་སྐྱོ་སྣང་མི་འདུག།

ཧ་ལོ་ཟེར་ནས་ཁ་པར་གཏོང་ཚུལ།།
ཧ་ཅང་སེམས་ལ་འབབ་ནི་ཞིག་རེད།།
ཨ་མྲ་སྨིན་འདྲའི་མཆུ་འདབ་ཞིམ་པོ།།
ཨ་ཁུ་ང་ཡིས་འཇིབ་ན་འདོད་ཀི།

ཨ་ཏི་ཤ་ཡི་ཚོགས་ཁང་འཁྲིས་ནས།།
ཧ་ཅང་མཛེས་པའི་རི་དྭགས་མིག་ཅན།།
ཨ་རེ་སྐྱིད་ཀི་ཁྱོད་དང་མཇལ་བས།།
ཧ་ལམ་སྣང་བ་ལྷ་ཡུལ་ཁམས་རེད།།

ས་སྟེང་འདི་ན་ཁྱོད་ཀྱི་ཆེད་དུ།།
ཤ་རུས་སོ་སོར་མ་ཐོར་བར་དུ།།
ལ་ལུང་འགྲིམས་ནས་འཚོ་དགོས་བྱུང་ཡང་།།
ར་མདའི་སེམས་ལ་དཀའ་སྣང་མི་འདུག།

ཡ་ཁོག་སེམས་འདི་ཁྱོད་ལ་དགའ་བ།།
འ་ན་མ་ན་ཡིག་ཐོག་ཕབ་པས།།
ཟྭ་ལོ་ལྟ་བུའི་མི་ཁའི་ཚེར་ནང་།།
ཞ་བོ་བཞིན་དུ་ལྷུང་ཡང་མི་འགྱོད།།

ཝ་ལེར་སེམས་ཀྱི་མིག་གི་ལྟ་ས།།
ཛ་ཏིའི་དྲི་ཞིམ་བྲོ་བའི་བུ་མོ།།
ཚ་བའི་ནང་ནས་དྲན་པའི་གདུང་བ།།
ཙ་ར་བཅད་ལས་ལྡབ་ལོག་ཆེ་ཀི།

མ་བསམས་ལས་ཀྱིས་ཁྱོད་དང་ཕྲད་ཉིན།།
བ་སྤུའི་རྩེ་མོ་གྱེན་དུ་ཕྱོགས་ཐལ།།
ཕ་རྒན་ང་ཡི་བྱ་སྤྱོད་འདི་འདྲ།།
པ་ཕས་མཐོང་ན་སེམས་པ་ལོས་སྐྱོ།།

ན་ནིང་འུ་གཉིས་ཐུག་མྱོང་མེད་ཀྱང་།།
ད་ལོ་ལས་ཀྱིས་འདི་ནས་ཐུག་སོང་།།
ཐ་དད་སེམས་གཉིས་གཅིག་ཏུ་འདྲེས་པའི།།
ཏྰ་རེ་ལྷ་མོས་མགོན་སྐྱབས་གནང་རོགས།

ཉ་བཞིན་ཁྱོད་ཀྱི་ལང་ཚོའི་རྫིང་བུར།།
ཇ་ཡུན་ཙམ་ཡང་འབྲལ་དགོས་མེད་ན།།
ཆ་རྒྱུས་མེད་པའི་ས་མཐའི་ཡུལ་ན།།
ཅ་ལག་མེད་ཀྱང་སྐྱོ་སྣང་མི་འདུག།

ང་རང་དགའ་བའི་ཕྱེ་ལེབ་དཀར་པོ།།
ག་ལེར་ང་ཡི་སེམས་ལ་འཕུར་ཤོག།
ཁ་བཏགས་ལྟ་བུའི་ལྷད་མེད་བརྩེ་བ།།
ཀ་ར་བཞིན་དུ་མཉམ་ཟ་བྱེད་ཆོག།

དགེ་རབ་ཀྱིས་སྤྱི་ལོ་ ༢༠༠༩ ཟླ་ ༢ ཚེས་ ༢༣ ལ་ སྙན་ངག་​གི་གྲས་སུ་བཀོད། |

རྗེས་འདེད། URI | མཆན་བུ། RSS
ཝར་ཎའི་ཕྱེ་ལེབ་དཀར་པོ་ཞེས་པའི་སྐོར་ལ་མཆན་ ༤ བཀོད་འདུག

1. ༡༽ རིག་འབྱུང་དོན་གྲུབ་བཀྲ་ཤིས་ནས།
སྤྱི་ལོ་ ༢༠༠༩ ཟླ་ ༢ ཚེས་ ༢༣ གི་ཆུ་ཚོད་ ༢༠ སྐར་མ་ ༤༢

ཨ་ རོ། ཡང་ཁྱོས་བྐླག་བྱའི་དེབ་མ་བྐླགས། དགོས་རྒྱུའི་སློབ་སྦྱོང་མ་བྱས། མགོ་ཞི་མོ་ལ་འཁོར་ནས་བསྡད། གཟབ་གཟབ་བྱོས་མ་གཏོགས་ཡང་ཐང་ལ་བརྒྱབ་ཡོང་།
ཨ་ལ་། ཀུ་རེ་ཡིན།
2. ༢༽ ཀླུ་སྨྱོན་ནས།
སྤྱི་ལོ་ ༢༠༠༩ ཟླ་ ༢ ཚེས་ ༢༣ གི་ཆུ་ཚོད་ ༢༡ སྐར་མ་ ༡༢

ལོ་ མང་སྔོན་ང་ཡང་འབྲུག་པའི་ན་ཆུང་མ་ཞིག་གི་བསླུ་བྲིད་ཀྱིས་གསང་སྔགས་ལུགས་ལ་ དངོས་གྲུབ་དང་སོ་ཐར་ལུགས་ལ་ལྟུང་བ་གཉིས་ཀྱི་འདྲེས་མཚམས་ཤིག་ཏུ་བསྐྱལ་མྱོང་། དེར་ཕྱིར་དྲན་ཞིག་བྱས་ན་འདི་ལྟ་སྟེ།
ཀ་ཤི་མཛེས་དགའི་སྐྱེས་ཡུལ་རྒྱ་གར་དུ། །
ཁ་བའི་ཡུལ་ནས་འཁྱར་བའི་ལྡོམ་པོ་ང་། །
ག་ལེར་རྒྱལ་པོའི་ཁབ་ཏུ་བསྐྱོད་པའི་རིང་། །
ང་ཡི་མི་ཚེར་མི་བརྗེད་འབྲུག་མོར་འཕྲད། །
ཅ་ལ་ནག་པོའི་དབུ་སྐྲའི་རྦབ་ཆུ་དང་། །
ཆ་ཤས་ཡོངས་རྫོགས་ཟླ་བའི་ཞལ་རས་མཛེས། །
ཇ་ཡུན་ཙམ་ལ་མིག་གི་བདུད་རྩི་རུ། །
ཉ་མོ་ལྕགས་ཀྱུར་འཁོན་ལྟར་དེ་རིང་སྨིན། །
ཏ་ལའི་འདབ་འདྲའི་འབྲུག་པའི་ཕྱུ་པའི་འོག །
ཐ་མལ་མ་ཡིན་ལྷ་ཡི་ན་ཆུང་གཟུགས། །
ད་ལྟ་སྒེག་པའི་ཉམས་ཀྱིས་རྒྱུ་བ་འདི། །
ན་མེད་མིག་གིས་མཇལ་འདི་སྐལ་བ་སྦོམ། །
པ་ལགས་མ་ལགས་བསྐྱུར་ནས་ས་མཐའ་འགྲིམ། །
ཕ་མིང་མ་མིང་མི་ཤེས་ཁྱོད་དང་འཕྲད། །
བ་ལང་ལྟ་བུའི་གྲྭ་གཟུགས་བདག་འདྲ་བའི། །
མ་དག་འཁོར་བར་འཁྱམ་པའི་སྐྱོ་གྲོགས་ཞུ། །
ཙ་རི་བསྐོར་ཀྱང་ཁྱོད་འདྲ་མ་མཐོང་ལ། །
ཚ་བའི་ཡུལ་འདིར་ཁྱོད་འདྲར་མ་ཐུག་པས། །
ཛ་དྲག་བརྩེ་དུང་ཡིན་མིན་མི་ཤེས་ཀྱང་། །
ཝ་རྒན་ང་ནི་ཁྱོད་ཀྱི་རྙི་ལ་ཐེབས། །
ཞྭ་སེར་གྲྭ་སའི་སློབ་གཉེར་བརྗེད་ནས་ཐལ། །
ཟ་འཐུང་འཁོར་བའི་འདུག་ཆུས་སྒྲུབ་ཏུ་ཆུགས། །
འ་འུར་མེད་པའི་གནས་སྐོར་ལམ་ཁ་འདིར། །
ཡ་མཚན་འབྲུག་པའི་ན་ཆུང་ཁྱོད་ལ་འཕྲད། །
ར་ཕོའི་འདོད་ཆགས་སྒྱེ་མོ་རྒྱབ་ཏུ་ཁུར། །
ལ་ལུང་འགྲིམ་སྟེ་གནས་སྐོར་ངལ་བས་དུབ། །
ཤ་ཁྲག་མི་ལུས་ཤིག་ལ་ཁྱོད་ལྟ་བུ། །
ས་མཐའ་སྐོར་མཁན་ང་ཡིས་མཐོང་མ་མྱོང་། །
ཧ་ཅང་སྐྱེ་གཟུགས་མཛེས་པའི་འབྲུག་མོ་ཞིག །
ཨ་མདོའི་གྲྭ་གཟུགས་བདག་གིས་མཐོང་བའི་ཚུལ། །
ཨ་ལི་ཀྰ་ལིའི་གདངས་སུ་སྤེལ་བ་འདིར། །
ཧ་ལས་མ་བྱེད་འཁོར་བའི་གཤིས་ཀ་ལགས། །
ཀ་རྩོམ་འདོ་ཚོ་ཁ་བརྡ་ནས་བཏོན་པ་ཡིན། ག་འདྲ་ཡག་པོ་བྲིས་འདུག ང་འབྲི་ཤེས་མཁན་ཞིག་མིན་ཡང་ཀློག་ཤེས་མཁན་ཞིག་ཡིན། འདི་དཔེ་ལྟ་སའི་ཆེད་དུ་ཡིན། བརྗོད་བྱ་ག་རེ་ཡིན་ན་ཡང་ཡིན། ཚིག་སྦྱོར་གོ་བདེ་བ། སྡེ་སྦྱོར་ཆ་སྒྲིག་པ་འདི་འདྲ་ཞིག་འདུག དཔེ་ལྟ་ནས་འབྲི་རོགས་གྱིས། བེ་རི་ལ་ལས་ཀ་མང་པོ་ཡོད་པ་ཤེས་ཀྱི་ཡོད། ཡིན་ནའང་རྩོམ་འབྲིའི་དོ་སྣང་འདི་འདྲ་གནང་དུས་ང་ཚོས་ཁ་མིག་ཡར་ལྟ་བྱེད་དགོས།

 

ཙ་ཡིག་བྲིས་པའི་ཀ་རྩོམ་མ་རྙེད་ནས༎
ཚ་མེད་ཇ་བཞིན་བདུན་ཕྲག་གཅིག་ལ་ལུས༎
ཛ་དྲག་མིན་ཡང་གལ་ཆེན་ཉིད་མཐོང་ནས༎
ཝ་བཞིན་མ་བྲོས་རྩོམ་འཕྲི་སྐྱོང་རོགས་གྱིས༎
གྲོགས་པོ་ཚོ། མུ་མཐུད་རོགས།