22:37:23
ཤྰཀྱའི་རྒྱལ་པོས་གཏན་ལ་མ་ཕབས་ཤིང་།།
སྔོན་བྱོན་མཁས་གྲུབ་དང་དུ་མ་བླངས་བ།།
དགེ་སློང་ཕ་མ་རྩོད་པའི་གླེང་རྙོགས་འདི།།
དུས་མཐའི་བཙུན་པའི་བར་ན་རྩོད་པའི་རྒྱུ།།
སྤྱན་རས་གཟིགས་ཀྱི་དགོངས་པར་མི་མངའ་ཞིང་།།
སྔོན་བྱོན་དཔའ་བོས་ཕྱོགས་སུ་མ་འཛིན་ཀྱང་།།
རྩྭ་ཟ་རྩོད་ལན་བྱེད་པའི་རྙོག་འཛིང་འདི།།
དེང་དུས་ཕུ་ནུ་དཀྲུག་པའི་གཞི་མ་གཅིག།
བྷོ་ཊའི་ལྗོངས་འདི་རང་ལ་མི་དབང་ཞིང་།།
དབང་བའི་སླད་དུ་འབད་པ་མི་ནུས་ཀྱང་།།
སྡེ་དགོན་ལོ་རྒྱུས་ཞེན་གྱིས་བྲིས་པ་འདི།།
མི་རབས་ཕྱི་མར་བཞག་པའི་ལོ་དུག་གཅིག།
བློ་དང་ཐབས་ཀྱིས་མདུན་ལམ་མི་སྟོན་ཞིང་།།
མཛའ་མཐུན་བཀའ་སློབ་སྙིང་ནས་མི་སྨྲ་བ།།
རྟ་གྲི་མདུང་གིས་རང་ཉིད་རྒྱལ་བའི་གཏམ།།
བཤད་པའི་རྒན་པོ་དེང་གི་སློབ་སྟོན་ཞིག།
ཟབ་དང་རྒྱ་ཆེན་དོན་ནི་མི་ལྡན་ཞིང་།།
སྙན་པོའི་ཚིག་གི་རྡེབ་སྦྱོར་མི་རྫོགས་པ།།
དོན་ཆུང་ཚིག་མང་སྤྱད་པའི་རྩོམ་འབྲི་ལ།།
དགའ་བའི་སྐྱོན་འདི་བདག་གི་གཤིས་ཀ་ཞིག།
 |
|