11:17:29
དེང་སྐབས་ཁམས་རྟའུ་རྫོང་། “སྤང་ནང་”ཅེས་པའི་ས་ཁུལ་གྱི་དབེན་གནས་ཤིག་ཏུ་ཡུལ་སྐད་དུ་ཀའུ་རྐྱང་ཕྱག་ཅེས་པའི་མེ་ཏོག་ཞིག་སྐྱེས་ཡོད་པ་དང་། རྟའུ་དང་། མི་ཉག གཡུ་ཁོག་སོགས་ནས་མི་མང་གིས་ངོ་མཚར་བ་དང་རྟེན་འབྲེལ་བཟང་པོར་བརྩིས་ནས་འཇལ་སྐོར་དང་སྨོན་ལམ་འདེབས་པར་འགྲོ་གཞིན་ཡོད་འདུག
ངས་ས་གནས་ཀྱི་མེ་ཏོག་དེར་འཇལ་སྐོར་དུ་བསྐྱོད་པའི་མི་གསུམ་ཙམ་ལ་ཁ་པར་བརྒྱུད་རྒྱུས་ལོན་བྱས་སྐབས། ཁོང་ཚོས་གནས་ཚུལ་དེ་ནི་ཡ་མཚན་པ་དང་ངོ་མཚར་བ་ཞིག་རེད། དགུན་དུས་མེ་ཏོག་བཞད་པའི་གནས་ཚུལ་དེའི་སྐོར་ལ་ཁུངས་ལྡན་གྱི་འགྲེལ་བཤད་བྱེད་ཐུབ་མཁན་ཞིག་ད་ལྟ་མི་འདུག་མོད། མི་མང་གིས་ངོ་མཚར་ཆེན་པོ་ཞིག་ལ་བརྩིས་ནས་ཁ་དར་གཏོང་བ་དང་ཕྱག་འཚལ་མཁན་ཡང་འདུག་ཅེས་བརྗོད་ཀྱི་འདུག སྤྱིར་མེ་ཏོག་དེ་འབྲོག་ཁུལ་གྱི་རྫ་འདབས་སུ་སྐྱེས་ཀྱི་ཡོད་པ་དང་། དེ་ཡང་བོད་ཟླ་གསུམ་པ་ཙམ་ནས་མྱུ་གུ་འབུས་ཤིང་། བོད་ཟླ་བཞི་བ་དང་ལྔ་བའི་དུས་སུ་མེ་ཏོག་གི་བཞད་ཁ་ཕྱེ་བ་དང་། བོད་ཟླ་དྲུག་པའི་ནང་མེ་ཏེ་ཡལ་འགྲོ་བ་ཞིག་ཡིན་འདུག་ནའང་། ད་ལོའི་དགུན་དུས་སུ་མེ་ཏོག་དེ་རྩ་བ་གཅིག་ལ་སྡོང་པོ་གཉིས་ཅན་ཞིག་སྐྱེས་ནས་བཞད་ཁ་ཕྱེ་འདུག་ལ། མེ་ཏོག་དེ་མིས་མཐོང་ནས་དེ་རིང་བར་ཉིན་བཅུ་ལྷག་ཙམ་ལས་ཕྱིན་མི་འདུག དེང་སྐབས་ས་ཁུལ་དེར་ཁ་བས་བཀླུབས་ཡོད་ནའང་། མེ་ཏོག་གི་གཟི་མདངས་མ་ཉམ་པར་གསེར་འོད་ཀྱིས་མཛེས་ཤིང་མགོ་ལྕོགས་ལྡེམ་སེ་སྐྱེས་ཤིང་ཉི་མ་ཤར་བ་དང་འདམ་མ་དག་ཁ་ཕྱེ་ཞིང་འགྲམ་དུ་ཕྱིན་ན་དྲི་བཟང་ཡང་ཐུལ་ལེར་འདུག་ཟེར། རྒྱ་ནག་ཁྲིན་ཏུ་ནས་བོད་རིགས་ཤིག་གིས་གནས་ཚུལ་དེའི་སྐོར་སྤྱི་ཚོགས་ནང་གང་བཤད་ཀྱི་ཡོད་མེད་སྐོར་བརྗོད་དོན། སྤྱིར་ང་ཚོ་བོད་པ་ཟེར་བ་དེ་སྤྱིར་བཏང་མ་ཡིན་པའི་དངོས་པོ་སྣང་བར་འགྲོ་བ་ཞིག་མཐོང་ན་དེ་ལ་རྟེན་འབྲེལ་དང་ངོ་མཚར་བའི་འགྲེལ་བཤད་མང་པོ་བྱེད་པའི་གོམ་གཤིས་ཤིག་ཡོད་པ་ལྟར། ད་ཐེངས་རྟའུ་སྤང་ནང་དུ་སྐྱེས་པའི་མེ་ཏོག་དེ་ཀའུ་རྐྱང་ཕྱག་ཞིག་རེད་ལ། ང་རང་ཚོའི་ས་གནས་སུ་སྐྱེས་རྒྱུ་ཡོད་པ་ཞིག་དང་། མཐོང་རྒྱུ་ཡོད་པ་ཞིག་རེད་མོད། དབྱར་དུས་ལས་དགུན་དུས་སུ་སྐྱེས་ཀྱི་མེད་པར་བརྟེན། མི་ཚང་མས་ཡ་མཚན་པ་དང་རྟེན་འབྲེལ་བཟང་པོར་བརྩིས་ཀྱི་འདུག ལྷག་པར་མི་མང་གིས་༸རྒྱལ་བ་རིན་པོ་ཁྲི་ལ་འཁོར་བ་དང་། བོད་ལ་རང་ཐོབ་པ། བོད་གཞིས་བྱེས་མཉམ་འཛོམས་ཡོང་བའི་རྟེན་འབྲེལ་རེད་ཅེས། སྨོན་ལམ་རྒྱག་གི་འདུག་ཅེས་བརྗོད་བྱུང་། ཡང་མི་གཞན་ཞིག་གིས་མེ་ཏོག་དེའི་འདབས་མའི་ནང་ནས་སྐུ་གཟུགས་འདྲ་མིན་མཇལ་རྒྱུ་ཡོད་པ་དང་། ལ་ལས་༸རྒྱལ་བ་རིན་པོ་ཆེ་མཇལ་གྱི་འདུག་ཟེར་ཅེས་ཀྱང་བརྗོད་སོང་། གང་ལྟར་མེ་ཏོག་དེ་དབྱར་ཁ་ལས་དགུན་དུས་སུ་སྐྱེས་ཀྱི་མེད་པར་བརྟེན། མི་མང་གིས་ངོ་མཚར་བ་དང་རྟེན་འབྲེལ་བཟང་པོར་ངོས་འཛིན་གྱིས་མཇལ་སྐོར་དང་སྨོན་འདེབས་པར་འགྲོ་བཞིན་ཡོད་པ་དང་། དེ་ཡང་༸རྒྱལ་བ་རིན་པོ་ཆེ་བོད་ལ་ཞབས་སོར་འཁོད་པ་དང་། བོད་ལ་རང་དབང་ཐོབ་ནས་གཞིས་བྱེས་མཉམ་འཛོམས་ཡོང་བའི་རྟེན་འབྲེལ་དུ་བརྩི་བཞིན་ཡོད་འདུག་ལ། དེ་ལྟར་རེ་བ་དང་སྨོན་ལམ་བྱེད་བཞིན་ཡོད་འདུག ང་ལ་མེ་ཏོག་དེའི་འདྲ་པར་ཞིག་ཀྱང་འབྱོར་སོང་མོད། དེ་རིང་ཟིན་བྲིས་སུ་ཡར་འཇུག་བྱེད་ཐུབ་མ་སོང་བས་སང་ཉིན་ཡར་འཇུག་བྱེད་ཐུབ་པ་བྱེད་ཀྱི་ཡིན།
གསལ་བཤད། གོང་གི་“སྤང་ནང་”ཅེས་པའི་ས་མིང་དེ་ངའི་ཕ་ཡུལ་ཀྱི་འབྲོག་སྐད་ཀྱི་སྒྲ་ཇི་བཞིན་བྲིས་པ་ཞིག་ཡིན་པས་དག་ཆ་དེ་ལྟར་ཡིན་པའི་ངེས་མེད།
 |
|