གཉིས་པ། མུ་ཁྲི་བཙན་པོ་ནས་གནམ་རི་སྲོང་བཙན་བར་གྱི་རྒྱལ་རབས་གླེང་བ།
བོད་ཀྱི་བང་ཆེན་སྤྱིའི་འདོན་ཐེངས་ ༢༤༣
འདོན་ཐེངས་སྔོན་མའི་འཕྲོས།
ཡོངས་གྲགས་ལ་བན་བོན་གཉིས་ཀས་རྒྱལ་པོ་འདི་ཉིད་དགུང་ལོ་བརྒྱ་དང་ཉི་ཤུ་བཞུགས་པར་འདོད་ཚུལ་གཅིག་པ་ལྟ་བུར་སྣང་ཡང༌། བཞུགས་དོན་ལ་འདོད་ཚུལ་ཅུང་ཟད་མི་འདྲ་བར་ཡོད་པར་མཐོང༌། དཔེར་ན། བན་གྱིས་གོང་བརྗོད་ལྟར་མདོ་སྡེ་ཟ་མ་ཏོག་སོགས་རྒྱལ་པོ་འདིའི་ཕྱག་ཏུ་སོན་པས་ནང་ཆོས་དར་མགོ་ཚུགས་པ་དང༌།

གཉིས་པ། མུ་ཁྲི་བཙན་པོ་ནས་གནམ་རི་སྲོང་བཙན་བར་གྱི་རྒྱལ་རབས་གླེང་བ།
བོད་ཀྱི་བང་ཆེན་སྤྱིའི་འདོན་ཐེངས་ ༢༤༢
འདོན་ཐེངས་སྔོན་མའི་འཕྲོས། ཡང་དེ་ཉིད་ལས། ནེལ་པ་པཎ་ཌི་ཏས། ལི་ཐི་སི་དང༌། ཐོ་གར་གྱི་ལོ་ཙཱ་བ་བློ་སེམས་འཚོ་གཉིས་ཀྱིས་པཎ་ཌི་ཏ་མཁས་པ་ལེགས་སྦྱིན་སྤྱན་དྲངས་ནས་བོད་ལ་བྱོན་ཏེ་རྒྱལ་པོ་ལ་ཆོས་གསུངས་པས། བོད་ན་ཡི་གེ་མེད་པས་བསླབ་ཏུ་མ་བཏུབ་ནས། ཟ་མ་ཏོག་བསྐོས་པ་སོགས་རྒྱལ་པོ་ལ་ཕུལ་ཏེ་འདི་ལ་ཕྱག་དང༌། སྐོར་བ་དང༌། མཆོད་པ་བགྱིས་ལ་གསོལ་བ་ཐོབ། གང་འདོད་པའི་བྱིན་རླབས་འབྱུང་གི།

གཉིས་པ། མུ་ཁྲི་བཙན་པོ་ནས་གནམ་རི་སྲོང་བཙན་བར་གྱི་རྒྱལ་རབས་གླེང་བ།
བོད་ཀྱི་བང་ཆེན་སྤྱིའི་འདོན་ཐེངས་ ༢༤༡
སྤྱིའི་འདོན་ཐེངས་༢༣༡ པའི་འཕྲོས།
ལྔ་པ། ཆུ་ལ་ལྡེ་བརྒྱད་ཀྱི་སྐོར་ལ་གླེང་བ། ཆུ་ལ་ལྡེ་བརྒྱད་ཅེས་པའི་བོད་ཀྱི་རྒྱལ་རབས་བཅུ་དྲུག་པ་ཟ་ནམ་ཟིན་ལྡེ་དང༌། བཅུ་བདུན་པ་ལྡེ་འཕྲུལ་ནམ་གཞུང་བཙན་པོ། བཅོ་བརྒྱད་པ་སེ་སྣོལ་ནམ་ལྡེ། བཅུ་དགུ་པ་སེ་སྣོལ་པོ་ལྡེ། ཉི་ཤུ་པ་ལྡེ་སྣོལ་ནམ། ཉེར་གཅིག་པ་ལྡེ་སྣོལ་པོ། ཉེར་གཉིས་པ་ལྡེ་རྒྱལ་པོ།

བོད་ཀྱི་བང་ཆེན་སྤྱིའི་འདོན་ཐེངས་ ༢༤༠  
འདོན་ཐེངས་སྔོན་མའི་འཕྲོས།
དེའི་སྔོན་རོལ་གོ་མིག་ཏུ་ཡོད་པའི་དགོན་པ་ལ། བར་སྐབས་ཤིག་ནས་སྟེང་བརྒྱུད་ལྷུན་གྲུབ་ཆོས་འཁོར་གླིང་ཞེས་དགོན་པའི་མིང་དུ་འབོད་སྲོལ་བྱུང་ཞིང༌། དེ་ནི་གུ་གེའི་བླ་མ་ཆོས་དཔལ་བཟང་པོ་སྤི་ཏིའི་ཕྱོགས་སུ་ཕེབས་སྐབས་རང་རིག་གྲོང་ཚོའི་ཕྱོགས་སུ་རོང་ཀྲོང་ངམ། མངོན་དགའ་ཞེས་པར་དགོན་པ་གཉིས་ཡོད་ཅིང༌། དགོན་པ་གཅིག་དཀར་མཛེས་འགྲུལ་རྩེ་ལ་ཐོག་གོ་མིག་ཏུ་ཡོད་པའི་གོ་མིག་དགོན་པ་དང་ཟླ་སྒྲིལ་དུ་བཏང་སྟེ། (ཤོད་སྲོལ་ལ། ད་ལྟ་རང་རིག་གྲོང་ཚོ་ཡོད་སའི་ཉེ་འགྲམ་ན་སྔོན་མ་མངོན་དགའམ། རོང་ཀྲོང་ཞེས་པའི་ས་ཆར་རི་དེའུ་ཞིག་ཡོད་ས་དེར་དགོན་པ་གཉིས་ཡོད་ཅིང༌། བར་སྐབས་ཤིག་ནས་གུ་གེ་བླ་མ་ཆོས་དཔལ་བཟང་པོ་མཆོག་གིས་དགོན་པ་གཅིག་འགྲུལ་རྩེ་ལ་ཐོག་གོ་མིག་དགོན་པ་དང་ཟླ་སྒྲིལ་དུ་བཏང་བ་དང༌།

བོད་ཀྱི་བང་ཆེན་སྤྱིའི་འདོན་ཐེངས་ ༢༣༩
སྤྱིའི་འདོན་ཐེངས་༢༣༦ པའི་འཕྲོས།
དེང་སང་སྤྲིན་གུང་རི་དགོན་པའི་མངའ་འོག་ཏུ་བདེ་ཆེན་ཆོས་གླིང་ཞེས་རྙིང་མའི་བཙུན་དགོན་ཞིག་གསར་རྒྱག་བྱེད་མུས་ཡིན་ཞིང༌། དགོན་པ་དེའི་བཙུན་མ་ཟླ་བ་བཟང་མོས། ད་ལྟ་བཙུན་དགོན་དེའི་མཚན་ཐོའི་ནང་དུ་བཙུན་མ་ཉེར་གཅིག་ཙམ་ཡོད་ཅེས་གསུངས་བྱུང༌།
    བཙུན་མ་ཟླ་བ་བཟང་མོས་གསུང་དོན་ལ། སྤྱི་བཏང་སྤྲིན་གུང་རི་དགོན་པའི་མངའ་འོག་ཏུ་ཡོད་པའི་གྲོང་སྡེ་ཁྱིམ་ཚང་ནི། སྟེང་ཏི་འོག་མ་ཞེས་པའི་གྲོང་པར་ཁྱིམ་ཚང་བཅུ་དགུ། སྟེང་ཏི་གོང་མ་ན་ཁྱིམ་ཚང་བཅུ་བདུན། སྐྱིད་ཐང་ན་ཁྱིམ་ཚང་གསུམ། གུ་གླིང་སྟེང་འོག་གཉིས་ལ་ཁྱིམ་ཚང་སོ་བདུན། གུང་རི་ན་ཁྱིམ་ཚང་སུམ་ཅུ། ཕུག་ཆུང་ན་ཁྱིམ་ཚང་དགུ། གསེར་གླིང་ན་ཁྱིམ་ཚང་བཅོ་ལྔ། ཀ་ལ་མུ་ཏི་ན་ཁྱིམ་ཚང་གཅིག སྟོད་གནམ་ལ་ཁྱིམ་ཚང་བཅུ་གཉིས། གཏེར་གླིང་ན་ཁྱིམ་ཚང་བཞི་བཅུ། མི་ཁྱིམ་ན་ཁྱིམ་ཚང་བརྒྱད།

བོད་ཀྱི་བང་ཆེན་སྤྱིའི་འདོན་ཐེངས་ ༢༣༨
གོང་བརྗོད་ལྟར། གནའ་སྲོལ་ལ་ཧི་མ་ལ་ཡའི་བྱེ་བྲག་སྤི་ཏིའི་ཡུལ་འདི་ཉིད་དགོན་ཁག་ལྔའི་ཁོངས་སུ་འདུས་དགོས་པ་ལྟ་བུ་ཡོད་ཅིང༌། དགོན་ཁག་ལྔའི་དང་པོ་ཨོ་རྒྱན་གསང་སྔགས་ཆོས་གླིང་ངམ་གུང་རི་དགོན་པ་ནི་སྤིན་ཡུལ་འདིའི་མིང་དངོས་ལ་སྤྲིན་ཞེས་ཟེར་གྱི་ཡོད་འདུག་ཀྱང༌། དེང་སང་སྤི་ཏིའི་ཡུལ་མི་ཚང་མས་སྤིན་ཞེས་འབོད་ཀྱི་འདུག གྱི་ཕྱོགས་སུ་གུང་རི་ཞེས་པའི་ཡུལ་གྲོང་གི་ངོས་སུ་ཆགས་ལ། ད་ལྟ་དགོན་པའི་ནང་དུ་བཤད་གྲྭ་བ་གྲྭ་གྲངས་དྲུག་ཅུ་ཙམ་དང༌། སྔགས་གྲྭ་བརྒྱ་ཁ་ཙམ། བཙུན་མ་ཞེ་ལྔ་ནས་ལྔ་བཅུ་ཡས་མས་ཙམ་ཡོད་ཅིང༌། བཙུན་མ་དེ་དག་ཚེས་བཟང་དུས་བཟང་ཙམ་མ་གཏོགས་དུས་རྒྱུན་རང་ཁྱིམ་དུ་བཞུགས། བཤད་གྲྭ་བ་རྣམས་ཀྱིས་ཚད་མ་དང༌། སྤྱོད་འཇུག དབུ་མ་རྒྱན། དབུ་མ་འཇུག་པ། སུམ་རྟགས། སྔགས་ཀྱི་སློབ་ཚན། འཇུ་མི་ཕམ་གྱི་མཁས་འཇུག སྨིན་གླིང་ལོ་ཆེན་དྷརྨ་ཤྲཱི་རིས་མཛད་པའི་སྡོམ་གསུམ་རྣམ་ངེས་སོགས་ལ་ཐོས་བསམ་སློབ་གཉེར་མཛད་བཞིན་པ་ཡིན།

བོད་ཀྱི་བང་ཆེན་སྤྱིའི་འདོན་ཐེངས་ ༢༣༧    
བསྟན་པའི་སྦྱིན་བདག་ཆེན་པོ་ས་སྐྱོང་རིན་སྤུངས་པ་ཡབ་སྲས་རིམ་པར་བྱོན་པ་རྣམས་ཀྱི་སྔ་ཕྱིར་བཤད་སྒྲུབ་ཀྱི་ཆོས་སྡེ་ཆེ་ཁག་གསར་སྐྲུན་དང་བསྐྱར་གསོའི་སྦྱིན་བདག་ཇི་མཛད་སྐོར་རགས་ཙམ་གླེང་བ་རྒྱལ་རབས་དེབ་ཐེར་དྭངས་གསལ་ཤེལ་གྱི་མེ་ལོང་ལས། དང་པོ་བསྟན་པའི་སྦྱིན་བདག་ཆེན་པོ་ས་སྐྱོང་རིན་སྤུངས་པའི་མི་རྒྱུད་ནི། བོད་ཀྱི་རྒྱལ་པོ་ཐོག་མ་གཉའ་ཁྲི་བཙན་པོའི་གདུང་རྒྱུད་ལས་མཆེད་པར་བཤད་པ་དང༌། རྒྱལ་པོ་གཉའ་ཁྲི་བཙན་པོ་རྒྱལ་སྲིད་དུ་མངའ་གསོལ་བའི་སྐབས་ཁྱེད་སུ་ཡིན་བྱས་པས་ང་བཙན་པོའི་བུ་ཡིན་ཟེར། གང་ནས་འོང་བྱས་པས་གནམ་ལ་མཛུབ་མོ་བསྟན་བྱུང་བ་དང༌། འདིར་ལྷ་དངོས་སུ་བྱོན་པར་འདུག་པས་བོད་ཀྱི་རྒྱལ་པོ་མངའ་གསོལ་ཁྱེད་སྒེར་དུ་ཉན་ནམ་མི་ཉན་ཟེར། འདི་ནི་སྒེར་དུ་རུང་བས་ཁྱེར་ཅིག་གསུངས་པས། སྒེར་གྱི་མིང་དུ་ཐོག་མར་དེ་ནས་གྲགས་པ་བྱུང༌།

བོད་ཀྱི་བང་ཆེན་སྤྱིའི་འདོན་ཐེངས་ ༢༣༦
འདོན་ཐེངས་སྔོན་མའི་འཕྲོས།
མ་གཞི་རང་གི་ཆོས་དང་རིག་གཞུང་གི་སྲད་བུ་མ་ཆད་ཙམ་ཟིན་སྡོད་མཁན་ནི་དགོན་སྡེ་གྲྭ་བཙུན་རྣམས་ཡིན་པ་ལྟ་བུར་ཚོར་ཞིང༌། དགོན་སྡེ་གྲྭ་བཙུན་དེ་དག་མེད་ན་ལོ་ངོ་སྟོང་ཕྲག་ནས་རིམ་གྱིས་བརྒྱུད་པའི་རང་གི་རིག་གཞུང་བཟང་པོ་དེ་དག་ཕལ་ཆེར་མིང་གི་ལྷག་མ་ཙམ་དུ་གྱུར་ཚར་ཡང་སྲིད། འོན་ཀྱང༌། སྤི་ཏི་ལ་དགོན་སྡེ་ཆེ་ཁག་ལྔ་དང༌། བཙུན་དགོན་གསུམ། མཚམས་ཁང་མང་དག་དངོས་མཇལ་བྱུང་ཡང༌། དེ་དག་ལ་གནའ་སྲོལ་བྷོ་ཊིའི་ཡི་གེ་ཀློག་ཤེས་ཙམ་དང༌། ཆོ་ག་ཕྱག་ལེན་ཨོ་ཁྱོག་ཙམ་ལས། བཤད་སྒྲུབ་ཀྱི་འཆད་ཉན་བྱེད་ཅིང་གྲྭ་ཇོ་མཁན་བཙུན་བཟང་གསུམ་དང༌། འཆད་རྩོད་རྩོམ་གསུམ་སོགས་མཁས་པའི་བྱ་བ་རྣམས་ལ་འཇུག་ཅིང༌། རང་གཞན་སུས་བལྟས་ཀྱང་བློ་ཡིད་ཚིམ་དགོས་པའི་མཁས་མཛངས་ལྡན་པ་ཞིག་གྲངས་ཀ་ཡོད་ཙམ་མམ། ཕལ་ཆེར་ཉིན་མོའི་སྐར་མའི་ཟླ་རུ་གྱུར་སོང༌།

བོད་ཀྱི་བང་ཆེན་སྤྱིའི་འདོན་ཐེངས་ ༢༣༥
འདོན་ཐེངས་སྔོན་མའི་འཕྲོས།
སྤི་ཏི་གཙང་པོ་ནི་རང་རིག་དང་དཀར་མཛེས་ཐད་ནས་ཕལ་ཆེར་ཕྱོགས་འདུས་ཟིན་པ་ལྟ་བུ་ཡིན་ཞིང༌། གཙང་པོའི་གཡས་ཕྱོགས་སུ་མོ་རང་དང་སྤང་མོ། གཙང་པོའི་གཡོན་ཕྱོགས་སུ་དཀྱིལ་དགོན་པ་དང་དཀྱིལ་བར་གྲོང་ཚོ་བཅས་གཙང་པོ་གཡས་གཡོན་གྱི་ལུང་པའི་བར་དེ་ན། ལ་དར་རྩེ་ཟེར་བའི་རི་བོ་ཞིག་གིས་དཀྱིལ་ནས་ཆོད། དེ་ཡང་ལ་དར་རྩེའི་རྒྱབ་ཏུ་སྐྱིད་སྣང་ལྡན་པའི་སྤང་ཐང་ཡངས་པོ་ཞིག་ཡོད་པའི་བཤད་སྒྲོས་ནི། དཀར་མཛེས་པ་དགྲ་ལྷ་དར་རྒྱས་ལགས་ཀྱིས། སྔོན་མ་སྐལ་པ་བཟང་དུས་ལོ་རྟག་པར་ཕྱི་ཟླ་བརྒྱད་པ་ཙམ་ལ། ལ་དར་རྩེའི་རྒྱབ་ཏུ་ཡོད་པའི་སྤང་ཐང་སྟེང་དུ་ལ་དྭགས་དང༌། བོད། ག་ཤ། སྤི་ཏི། ཁུ་ནུ་སོགས་ཀྱི་ཚོང་པ་མང་པོ་ལྷན་འཛོམས་བྱེད་ཅིང་རང་རང་ལ་གང་དགོས་ཉོ་ཚོང་བྱེད་པའི་ལུགས་སྲོལ་བཟང་པོ་ཡོད་འདུག་ཀྱང༌། བར་སྐབས་ཤིག་ནས་དུས་འགྱུར་སྣ་ཚོགས་ཀྱིས་ས་ཆ་དེར་ཕྱོགས་མཐའི་ཚོང་པ་འདུ་འཛོམས་བྱེད་པའི་ལུགས་སྲོལ་ཉམས་ཆགས་སུ་གྱུར་འདུག དེས་ན། སྔོན་དུས་ལུགས་སྲོལ་བཟང་པོ་དེ་ལྟར་ཡོད་པའི་རྒྱུ་མཚན་གྱིས། དེང་སྐབས་ག་ཤ་ནས་ཡིན་པའི་ཨ་ཤོཀ་ཟེར་བ་ཞིག་ག་ཤ་སྤི་ཏིའི་རྫོང་དཔོན་གཞོན་པའི་གོ་གནས་ཟིན་དུས།

བོད་ཀྱི་བང་ཆེན་སྤྱིའི་འདོན་ཐེངས་ ༢༣༤
འདིའི་སྔོན་དུ་བརྗོད་པའི་གནས་ལུགས་རགས་རིམ་དང་སྦྲེལ་ཏེ། སྤི་ཏི་ཞེས་པའི་ཡུལ་ནི་འཛམ་གླིང་ཨེ་ཤ་ཡིའི་ཡང་རྩེ་མཐོ་སྒང་ཧི་མ་ལ་ཡའི་རི་རྒྱུད་ན་གནས་ཤིང༌། དེ་ཡང་སྤི་ཏིའི་སྨད་ཕྱོགས་སུ་སུམ་མདོ་ཞེས་པའི་ཁུ་ནུ་དང་ས་མཚམས་འཁེལ་གྱི་ཡོད་པ་དང༌། སྟོད་ཕྱོགས་ཀུན་འཛོམས་ལའི་རྒྱབ་ཕྱོགས་དཀར་རྩེ་ཟམ་པ། ཀུན་འཛོམས་ལ་རྩེ་ནས་དཀར་རྩེ་ཟམ་པའི་བར་དུ་ལེ་དབར་བཅུ་གཅིག་(11 km)ཡོད་ཞེས་པའི་བར་ག་ཤ་དང་ས་མཚམས་འཁེལ་གྱི་ཡོད་ལུགས་བླ་རི་བ་ཕུན་ཚོགས་ལགས་ཀྱིས་གསུངས་ལུགས་སྔོན་དུ་བརྗོད་ཟིན་ལྟར། སྨད་ཕྱོགས་སུམ་མདོ་ནས་སྟོད་ཕྱོགས་ཀུན་འཛོམས་ལའི་རྒྱབ་ཕྱོགས་དཀར་རྩེ་ཟམ་པའི་བར་གྱི་ཡུལ་ལ་སྤི་ཏི་དང༌། དེའི་ཡུལ་མི་ལ་སྤི་ཏི་བ་ཞེས་འབོད་ཀྱི་འདུག

བོད་ཀྱི་བང་ཆེན་སྤྱིའི་འདོན་ཐེངས་ ༢༣༢  
རྣལ་མའི་སེམས་ཁོང་ན་རང་མི་རིགས་ཀྱི་འབྱུང་ཁུངས་དང༌། ནང་ཆོས་དར་ཞིང་རྒྱས་པའི་འཕེལ་རིམ། སྐད་ཡིག་གི་སྒྱུ་བཟོ་སོགས་ཆ་ཚང་བ་ཞིག་ཤེས་པར། ད་ལྟའི་བོད་ས་ཁུལ་གཅིག་པུ་བཤད་པ་ཙམ་མ་ཡིན་པར་སྤྱིར་འཛམ་བུ་གླིང་གི་གནས་སྟངས་མི་ཉུང་བ་ཞིག་དང༌། སྐབས་འབྲེལ་སྦར་མ་སྟོད་ཕྱོགས། ཨ་རབ། ལྷག་པར་ཧི་མ་ལ་ཡའི་རིགས་བརྒྱུད་ཀྱི་ཡུལ་ཁག་ཚང་མར་སྔོན་བྱུང་ལོ་རྒྱུས་ཀྱི་གནས་ལུགས་རགས་བསྡུས་ཤིག་ཤེས་དགོས་ངེས་ཡིན། ཅིའི་ཕྱིར་ཞེ་ན། སྤྱི་འཛམ་གླིང་འདིའི་ནང་དུ་རྒྱལ་ཁབ་དང༌། མི་རིགས། སྐད་ཡིག་སོགས་མི་འདྲ་བ་སྣ་ཚོགས་པ་ཞིག་ཡོད་ཀྱང༌། དོན་དམ་ལ། ཐོག་མའི་འཇིག་རྟེན་གྲུབ་དུས་དང༌། འཛམ་གླིང་ནང་མི་ཡི་རིགས་རྒྱུད་གཙོས་པའི་སྐྱེ་རྒུ་ཚང་མ་བྱུང་ལུགས་ཀྱི་འབྲེལ་བ་ནི་ཉ་འཛིན་དྲ་བ་ལྟར་འབྲེལ་ཞིང༌། ལྷག་པར་སྐབས་དོན་གོང་བརྗོད་ཡུལ་གྲུ་བྱེ་བྲག་པ་དེ་དག་གི་གནས་ལུགས་མང་པོ་བོད་ཀྱི་ལོ་རྒྱུས་དང་དངོས་འབྲེལ་གྱི་གནས་སུ་གྱུར་ཡོད་པས་སོ། །

བོད་ཀྱི་བང་ཆེན་སྤྱིའི་འདོན་ཐེངས་ ༢༣༡
འདོན་ཐེངས་སྔོན་མའི་འཕྲོས། བཞི་པ། ས་ལེགས་དྲུག་གི་སྐོར་ལ་བཤད་པ། ས་ལ་ལེགས་དྲུག་ཅེས་པ་ནི་བོད་ཀྱི་རྒྱལ་རབས་བཅུ་པ་ཨེ་ཤོ་ལེགས་དང༌། བཅུ་གཅིག་པ་དེ་ཤོ་ལེགས། བཅུ་གཉིས་པ་ཐི་ཤོ་ལེགས། བཅུ་གསུམ་པ་གུ་རུབ་ལེགས། བཅུ་བཞི་པ་འབྲོང་གཞེར་ལེགས། བཅོ་ལྔ་པ་ཨི་ཤོ་ལེགས་བཅས་ཀྱི་བར་དུ་རྒྱལ་རབས་དྲུག་ལ་ཟེར་གྱི་ཡོད། དེ་ཡང་ས་ལ་ལེགས་ཞེས་བརྗོད་དོན་ནི། སྲིད་པ་རྒྱུད་ཀྱི་ཁ་བྱང་ཆེན་མོ་ལས། ས་ལ་དུར་འདེབས་པས་ས་ཡི་ཡག་དྲུག་བྱུང་བ་ཡིན་ཞེས་བཤད་ཅིང༌། རྒྱལ་པོ་འདི་དག་གི་པུར་སྒམ་སའི་འོག་ཏུ་སྦས་པའི་ཕྱིར་དེ་ལྟར་བཏགས་པ་མིན་ནམ་སྙམ་ཡང་དཔྱད་དགོས་པར་བསམ།

བོད་ཀྱི་བང་ཆེན་སྤྱིའི་འདོན་ཐེངས་ ༢༣༠
འདོན་ཐེངས་སྔོན་མའི་འཕྲོས།
གཞན་ཡང་རུ་ལ་སྐྱེས་བྱུང་རབས་དེ་དག་ལ་བསམས་ནས་མིང་ཡང་ཡིག་རྙིང་ཁག་དང་མི་འདྲ་བའི་རུ་ལས་སྐྱེས་ཞེས་སྒྱུར་བཅོས་བཏང་ཡོད་ཚོད་རེད་འདུག
    འདི་སྐབས། ཆོས་འབྱུང་མཁས་པའི་དགའ་སྟོན་སོགས་ལོ་རྒྱུས་འཁྱ་འཁྱོར་དག་ལ། རུ་ལ་སྐྱེས་རྒྱལ་པོ་གྲི་གུམ་བཙན་པོའི་བཙུན་མོ་དང་ཡར་ལྷ་ཤམ་པོ་གཉིས་འདུས་པ་ལས་བཙས་པར་བཤད་ཡོད་ཀྱང༌། ཏུན་ཧོང་ཡིག་ཆ་ལྟར་ན། རྒྱལ་པོའི་ཕྱོགས་གཏོགས་བཀྲགས་ཀྱི་རིགས་རྒྱུད་ལས་བཙས་ལུགས་ཙམ་ལས། རུ་ལ་སྐྱེས་རྒྱལ་པོ་སྲས་དང་བཅས་པའི་སྤུ་ཉེ་ཡིན་ལུགས་མཐོང་རྒྱུ་མེད། འོན་ཀྱང༌། རུ་ལ་སྐྱེས་ནི་རྒྱལ་པོ་ཚང་ལ་བཀའ་དྲིན་ཤིན་ཏུ་ཆེ་བ་ཞིག་ཡིན་སྟབས་སྤུ་དེ་གུང་རྒྱལ་རང་ཉིད་ཀྱི་ཁུ་བོར་བཀུར་བའི་གནས་ལུགས་ཤིག་གསལ་ཏེ་ཆེད་བརྗོད་ནང༌། རྒྱལ་པོས་མི་མཆོག་རུ་ལས་སྐྱེས་ཁྱེད་ཀྱིས། །ང་ཡི་ཡབ་ཀྱི་གོ་བགྱིས་རྒྱལ་སར་བཏོན། །སྲས་ཀྱི་གོ་བགྱིས་ཡབ་ཀྱི་སྐུ་མཚལ་གཉེར། །ཆེ་ཆུང་མེད་པའི་མི་ཀུན་ཁྱེད་ལ་སྨོན། །མིང་ཡང་ཁུ་བོ་ལྷ་བུ་སྨོན་གཟུང་ཞེས། །བཏགས་ཅིང་དྲིན་དུ་གཟོ་བ་རྒྱ་ཆེར་བྱས། །ཞེས་རུ་ལ་སྐྱེས་རྒྱལ་པོ་ཉིད་ཀྱི་ཁུ་བོའི་རུས་སུ་ཐོགས་ཚུལ་ལྟ་བུའང་བཤད་སྲོལ་ཡོད་འདུག

བོད་ཀྱི་བང་ཆེན་སྤྱིའི་འདོན་ཐེངས་ ༢༢༩
འདོན་ཐེངས་༡༢༧ པའི་འཕྲོས།
ལོ་ངམ་མོ་བརྒྱའ་ནྀ་སླང་ང་བྲང་ལ་བཆར་ཏེ་ངོག་གོ། མྱང་རོ་ཤམ་པོ་ཕབ་བོ། འགྲེང་ནྀ་བཙོན་དུ་བཟུང༌། །དུད་ནྀ་མནངསུ་བཆད་ནས། བ་ཆོས་གུང་དང་དུ་གཤེགས་སོ། མགུར་འདི་ཞེས་གསུངསོ། འ་བ་ཉི་ཉེ་བ་ཉིད། བྱ་རོ་རོ་ན་མདུང་གྀ་རྩེ་རང་ནིག། ཡོས་རོ་རོ་ན་ལྷམ་གྱི་གོང་ར་ནིག བརླའ་བརྡུངས། སྤུར་བཏབ། འོ་དེ་མྱེད་སྤུ་དེ་མེད། །ཆེས་གསུངས་སོ། སླར་པྱིང་བ་སྟག་རྩེར་གཤེགས་སོའ། ཡུལ་ཡབ་ཀྱི་རྗེ་རུ་གཤེགས་སོ། ཡུལ་པྱི་འབྲོག་གདེངས་མྱི་པྱོལ་གྱི་ཆ་འོ། དོག་ཡབ་ཀྱི་ཆབ་མཆིས་ཀྱིས། ས་འོན་བུ་སྤུར་མྱྀ་ཁོག་གྀ་ཆ་འོ། དེ་ཞེས་མགུར་གསུངསོ། སྒྱེད་པོ་འོག་གཟུགས་ན། ཟངས་བླ་ནས་ཕབ་སྟེ། རྗེ་རུ་གཤེགསོ། །བཤོས་ན་ནྀ་སྤུ་དེ་གུང་རྒྱལ། གྲོངས་ན་ནྀ་གྲང་མོ་གནམ་བསེའ་བརྩིག། འགྲེང་མགོ་ནག་གྀ་རྗེ། དུད་རྔོག་ཆགས་ཀྱི་རྐྱེན་དུ་གཤེགསོའ། །ཞེས་གསལ་ཡོད། དེ་ཡང་ཡིག་ཆ་འདིར་རུ་ལ་སྐྱེས་ཀྱི་བཀའ་སྤྱད་སྡུག་རུས་ཆེན་པོའི་ངང་ནས། བོད་ཀྱི་རྒྱལ་རབས་དགུ་པ་སྤུ་དེ་གུང་རྒྱལ་སླར་ཡང་ཡབ་མེས་ཀྱི་སྲིད་ཁྲིར་ཇི་ལྟར་བསྙེགས་ཐུབ་པའི་སྐོར་འཁོད་ཡོད་ཅིང༌། དེ་ལ་བསམ་གཞིག་རེ་བྱེད་ན། དུམ་མཚམས་མི་འདྲ་བའི་དོན་གནད་ཆེ་ཁག་གསུམ་ཙམ་ཡོད་པར་མཐོང༌།

བོད་ཀྱི་བང་ཆེན་སྤྱིའི་འདོན་ཐེངས་ ༢༢༧
འདོན་ཐེངས་སྔོན་མའི་འཕྲོས།

དཔའ་བོ་གཙུག་ལག་ཕྲེང་བས། རྒྱལ་སྲས་གསུམ་ཡོད་པར་བསམས་ནས། གཅན་པོ་ཤ་ཁྲིས་ཀོང་གི་རྗེ་བོ་མཛད། འབྲིང་པོ་བྱ་ཁྲིས་སྤོ་བོའི་མངའ་དབང་མཛད། ཆུང་བ་ཉ་ཁྲིས་ཉང་པོའི་རྗེ་མཛད་ཅེས་གསུངས་པར་སྣང་ཡང༌། ཇོ་ནང་པ་ཏཱ་ར་ནཱ་ཐས་བརྩམས་པའི་<<མྱང་ཡུལ་སྟོད་སྨད་བར་གསུམ་གྱི་ངོ་མཚར་གཏམ་གྱི་ལེགས་བཤད་མཁས་པའི་འཇུག་ངོགས་>>སམ། <<མྱང་ཆོས་འབྱུང་>>ལས་དེའི་སྐོར་གསལ་ཆ་གང་ཡང་མ་བྱུང་ཚུལ་བཤད་འདུག་ན། ཕལ་ཆེར་ཉང་པོའི་ཕྱོགས་སུ་རྒྱལ་སྲས་གསུམ་པོ་གང་རུང་ཞིག་བྱོན་ཏེ་རྒྱལ་སྲིད་བསྐྱངས་པའི་ལོ་རྒྱུས་མེད་པ་མིན་ནམ་སྙམ་ཞིང༌། གལ་ཏེ་རྒྱལ་སྲས་གསུམ་པོ་གང་ཡང་རུང་བ་ཞིག་ཉང་པོའི་ཕྱོགས་སུ་བྱོན་ནས་རྒྱལ་པོ་ཟིན་པའི་གནས་ལུགས་ཤིག་ཡོད་ན་མྱང་ཆོས་འབྱུང་ནང་ངེས་པར་དུ་འཁོད་དགོས་ངེས་ལྟ་བུ་གཞན་གྱིས་བསམས་འདུག ༈ རྒྱལ་པོ་གྲི་གུམ་བཙན་པོའི་སྐུ་དུས་སུ་གོ་ཁྲབ་དང་རལ་གྲི་ཐོག་མར་དར། གསས་མཁར་ས་ལེ་བྱེལ་ཚང་བཞེངས། གླུ་སྲིང་མེར་ལྕམ་མམ་དབལ་བཟའ་ཁྲི་བཙུན་ཁབ་ཏུ་བཞེས་ཞེས་དུང་དཀར་ཚིག་མཛོད་དུ་གསལ་ལོ། །