The Tibet Express

བོད་ཀྱི་བང་ཆེན་སྤྱིའི་འདོན་ཐེངས་ ༢༢༩
འདོན་ཐེངས་༡༢༧ པའི་འཕྲོས།
ལོ་ངམ་མོ་བརྒྱའ་ནྀ་སླང་ང་བྲང་ལ་བཆར་ཏེ་ངོག་གོ། མྱང་རོ་ཤམ་པོ་ཕབ་བོ། འགྲེང་ནྀ་བཙོན་དུ་བཟུང༌། །དུད་ནྀ་མནངསུ་བཆད་ནས། བ་ཆོས་གུང་དང་དུ་གཤེགས་སོ། མགུར་འདི་ཞེས་གསུངསོ། འ་བ་ཉི་ཉེ་བ་ཉིད། བྱ་རོ་རོ་ན་མདུང་གྀ་རྩེ་རང་ནིག། ཡོས་རོ་རོ་ན་ལྷམ་གྱི་གོང་ར་ནིག བརླའ་བརྡུངས། སྤུར་བཏབ། འོ་དེ་མྱེད་སྤུ་དེ་མེད། །ཆེས་གསུངས་སོ། སླར་པྱིང་བ་སྟག་རྩེར་གཤེགས་སོའ། ཡུལ་ཡབ་ཀྱི་རྗེ་རུ་གཤེགས་སོ། ཡུལ་པྱི་འབྲོག་གདེངས་མྱི་པྱོལ་གྱི་ཆ་འོ། དོག་ཡབ་ཀྱི་ཆབ་མཆིས་ཀྱིས། ས་འོན་བུ་སྤུར་མྱྀ་ཁོག་གྀ་ཆ་འོ། དེ་ཞེས་མགུར་གསུངསོ། སྒྱེད་པོ་འོག་གཟུགས་ན། ཟངས་བླ་ནས་ཕབ་སྟེ། རྗེ་རུ་གཤེགསོ། །བཤོས་ན་ནྀ་སྤུ་དེ་གུང་རྒྱལ། གྲོངས་ན་ནྀ་གྲང་མོ་གནམ་བསེའ་བརྩིག། འགྲེང་མགོ་ནག་གྀ་རྗེ། དུད་རྔོག་ཆགས་ཀྱི་རྐྱེན་དུ་གཤེགསོའ། །ཞེས་གསལ་ཡོད། དེ་ཡང་ཡིག་ཆ་འདིར་རུ་ལ་སྐྱེས་ཀྱི་བཀའ་སྤྱད་སྡུག་རུས་ཆེན་པོའི་ངང་ནས། བོད་ཀྱི་རྒྱལ་རབས་དགུ་པ་སྤུ་དེ་གུང་རྒྱལ་སླར་ཡང་ཡབ་མེས་ཀྱི་སྲིད་ཁྲིར་ཇི་ལྟར་བསྙེགས་ཐུབ་པའི་སྐོར་འཁོད་ཡོད་ཅིང༌། དེ་ལ་བསམ་གཞིག་རེ་བྱེད་ན། དུམ་མཚམས་མི་འདྲ་བའི་དོན་གནད་ཆེ་ཁག་གསུམ་ཙམ་ཡོད་པར་མཐོང༌། ༡རྒྱལ་པོ་གྲི་གུམ་བཙན་པོ་བཀྲོངས་རྗེས་པུར་སྒམ་གཙང་ཆུའི་གཞུང་དུ་བཏང་བ་དང༌། སྲས་གཉིས་ཀྱང་ཀོང་ཡུལ་དུ་སྤྱུགས་ཚུལ་གསལ་ཡོད། ༢ལོ་ངམ་ཚང་གི་ཕྱོགས་གཏོགས་རྷེའི་རིགས་དང༌། རྒྱལ་པོ་ཚང་གི་ཕྱོགས་གཏོགས་བཀྲགས་ཀྱི་རིགས་རྒྱུད་གཉིས་པོའི་དབར་ན་འགལ་འདུ་ཤུགས་ཆེན་བྱུང་སྟེ་རྷེའི་ཕྱོགས་ནས་བཀྲགས་ཀྱི་ཕྱོགས་ལ་མི་རྒྱུད་རྩ་བརླག་ཏུ་གཏོང་ལ་ཉེ་བའི་སྐབས་དེར་བཀྲགས་ཀྱི་ཕྱོགས་གཏོགས་སྦྲུམ་མ་ཞིག་གཞན་དུ་བྲོས་ཏེ། རུ་ལ་སྐྱེས་ཞེས་པ་དེ་བཙེས་པ་དང༌། རུ་ལ་སྐྱེས་ནར་སོན་དུས་ཀོང་ཡུལ་ཕྱོགས་སུ་རྗེ་བོ་འཚོལ་དུ་སོང་བས་སྲས་ཤ་ཁྲི་དང་ཉ་ཁྲི་གཉིས་མཇལ་ཞིང་རྒྱལ་རབས་སླར་གསོ་དང༌། རྒྱལ་པོ་གྲི་གུམ་བཙན་པོའི་བང་སོ་འཚོལ་སྒྲུབ་ཇི་ལྟར་བྱས་པའི་རྒྱུད་རིམ། དེ་བཞིན་རྒྱལ་པོ་ཚང་དབང་ཐང་ཡང་སྐྱར་དར་མགོ་ཚུགས་སོང་ན། སྐབས་དེར་ལོ་ངམ་གྱི་ཕྱོགས་གཏོགས་སྡོད་བཟོད་མི་བདེ་བའི་ལྕེབས་བཟུང་བསད་ཅིང་བཙོན་འཇུག་སོགས་བྱས་པས། སྡེ་དུད་སླར་བཙན་པའི་མངའ་རིས་སུ་དབང་དུ་བསྡུས་ལུགས། རྒྱལ་སྲིད་ཀྱི་དབང་ཐང་གྱེན་དུ་འཕྱུར་མགོ་ཚུགས་སོང་བས་གཅེན་ཤ་ཁྲི་དགའ་སྐྱོ་འདྲེས་མའི་མགུར་གླུ་བླངས་པའི་གནས་ལུགས་སོགས་གསལ་ཡོད། ༣རྒྱལ་པོའི་ཕྱོགས་གཏོགས་ནས་ཐབས་ཤེས་ཡོད་རྒུ་བཏོན་ཏེ། མཐའ་དོན་ལ་ཁྱི་ཞིག་གི་སྤུ་ལ་མོན་དུག་སྦྱར་ནས་ལོ་ངམ་བསད་ཐུབ་པའི་རྒྱལ་པོ་ཚང་གིས་ཤ་ལན་ལོན་ཚུལ་གསལ་ཡོད་པ་རེད། གཞན་ཡང༌། ལེའུ་ཚན་དེའི་ནང་དུ། ཡིད་ཆེས་དཀའ་བའི་ལྷ་སྒྲུང་ལྟ་བུའང་མི་ཉུང་བ་ཞིག་བཤད་ཡོད། དཔེར་ན། གྲི་གུམ་བཙན་པོ་བཀྲོངས་སྟངས་ཀྱི་སྐོར་དང༌། རུ་ལ་སྐྱེས་ཀྱིས་གྲི་གུམ་བཙན་པོའི་པུར་སྒམ་བླུ་ཡོན་ལ་མིའི་མིག་བྱ་མིག་ལྟར་འོག་ནས་ཡས་འགེབས་ཅན་མི་སྲིད་པ་ལྟ་བུ་ཞིག་དགོས་པའི་ཆ་རྐྱེན་བཏོན་པ་ལྟར། དེ་བཞིན་དུ་འཚོལ་དུ་སོང་བ་ལའང་དེ་ལྟ་བུ་ཞིག་རྙེད་ཅིང་དེས་པུར་སྒམ་བླུས་པའི་གནས་ལུགས་ཡ་ཚན་ཆེ་བ་མང་དུ་གསལ་ཡོད་པ་དེ་དག་རེད། ༑ འདིའི་ཐད་དུ་ཏུན་ཧོང་ཡིག་ཆ་དང་མི་འདྲ་ས་ཞིག་ལ། ཆོས་འབྱུང་མཁས་དགའ་སོགས་ལས། ལོ་ངམ་གྱིས། ལྕམ་སྲིང་བཞི་ཡི་ཡུམ་ལ་རྟ་རྫི་བཅོལ། །རྟ་འཚོལ་ཕྱིན་ཏེ་གཉིས་ལོག་རྨི་ལམ་དུ། །མི་དཀར་མཛེས་པ་ཞིག་དང་བཤོས་པ་རྨིས། །སད་ཚེ་གཡག་དཀར་ཞིག་ནི་སོང་བ་མཐོང༌། །ཟླ་བ་ཚང་ནས་ཁྲག་རླངས་འགུལ་བ་བཙས། །འབྲོང་རུ་དྲོན་མོར་བཅུག་ནས་འོ་མས་བྲན། །དྲོད་ཀྱིས་བཙོས་པས་དེ་ཡི་ནང་ནས་ནི། །ཁྱེའུ་མཛེས་ཤིང་ལྟ་ན་སྡུག་པ་བྱུང༌། །རུ་ལས་སྐྱེས་དང་ངར་སོས་པོ་ཞེས་བཏགས། །ཞེས་གསལ་བ་ལྟར། རང་རེའི་ལོ་རྒྱུས་ཕལ་མོ་ཆེར་རུ་ལ་སྐྱེས་ཞེས་པ་འདི་ཉིད་རྒྱལ་པོ་གྲི་གུམ་བཙན་པོའི་བཙུན་མོ་དང་ཡར་ལྷ་ཤམ་པོའི་སྤྲུལ་པ་གཉིས་འདུས་པ་ལས་བྱུང་བར་བཤད། བཤད་སྒྲོས་དེ་ལ་བལྟས་ན། རུ་ལ་སྐྱེས་ནི་ལྷ་ཡར་ལྷ་ཤམ་པོ་དང་གྲི་གུམ་བཙན་པོའི་བཙུན་མོ་གཉིས་འདུས་པ་ལས་བྱུང་བ་ལྟ་བུ་བསམས་འདུག་ན། མི་དང་མི་མིན་གཉིས་འདུས་པ་ལས་མིའུ་བཙས་ཏེ། རླབས་ཆེན་གྱི་བྱ་གཞག་འདི་འདྲ་བསྒྲུབས་པ་ནི་བྱུང་མིན་གྱི་དཔེ་དང་མཚུངས་ཤིང༌། དེ་ལ་ཞིབ་ཏུབ་བསམས་ན། ལྷ་ཡར་ལྷ་ཤམ་པོ་ཡིན་པར་འདོད་པའི་མི་དཀར་མཛེས་པ་ཟེར་བ་དེ་ནི་དོན་དམ་ལ་བློན་པོ་ལོ་ངམ་ཡིན་པ་འཁྲུལ་མེད་རེད། ཅིའི་ཕྱིར་ཞེ་ན། ལོ་ངམ་གྱིས་གྲི་གུམ་བཀྲོངས་རྗེས་གྲི་གུམ་གྱི་བཙུན་མོ་རང་ཉིད་ཀྱི་རྟ་རྫི་ལ་དབང་དུ་བསྒྱུར་སོང་ཞིང༌། དེའི་རྗེས་སུ་གྲི་གུམ་གྱི་བཙུན་མོར་བུ་ཞིག་ཀྱང་སྐྱེས་པ་དང༌། དེའི་ཐད་ཕ་ཡར་ལྷ་ཤམ་པོ་ལ་ཁ་འདོགས་བྱེད་དགོས་བྱུང་བའི་གནས་ལུགས་ཀྱིས་སོ། །དེ་ཡང་ཕ་ཡར་ལྷ་ཤམ་པོ་ལ་ཁ་འདོགས་བྱེད་དགོས་དོན་ཅི་ཞེ་ན་རྒྱུ་མཚན་གཉིས་ཏེ། དང་པོ། ལོ་ངམ་གྱི་ཕྱོགས་ནས་ཕ་ལོ་ངམ་རང་ཉིད་ཡིན་པར་ཁས་བླངས་ན། ལོ་ངམ་རང་ཉིད་ཀྱི་དབང་དུ་ཚ་ཚ་འུར་འུར་དུ་འདུ་བཞིན་པའི་མི་མང་རྣམས་ཀྱིས་ལྟ་སྟངས་སྡུག་ཏུ་འགྲོ་ཉེན་ཡོད་པ་དང༌། ལོ་ངམ་རང་ཉིད་ཀྱང་རང་གི་དགྲ་ཟླའི་ཕྱོགས་སུ་རིགས་རྒྱུད་བཙས་ན་ངོ་ཚ་དང་རིན་ཐང་ཆུང་ཞིང་མི་མང་གྱེན་ལངས་བྱེད་པའི་ཉན་ཁ་ཡོད་པ། ལོ་ངམ་རང་ཉིད་སྟོབས་འབྱོར་དབང་ཐང་ཆེ་བའི་སྐབས་དེར་དགྲ་ཕྱོགས་དང་འབྲེལ་བའི་ཕྲུ་གུ་བདག་བྱ་འདོད་མེད་པ་ཡིན་ཚོད་རེད། དེ་བཞིན་དཔེ་མཚོན་ཡོད་དེ། ས་སྐྱའི་སྐབས་སུ་བདག་ཉིད་ཆེན་པོ་བཟང་པོ་དཔལ་གཡོག་མོ་ཞིག་ལ་འཁྲུངས་པའི་རྒྱུ་མཚན་གྱིས་བདག་མ་བྱས་ནས་རྒྱ་ནག་ཏུ་སྤྱུགས་པ་ལྟ་བུ་ཡོད། གཉིས་པ། གྲི་གུམ་བཙུན་མོའི་ཕྱོགས་ནས་བཤད་ནའང༌། རྒྱལ་པོ་ཚང་གི་སྲིད་དབང་བཅོམ་མཁན་དང༌། རྒྱལ་སྲས་རྒྱང་ཕུད་དུ་གཏོན་མཁན། ལྷག་པར་རང་ཉིད་ཀྱི་ཟླ་བོ་བཀྲོངས་མཁན་གྱི་རིགས་རྒྱུད་ཅིག་ཕྲུ་གུའི་ཕ་ཡིན་ལུགས་འགྲེལ་ན་དགྲ་གཉེན་གཉིས་ཀའི་སྤྱི་ཚོགས་ནས་མ་བུ་གཉིས་རང་བཞིན་གྱིས་བུད་འགྲོ་བའི་ཉེན་ཁ་ཆེན་པོ་ཡོད་པ་ཟད། མ་བུ་གཉིས་ཀའི་ཚེ་སྲོག་ཀྱང་ཐོན་རྒྱུ་དཀའ་མོ་ཡིན་པ་དང༌། རུ་ལ་སྐྱེས་ཀྱི་ཕ་ལོ་ངམ་ཡིན་པའི་སྔར་ནས་བརྡ་སྤྲད་དེ་ཚར་ལོང་བྱུང་ན་མའི་བསམ་འདུན་བཞིན་རྒྱལ་སྲིད་སླར་གསོ་ལའང་ཐེ་ཚོམ་ཆེན་པོ་ཡོད་པ་སོགས་ཀྱིས་རུ་ལ་སྐྱེས་ཀྱི་ཕ་ནི་རྟོག་བཟོ་ལྷ་སྒྲུང་ལྟ་བུའི་ཡར་ལྷ་ཤམ་པོ་ལ། མ་བྱས་ཁ་འདོགས་བྱེད་དགོས་ཤར་ཡོད་ངེས་རེད་སྙམ།
འཕྲོས་འདོན་ཐེངས་རྗེས་མར་གཟིགས།      ས་རཱ་མཐོ་སློབ། ངག་དབང་བྱམས་པས།