དབུ་མེད་ཚུགས་རིང་དང༌། ཚུགས་ཐུང༌། འབྲུ་ཚ། ཚུགས་མ་འཁྱུག འཁྱུག་ཡིག་བཅས་རིགས་ལྔ་ནི་དེ་སྔོན་བོད་ཀྱི་གཞུང་སྒེར་སློབ་གྲྭ་ཁག་ནས་ཆེད་སྦྱོང་ཡིག་འབྲིའི་སློབ་ཚན་གཙོ་བོ་ཡིན་པར་བརྟེན་དེང་སྐབས་ཀྱང་དེ་དག་གི་ལག་ལེན་སྦྱོང་བརྡར་ཐོན་པའི་ཡིག་མཁན་མཁས་ཅན་རྒན་དར་གཞོན་གསུམ་མང་པོ་འཚོ་བཞུགས་གནང་ཡོད་པས་ལག་ལེན་གྱི་སྲོལ་རྒྱུན་གོང་འཕེལ་དུ་འགྲོ་འགོ་ཚུགས་ཡོད་རུང༌།

རིག་གནས་སློབ་གསོ་དང་རིག་གཞུང་གོང་འཕེལ་ཐད། བོད་ལྗོངས་ནི་མི་རིགས་རང་སྐྱོང་ས་ཁུལ་ཞིག་ཡིན་པས། བོད་ཀྱི་སྐད་ཡིག་ངེས་པར་དུ་གཙོ་བོར་སྦྱོང་དགོས་པ་དང༌། དེ་བཞིན་དུ་རྒྱུའི་སྐད་ཡིག་སྦྱངས་ཏེ། བོད་མི་རྣམས་ཀྱིས་ཐད་ཀར་རྒྱ་ཡིག་ཐོག་ནས་གསར་བརྗེའི་གཞུང་ལུགས་སོགས་ཡིག་ཆ་མང་པོ་ལྟ་ཀློག་དང་སློབ་སྦྱོང་བྱེད་བདེའི་ཆེད། བོད་རྒྱ་ཕན་ཚུན་ཕྱོགས་གཉིས་པོས་སྐད་ཡིག་ཐོག་ནས་གོ་ཤེས་མ་ཐུབ་པའི་དཀའ་ངལ་སེལ་རྒྱུ་ནི་གལ་ཆེན་པོ་རེད། ད་ལྟ་བོད་ལྗོངས་ཀྱི་སློབ་གྲྭ་འབྲིང་ཆུང་གིས་ཀྱང་དེ་ལྟར་བྱེད་བཞིན་ཡོད། འོན་ཀྱང་ཀྲུང་དབྱང་ནས་ས་གནས་བར་གྱི་སློབ་གྲྭ་ཁག་དང༌། ལས་ཁུངས། རྩོམ་བསྒྱུར་སྡེ་ཚན་ནང་རང་ཉིད་མཁས་རློམས་ཀྱིས་ང་ཚོའི་བོད་ཡིག་ལ་གང་བྱུང་དུ་ལེགས་ཉེས་དབྱེ་ཁུལ་གྱིས། བོད་ཡིག་ལ་ཐ་སྙད་གསར་པས་མི་འདང་བར་ཁ་གཡར་ཏེ། བོད་ཡིག་ནི་སྐད་ཡིག་ཞན་གྲས་ཡིན་པ་དང༌།