The Tibet Express

འདི་ལོའི་སྔགས་ཀྱི་རྩོད་རྒྱུགས་ཆེན་མོའི་ཨང་དང་པོ་སེར་སྨད་དགེ་བཤེས་ཧར་ཤན་སྤྲུལ་སྐུ་དང། ཨང་གཉིས་པ་དགའ་ལྡན་ཤར་རྩེ་དགེ་བཤེས་བྱང་ཆུབ་སངས་རྒྱས། ཨང་གསུམ་པ་དགའ་ལྡན་ཤར་རྩེ་དགེ་བཤེས་བྱམས་པ་བློ་བཟང་བཅས་སྔགས་ཀྱི་རྩོད་རྒྱུགས་ཀྱི་རྩེ་ཕུད་སོན་པའི་གསལ་བསྒྲགས་གནང་ཡོད་འདུག
འབྲེལ་ཡོད་ཀྱིས་འདི་གར་གནས་ཚུལ་མཁོ་སྤྲོད་གནང་བ་ལྟར་ན། ཟླ་འདིའི་ཚེས་༡༢ ནས་བཞུགས་སྒར་དྷ་སའི་ཉེ་འགྲམ་རྒྱུད་སྟོད་གྲྭ་དུ་སྔགས་ཀྱི་རྩོད་རྒྱུགས་ཆེན་མོ་འཚོགས་ཡོད་པ་དང། རྩོད་རྒྱུགས་དེ་༧རྒྱལ་དབང་སྐུ་ཕྲེང་བཅུ་གསུམ་པ་ཆེན་པོ་ཆོག་གིས་སངས་རྒྱས་པའི་བསྟན་པ་དག་ཐེར་ཡོང་སླད་རྨད་དུ་བྱུང་བའི་མཛད་རྗེས་ཇི་རྙེད་ཅིག་མཛད་ཡོད་པ་ལས། གདན་ས་ཆེན་པོ་སེ་འབྲས་དགའ་གསུམ་གྱི་དགེ་བཤེས་ལྷ་རམས་པ་རྣམས་སྔགས་ཀྱི་རྩོད་རྒྱུགས་བཞེས་ཏེ་ཨང་རིམ་དང་པོ་དང་གཉིས་པ་རྣམས་རིམ་པས་རྒྱུད་གྲྭ་སྟོད་སྨད་གཉིས་ཀྱི་མཁན་བླ་དང། ཤར་བྱང་གཉིས་ཀྱི་ཆོས་རྗེ། དགའ་ལྡན་ཁྲི་རིན་པོ་ཆེར་ཕེབས་རྒྱུར་ལམ་སྲོལ་གསར་བཏོད་མཛད་པ་བཞིན། གཞུང་ས་དགའ་ལྡན་ཕོ་བྲང་ནས་ལོ་བརྒྱད་རེའི་མཚམས་སུ་སྔགས་ཀྱི་རྩོད་རྒྱུགས་ཆེན་མོ་ཏེ་བཞེས་སྲོལ་ཡོད་འདུག
བཙན་བྱོལ་དུ་འབྱོར་རྗེས་རྒྱལ་དབང་སྐུ་ཕྲེང་བཅུ་བཞི་པ་ཆེན་མོ་མཆོག་གིས་བཞུགས་སྒར་དུ་གདན་སའི་དགེ་བཤེས་བགྲེས་གྲས་རྣམས་སྔགས་ཀྱི་རྩོད་རྒྱུགས་བཞེས་གནང་གིས་ཕྱི་༢༠༠༤ ནས་ལོ་གསུམ་རེའི་མཚམས་སུ་རྩོད་རྒྱུགས་བཞེས་གནང་མཛད་ཡོད། དེ་གའི་ལོ་མཇུག་ཏུ་༧གོང་ས་སྐྱབས་མགོན་ཆེན་པོ་མཆོག་དབུ་བཞུགས་ཐོག་སྔགས་ཀྱི་རྩོད་རྒྱུགས་ཐེངས་དང་པོ་གནང། ༢༠༠༧ ལོར་ཐེངས་གཉིས་པ་དང། འདི་ལོར་ཐེངས་གསུམ་པ་ཟླ་འདིའི་ཚེས་༡༢ ནས་དཔལ་ལྡན་རྒྱུད་སྟོད་གྲྭ་ཚང་གི་གཙུག་ལག་ཁང་དུ་དཔལ་རྒྱལ་དབང་ཀརྨ་པ་མཆོག་དབུ་བཞུགས་ཐོག་གདན་ས་ཆེན་པོ་སེ་འབྲས་དགའ་གསུམ་གྱི་མཁན་རིན་པོ་ཆེ་རྣམ་པ་དང། རྒྱུད་པའི་མཁན་བླ་བཅས་ཀྱིས་རྩོད་པ་དང་གདན་ས་གསུམ་གྱི་དགེ་བཤེས་ལྷ་རམས་པ་སུམ་ཅུ་ལྷག་གིས་སྔགས་ཀྱི་རྩོད་རྒྱུགས་ཆེན་མོ་རྒྱུགས་ཕུལ་ལེགས་པར་ཞུས་ཡོད་པ་རེད། ཉིན་མཐའ་མའི་མཛད་སྒོའི་ཐོག་རྒྱུད་སྟོད་གྲྭ་ཚང་གི་མཁན་རིན་པོ་ཆེ་རྣམ་གཉིས་ནས་བཀའ་སློབ་གནང་རྗེས། འདི་ལོའི་སྔགས་ཀྱི་རྩོད་རྒྱུགས་ཆེན་མོའི་ཨང་དང་པོ་སེར་སྨད་དགེ་བཤེས་ཧར་ཤན་སྤྲུལ་སྐུ་དང། ཨང་གཉིས་པ་དགའ་ལྡན་ཤར་རྩེ་དགེ་བཤེས་བྱང་ཆུབ་སངས་རྒྱས། ཨང་གསུམ་པ་དགའ་ལྡན་ཤར་རྩེ་དགེ་བཤེས་བྱམས་པ་བློ་བཟང་བཅས་སྔགས་ཀྱི་རྩོད་རྒྱུགས་ཀྱི་རྩེ་ཕུད་སོན་པའི་གསལ་བསྒྲགས་དང། རང་གཞུང་ཆོས་རིག་ལས་ཁུངས་དང་དཔལ་ལྡན་རྒྱུད་སྟོད་གྲྭ་ཚང་ནས་རྒྱུགས་སྤྲོད་པ་ཡོངས་ལ་ལེགས་སྐྱེས་གསོལ་རས་དང། དགེ་བཤེས་སྔགས་རིམ་པའི་ཕྱག་ཁྱེར་གསོལ་རྩལ་མཛད་ཡོད་པ་རེད།།