The Tibet Express

ཟླ་འདིའི་ཚེས་༡༨ ཉིན་གྱི་ཕྱི་དྲོ་དང་ཚེས་༡༩ ཉིན་གྱི་སྔ་དྲོ་༧གོང་ས་མཆོག་གི་གསུང་འཕྲིན་སྐོར་ལ་ཉན་ཞིབ་ཀྱི་ལྷན་ཚོགས་དེ་གནང་བ་དང་ཚང་མང་དགོངས་ཚུལ་དང་དོགས་འདྲིའི་རིགས་ལ། ༧གོང་ས་མཆོག་གི་སྐུ་ཚབ་རྣམ་གཉིས་དང། བཀའ་བློན་ཁྲི་པ་ཟམ་གདོང་རིན་པོ་ཆེ་བཅས་ཀྱིས་ལན་འདེབས་གསལ་བཤད་གནང་རྗེས། བོད་མི་མང་སྤྱི་འཐུས་ཚོགས་གཙོ་སྤེན་པ་ཚེ་རིང་མཆོག་གིས་ཉན་ཞིབ་ལྷན་ཚོགས་དེའི་ཐོག་དོན་དག་ཚང་མ་གསལ་བོ་ཆགས་པ་ལ་ངོས་འཛིན་ བྱེད་ཀྱི་ཡོད་ཅེས་མཇུག་བསྡོམས་གནང་ཡོད་པ་རེད། གྲོས་ཚོགས་ནང་དེའི་སྐོར་ལ་གྲོས་ཆོད་ཅིག་ཀྱང་འཇོག་འཆར་ཡོད་པ་རེད། 
བོད་མི་མང་སྤྱི་འཐུས་ལྷན་ཚོགས་ཀྱི་གྲོས་ཚོགས་ཚོགས་དུས་དགུ་པའི་ཐོག་༧གོང་མཆོག་གིས་གསུང་འཕྲིན་ཞིག་གནང་བའི་ནང་འཁོད་དོན། “གོང་སྨོས་རྣམས་གྲོས་ཚོགས་ཀྱི་སྤྱི་མོས་གྲོས་ཆོད་སྔ་རྗེས་ཀྱི་འབྲུ་དོན་ལྟར་ངོས་ནས་ལྷག་བསམ་ཟོལ་མེད་ཀྱིས་འབད་འབུང་བྱེད་ཁུལ་ཡང། བསམ་འཆར་དང་འགྲེལ་བརྗོད་དེ་དག་གྲོས་ཚོགས་ནས་མོས་མཐུན་མ་བླངས་པའམ། གྲོས་ཚོགས་ལ་མ་བསྟན་པའི་ཡིག་ཆ་ཡིན་ཚུལ་དང། ངོས་ཀྱི་བསམ་ཚུལ་མིན་ཚུལ་སོགས་ཀྱི་དོགས་གླེང་རིགས་ཡོང་གི་ཡོད་ཚོད་འདུག་པས། རྩ་དོན་དང་འབྲེལ་བའི་གནད་དོན་འདི་རིགས་ཕྱི་གསལ་ནང་གསལ་མ་བྱུང་བར་མང་ཚོགས་སུ་ཐེ་ཚོམ་སྐྱེ་གཞིར་གནས་པས་ད་རེས་ཚོགས་འདུ་འདིའི་རིང་བགྲོ་གླེང་མཐིལ་ཕྱིན་དང། དེ་བཞིན་བཀའ་ཤག་དང་ངོས་ཀྱི་སྐུ་ཚབ་སྦྲེལ་པོ། གཞན་ཡང་འབྲེལ་ཡོད་ཇི་འོས་རྣམས་ལ་ཉན་ཞིབ་དོགས་འདྲི་འཁྲུན་ཆོད་བྱས་ཏེ་གསལ་པོ་བཟོ་དགོས་”ཞེས་འཁོད་ཡོད་པ་རེད།
གསུང་འཕྲིན་དེ་གཞིར་བཟུང་གིས་ཉན་ཞིབ་ལྷན་ཚོགས་དེ་གནང་བ་ཞིག་ཡིན་པ་དང། དེའི་སྐབས་རྒྱ་ནག་ལ་སྤྲོད་པའི་ས་གནས་མི་རིགས་ས་གནས་རང་སྐྱོང་སྐོར་གྱི་ཡིག་ཆ་དེ་དགོངས་ས་མཆོག་གི་དགོངས་ཚུལ་དང་མི་མཐུན་པའི་སྐོར་གསུང་མཁན་སྤྱི་འཐུས་གཉིས་ཙམ་བྱུང་ཡོད་པ་དང། དེ་བཞིན་ཡིག་ཆ་དེ་༧གོང་ས་མཆོག་གི་དགོངས་གཞི་ལྟར་གཏན་འབེབས་ཀྱིས་རྒྱ་ནག་ལ་སྤྲད་པ་ཞིག་ལ་ངོས་འཛིན་ཡིད་ཆས་བྱེད་ཀྱི་ཡོད་ཀྱང། དེའི་གྲུབ་འབྲས་གང་ཡང་ཐོན་མི་ཐུབ་པས། ཡིག་ཆ་དེར་འགྱུར་བ་དགོས་སྐོར་གསུང་མཁན་ཡང་ཁག་ཅིག་བྱུང་ཡོད་ནའང། དོགས་འདྲི་དང་བསམ་ཚུལ་གསུང་མཁན་མང་ཆེ་བའི་ཡིག་ཆ་དེ་༧གོང་ས་མཆོག་གི་དགོངས་གཞི་དང་མཐུན་པ་མ་ཟད། མ་འོངས་པར་དེའི་༧གོང་ས་མཆོག་གི་དགོངས་གཞི་ལྟར་ཤར་བསྐྱོད་དགོས་སྐོར་གསུངས་ཡོད་པ་རེད། །