ཕྱི་ཟླ་༨ ཚེས་༦ ཉིན་ཆུ་སྤྲིན་བརྡོལ་བ་ལས་བྱུང་བའི་ལ་དྭགས་སླེ་ས་ཁུལ་དུ་ཆུ་ལོག་གི་གནོད་འཚེ་ཚབས་ཆེན་བྱུང་སྟེ། དེ་གའི་ཡུལ་མི་དང་སྤྲོ་འཆམ་པ་གང་མང་ཞིག་རྐྱེན་འདས་སུ་ཕྱིན་པ་དང་མང་དག་ཅིག་ལ་རྨས་སྐྱོན་བྱུང་ཡོད་པ་རེད། དེ་བཞིན་ཡུལ་མི་མང་པོར་ཁང་ཁྱིམ་དང་ཅ་དངོས་སོགས་གང་ཡང་མེད་པའི་གནས་སྟངས་སྐྱོ་པོ་གྱུར་པ་རྣམས་ལ། འདི་ག་མོན་གྷོ་ས་དགོན་བརྩེ་ཆེན་མདོ་སྔགས་ཆོས་གླིང་གི་འཇར་མན་(INITIATIVE OBERLAND) རོགས་ཚོགས་ཀྱི་ཚོགས་གཙོ་ལྕམ་སྐུ་(MRS. ANGELIKA RAHIM LECHEL) མཆོག་དེ་གར་སྤྲོ་འཆམ་ལ་བསྐྱོད་སྐབས་དོན་རྐྱེན་དེ་ལྟར་བྱུང་བ་མངོན་གསལ་མིག་མཐོང་བྱུང་བར་བརྟེན།
ཡ་ང་བའི་ཆགས་འཇིག་གི་གནས་སྟངས་དེར་ཚོགས་གཙོ་གཙོས་ཚོགས་མི་ཡོངས་ཀྱི་ཕན་གྲོགས་རོགས་རམ་བྱ་རྒྱུའི་ཐག་གཅོད་གནང་བ་བཞིན། ཕྱི་ཟླ་༨ ཚེས་༢༧ དང་༣༡ ཉིན་གཉིས་རིང་འདི་གའི་གྲྭ་ཚང་གི་འཇར་མན་རོགས་ཚོགས་བརྒྱུད་གདུང་སེམས་མཉམ་བསྐྱེད་མཚོན་ཆེད་དུ་ཧིན་སྒོར་འབུམ་༦༠༠༠༠༠ ཐམ་པས་དངོས་ཡོད་གནས་སྟངས་སྐྱོ་པོ་ཆགས་པའི་ཉམ་ཐག་ཡུལ་མི་རྣམས་ལ་བཟའ་བཅའ་དང་གྱོན་ཆས་སོགས་ཞལ་འདེབས་སུ་ཕུལ་ཡོད་སྐོར་མོན་གྷོ་ས་དགོན་བརྩེ་ཆེན་མདོ་སྔགས་ཆོས་གླིང་གི་དྲུང་ཡིག་ཚེ་བརྟན་རྡོ་རྗེ་ནས་མཁོ་སྤྲོད་གནང་སོང་།།
མོན་གྷོ་གསར་འགོད་པས།
