དེ་རིང་ཕྱི་དྲོ་བོད་མི་མང་སྤྱི་འཐུས་ལྷན་ཚོགས་སྐབས་བཅུ་བཞི་པའི་གྲོས་ཚོགས་ཚོགས་དུས་༡༠ པའི་ནང་བཅའ་ཁྲིམས་བསྐྱར་བཅོས་ཀྱི་ཁྲིམས་འཆར་ཞིག་སླེབས་པ་དང། དེ་སྔོན་བཅའ་ཁྲིམས་ནང་ཨ་རི་དང། ཁེ་ཎ་ཌ་ཁུལ་གནས་སྡོད་བོད་མིའི་ཁོངས་ནས་འོས་བསྡུ་བྱས་པའི་སྤྱི་འཐུས་གཅིག་ཡོད་པ་དང་། དེ་རིང་སྤྱི་མོས་ཀྱིས་བསྐྱར་བཅོས་བྱས་པའི་ནང་དུ་བྱང་ཨ་རིའི་ཁུལ་གནས་སྡོད་བོད་མིའི་ཁོངས་ནས་འོས་བསྡུ་བྱས་པའི་སྤྱི་འཐུས་གཉིས་འདེམས་བསྐོ་བྱ་རྒྱུའི་བཅའ་ཁྲིམས་བསྐྱར་བཅོས་གནང་ཡོད་པ་རེད།
དེའི་སྐོར་ལ་ཨ་རིའི་སྤྱི་འཐུས་བསྟན་འཛིན་ཆོས་ལྡན་ལགས་ནས་ཤར་ཨ་རི་ཁུལ་དུ་གནས་སྡོད་བོད་མིའི་ཁོངས་ནས་འོས་བསྡུ་བྱས་པའི་སྤྱི་འཐུས་གཅིག་དང་། (ཤར་ཨ་རི་ནི་ཨ་རིའི་མངའ་སྡེ་མི་ནི་སོ་ཊ་གཙོས་པའི་ཤར་ལྷོའི་མངའ་སྡེ་ཡོངས་རྫོགས་སུ་གཏོགས)ནུབ་ཨ་རི་དང་། ཁེ་ན་ཌ་གནས་སྡོད་བོད་མིའི་ཁོངས་ནས་འོས་བསྡུ་བྱས་པའི་སྤྱི་འཐུས་གཅིག་ཅེས། ཨ་རིའི་ཤར་ནུབ་ཀྱི་དབྱེ་བ་ཕྱེ་དགོས་པའི་བཟོ་བཅོས་གྲོས་འཆར་ཞིག་ཕུལ་སོང་ཡང་། རྒྱབ་སྐྱོར་མ་ཐོབ་པར་གོང་དུ་བཀོད་པ་བཞིན་བྱང་ཨ་རིའི་ཁུལ་དུ་སྔར་ཡོད་སྤྱི་འཐུས་ཀྱི་ས་མིག་གཅིག་གི་ཐོག་སླར་ཡང་ས་གཅིག་བསྣན་ནས་སྤྱི་འཐུས་གཉིས་ཀྱི་ས་མིག་བཟོས་ཡོད་པ་ལས། ད་ཡོད་ཨ་རིའི་སྤྱི་འཐུས་ཀྱི་དགོངས་ཚུལ་ལྟར་ཤར་ནུབ་ཀྱི་དབྱེ་བ་ལོགས་སུ་ཕྱེ་མེད་པ་རེད།།
