ཀིརྟི་བྱེས་པ་གྲྭ་ཚང་གི་གྲྭ་ཚེ་རིང་ལགས་ཀྱིས་གནས་ཚུལ་མཁོ་སྤྲོད་བྱས་པ་ལྟར་ན། ཕྱི་ལོ་༢༠༡༠ ཟླ་༨ ཚེས་༡༠ ཉིན་ཚོ་བདུན་ཀིརྟི་དགོན་པའི་ཆོས་ལུགས་དོ་དམ་ཁང་གི་འགན་འཛིན་གྲྭ་སོ་དར། རང་ལོ་༣༨ ཡས་མས་ཤིག་ཡིན་པ་ཁོང་མཛོད་དགེ་རྫོང་ཐོག་གི་རླངས་འཁོར་འབབ་ཚིགས་ནས་ཞོགས་ཀའི་དུས་ཚོད་༦ ཙམ་ལ་རྒྱ་གཞུང་གིས་འཛིན་བཟུང་བཀག་ཉར་བྱས་འདུག ཁོང་གི་ཕ་ཡུལ་ཁྱུང་ཆུ་རྫོང་ཁོངས་ཚ་རུ་མ་ནས་ཡིན། དེ་མིན་ཚོ་བདུན་ཀིརྟི་དགོན་པའི་ཆོས་ལུགས་དོ་དམ་ཁང་གི་ལས་བྱེད་ཚོ་བདུན་ཏེ་ཙིས་སྡེ་བ་ཡིན་པའི་གྲྭ་དར་རྒྱས། རང་ལོ་༢༦ ཙམ་ཡིན་པ་ཁོང་ཕྱི་ཟླ་༨ ཚེས་༡༡ ཉིན་འབར་ཁམས་རྫོང་ཐོག་ནས་འཛིན་བཟུང་བཀག་ཉར་བྱས་འདུག ཁོང་གཉིས་འཛིན་བཟུང་བཀག་ཉར་བྱས་རྗེས་འབར་ཁམས་རྫོང་དང་རྔ་པ་ཁུལ་སོགས་ཀྱི་འབྲེལ་ཡོད་ལས་ཁུངས་ཁག་ལ་རྩད་གཅོད་བྱས་ཀྱང་གང་དུ་བཀག་ཉར་བྱས་ཡོད་མེད་ཙམ་གྱི་གནས་ཚུལ་ཡང་ཤེས་རྟོགས་བྱུང་མེད།
