འོད་ཟེར་པོད་ཁུག་ལས་ནགས་ཤོད་སད་མིས་བོད་བསྒྱུར་བྱས།
བོད་ལྗོངས་གསོ་རིག་སློབ་གླིང་སློབ་ཐོན་སློབ་མ་བརྒྱ་ཁ་ལྷག་ཅིག་གིས་བོད་རང་སྐྱོང་ལྗོངས་ཀྱི་སྒོ་ཁ་ནས་ངག་བཅད་ངོ་རྒོལ་བྱས་འདུག བོད་ལྗོངས་གསོ་རིག་སློབ་གླིང་གི་སློབ་ཐོན་སློབ་མ་རེ་གཉིས་པའི་གཞུང་ལས་པ་ཡར་བསྡུའི་གྲངས་འབོར་ཆེས་ཉུང་བས་༢༠༡༠ ལོའི་ཟླ་བ ༩ པའི་ཚེས ༢ ཕྱི་དྲོ་ཆུ་ཚོད ༤ པར་སློབ་མ་ཚོས་རྒྱལ་དར་ཆུང་ཆུང་ཞིག་ཐོགས་ཏེ་ལྗོངས་མི་དམངས་སྲིད་གཞུང་གི་སྒོ་ཆེན་འགྲམ་ནས་ངོ་རྒོལ་བྱས་འདུག
༢༠༡༠ ལོའི་ཟླ་བ ༨པའི་ཚེས ༣༡ ཉིན། འདི་ལོའི་གཞུང་ཞབས་ལས་མི་ཡར་བསྡུའི་མིང་གཞུང་ཕྱིར་བསྒྲགས་བྱས་རྗེས། ལོ་འདིར་ཁོང་ཚོའི་སློབ་གྲྭར་གསོ་རིག་ཆེད་སྦྱོང་ཐུབ་པའི་བོད་ཀྱི་ལྷ་རྗེ ༡༧% ལས་བསྡུ་འཆར་མེད་པ་དང་། ༨༣% གྱི་གསོ་རིག་སློབ་མའི་མིང་གཞུང་མར་ཟགས་ཡོད་པ་རེད། དོན་འདི་མི་ལོ་ལྔ་ཏག་ཏག་སློབ་ཆེན་འགྲིམས་པའི་ཁོང་ཚོར་འདྲ་སྙོམ་བྱུང་མེད་པས་ཁོང་ཚོས་དེ་དོན་གོང་རིམ་ལ་ཡར་ཞུ་བྱས།
གནད་དོན་འདིས་ཟླ་བ་ ༩ པའི་ཚེས་ ༡ ནས་བོད་ལྗོངས་གསོ་རིག་སློབ་མ་རྣམས་མཉམ་སྡེབས་ཀྱིས་སློབ་གྲྭའི་དབུ་ཁྲིད་དང་། རྩ་འཛུགས་ལས་ཁང། འཕྲོད་བསྟེན་ལས་ཁང་བཅས་ལ་ཞུ་གཏུག་བྱས་ཀྱང་ཚོགས་འདུ་འཚོགས་ནས་སེམས་གསོའི་རྣམ་པ་ལྟ་བུས་རྒྱལ་ཁབ་ཀྱིས་ཁྱེད་ཚོར་ལས་
མེད་དུ་འཇོག་མི་སྲིད་ཟེར་བ་ཙམ་ལས་དོན་དངོས་ཀྱི་མིང་གཞུང་སྤར་སྣོན་ཅི་ཡང་བྱས་མེད། ཟླ་བ ༩ པའི་ཚེས ༢ ཕྱི་དྲོ་སློབ་མ་བརྒྱ་ལྷག་མཉམ་འདུས་ཀྱིས་འཕྲེད་དར་དཔྱངས་པ་དང་། ལག་ཏུ་རྒྱལ་དར་ཆུང་ཆུང་འགའ་ཁྱེར་ནས་བོད་ལྗོངས་མི་དམངས་སྲིད་གཞུང་གི་སྒོ་ཆེན་འགྲམ་དུ་ཁྲོམ་སྐོར་བྱས་འདུག
ཉེན་རྟོག་པ་མྱུར་སྟབས་ཀྱིས་སླེབས་བྱུང་། འཕྲེད་དར་ཕྲོགས་ཚར་སོང་། ལམ་འགྲོ་བ་ཚོས་མཐའ་ནས་བཏུམས་ཡོད། ཡུད་ཙམ་ནས་ཉེན་རྟོག་མི་སྣས་བཙན་དབང་གིས་སློབ་མ་ཚོ་ཞུ་གཏུག་སྣེ་ལེན་ཁང་དུ་དེད།
