ཉེ་ཆར་རྒྱ་གར་གྱི་མངའ་སྡེ་ཀ་ཤི་སྨིར་ཁུལ་ཏེ། རྒྱ་གར་བྱང་ཕྱོགས་ཀྱི་དམག་སྤྱི་སྐུ་ཞབས་བྷིའི་ཨེ་སི་ཇཱེ་སི་ཝོལ་རྒྱ་ནག་ཏུ་གཞུང་དོན་ཕྱོགས་བསྐྱོད་བྱེད་འཆར་ཡོད་ཀྱང། རྒྱ་ནག་གཞུང་གིས་ཁོང་ལ་ཐོངས་མཆན་ལག་ཁྱེར་མ་སྤྲད་པའི་རྐྱེན་གྱིས་རྒྱ་གར་གཞུང་གིས་རྒྱ་གར་དུ་བཅའ་སྡོད་རྒྱ་ནག་གི་གཞུང་ཚབ་སྐོང་འགུག་གིས་དེའི་སྐོར་ལ་ངོ་རྒོལ་གྱི་རྣམ་འགྱུར་བསྟན་ཡོད་པ་རེད།

ཟླ་འདིའི་ཚེས་༢༤ ཉིན་བྷི་བྷི་སིའི་གསར་འགོད་པས་བལ་ཡུལ་ནས་གནས་ཚུལ་སྤེལ་བ་ལྟར་ན། རི་བོ་ཇོ་མོ་གླང་མའི་ཉེ་འགྲམ་གྱི་ས་ཁུལ་ནས་བལ་ཡུལ་གྱི་རྒྱལ་ས་ཀཱ་ཐ་མན་ཌུ་ནང་འཕུར་མཁན་གནམ་གྲུ་ཆུང་བ་ཞིག ལམ་བར་དུ་བརྡབ་སྐྱོན་ཤོར་ནས། མི་གྲངས་༡༤ ཙམ་གར་སོང་ཆ་མེད་གྱུར་ཡོད་པ་རེད།

ཟླ་འདིའི་ཚེས་༡༡ ཉིན་རྒྱ་གར་གྱི་རྒྱལ་ས་ལྡི་ལི་གསར་པའི་ནང་། ༧གོང་ས་མཆོག་དང་རྒྱ་གར་གྱི་སྲིད་བློན་མན་མོ་ཧན་སིང་རྣམ་གཉིས་མཇལ་འཕྲད་གནང་བར། རྒྱ་ནག་གཞུང་གིས་༧གོང་ས་མཆོག་ཁ་བྲལ་རིང་ལུགས་པ་ཡིན་པས། རྒྱ་གར་གྱི་སྲིད་བློན་མཆོག་གིས་མཇལ་འཕྲད་ཞུས་པ་དེས། རྒྱལ་ཁབ་ཕྱོགས་གཉིས་ཀྱི་འབྲེལ་ལམ་ལ་གནོད་སྐྱོན་གཏོང་སྲིད་པ་རེད་ཅེས་ངོ་རྒོལ་བྱས་ཡོད་པ་རེད།

ད་ལྟའི་སྐབས་ཨི་རག་ནང་ཡོད་པའི་ཨ་རིའི་དམག་དཔུང་རྣམས། ༢༠༢༠ བར་དུ་ཨི་རག་ནང་མ་བསྡད་པ་ཡིན་ན། ཨི་རག་གི་དམག་དཔུང་ཁོ་ནས་ལུང་པ་འདི་སྲ་བརྟན་དང་ཞི་བདེའི་ངང་ནས་བདེ་སྲུང་བྱེད་རྒྱུ་ཧ་ཅང་ཁག་པོ་ཡིན་པས། ལོ་རྗེས་མར་ཨ་རིའི་དམག་དཔུང་ཆ་ཚང་བ་ཕྱིར་འཐེན་བྱེད་རྒྱུའི་འཆར་འགོད་དེ་ནི་སྔ་དྲགས་སོང་ཞེས། ཨི་རག་གི་དམག་སྤྱི་ཆེན་མོ་གྷན་བྷ་བྷ་ཁར་གྱིས་འགྲེལ་བརྗོད་བྱས་ཡོད་པ་རེད།

རྒྱ་གར་དང་པཱ་ཀི་སི་ཐན་གཉིས་དབར་ལོ་གྲངས་མང་པོའི་རིང་འཐབ་འཁྲུག་བྱས་ནས་གནས་ཡོད་པ་དང། འཚེ་བའི་ལས་འདི་ནི་མི་སུ་འདྲ་ཞིག་ལའང་ཕན་ཐོགས་མེད་པས། ང་ཚོའི་གཞུང་ངོས་ནས་གྲོས་མོལ་བྱེད་རྒྱུའི་གྲ་སྒྲིག་ཆ་ཚང་ཡོད་ཅེས། རྒྱ་གར་རང་བཙན་གྱི་ཉིན་མོ་མན་མཱོ་ཧན་སིན་མཆོག་གིས་གསུང་ཡོད་པ་རེད།

“ངས་འཛམ་གླིང་འདིའི་ཐོག་རང་བྱུང་གི་ཆག་སྒོ་བྱུང་བ་མང་པོ་མཐོང་མྱོང་ཡོད། ཡིན་ནའང་ད་ཐེངས་པཱ་ཀི་སི་ཐན་ནང་བྱུང་བའི་གཞི་རྒྱ་ཆེ་བའི་ཆུ་ལོག་གི་གནོད་འཚེ་འདི་འདྲ་བ་མཐོང་མྱོང་མེད། གནོད་འཚེ་ཕོག་ཡུལ་ས་གནས་མང་པོར་གནས་སྡོད་བྱེད་མཁན་མི་མང་ཚོར། རྒྱལ་ཚོགས་ངོས་ནས་རོགས་རམ་བྱེད་རྒྱུ་ཡིན་ལ། འཛམ་གླིང་གི་རྒྱལ་ཁབ་ཚང་མས་རོགས་རམས་བྱེད་དགོས་”ཞེས། དྲུང་ཆེས་གསུངས་ཡོད་པ་རེད།

ཟླ་འདིའི་ཚེས་༡༥ ཉིན་རྒྱ་ནག་རྒྱལ་ཡོངས་སུ་འབྲུག་ཆུ་ཁུལ་དུ་ཆུ་ལོག་གི་གནོད་འཚེ་ཚབས་ཆེན་བྱུང་བར་དམིགས་ནས་རྒྱ་ནག་གི་སྐར་ལྔའི་དར་དམར་ཕྱེད་ཙམ་ཕབ་ནས་མྱ་ངན་བྱས་ཡོད་པ་རེད།

 

འབར་མའི་ནང་ཆོས་ཀྱི་ལྟེ་གནས་ཤའི་ཝ་ཌ་གྷོན་ལྷ་ཁང་ནང་། ཆོས་ལུགས་ཀྱི་མཛད་སྒོ་ཆེན་པོ་ཞིག་འཚོགས་ཡོད་པ་དང། སྐབས་དེར་འབར་མའི་དམག་སྤྱི་ཆེན་མོས་སྲོལ་རྒྱུན་གྱི་འགྲོ་ལུགས་ལྟར། གླང་ཆེན་དཀར་པོ་ཞིག་ཞོན་ནས་ཆོས་ཀྱི་མཛད་སྒོར་ཞུགས་ཡོད་པས། མི་རྣམས་ཀྱིས་དམག་གཞུང་དབང་འཛིན་པས་འདི་ལྟར་བྱེད་དོན་གང་ཡིན་ཞེས་དོ་སྣང་ཆེན་པོ་བྱེད་བཞིན་ཡོད་པ་རེད།

ཨ་རིའི་ས་ཁུལ་ཨཱ་ལ་ས་ཀ་མངའ་ཁུལ་ནས་ཡིན་པ་དུས་རྒྱུན་བོད་པར་རྒྱབ་སྐྱོར་གནང་མཁན་སྐུ་ཞབས་ཁཱལ་ཇོན་སི་ཡིས་བཟོ་བཀོད་གནང་བའི་རླངས་འཁོར་གྱི་ཚོན་མདོག་དེ་བོད་ཀྱི་རྒྱལ་དར་གྱི་རི་མོ་ལྡན་པ་དང། རླངས་ཁོར་གྱི་བློ་གཡས་གཡོན་གཉིས་སུ་བོད་རང་བཙན་ཞེས་ཡི་གེ་འཁོད་པ་དེ་ནི་ཕྱི་ལོ་༢༠༡༠ ལོའི་ནཱ་སི་ཁར་ཞེས་པའི་རླངས་འཁོར་ཚོན་མདོག་འགྲན་སྡུར་ནང་དུ་ཞུགས་རྒྱུ་ཡིན་པ་རེད།

རྒྱ་ནག་བྱང་ཤར་གྱི་ཡོན་ཆིའི་ས་ཁུལ་དུ་ཆུ་ཚོད་༡༢ ཙམ་གྱི་རིང་ལ་དྲག་ཆར་བབས་པའི་རྐྱེན་གྱིས། ས་ཁུལ་དེའི་སོན་གྷ་རི་གཙང་པོའི་ནང་བཟོ་གྲྭའི་རྫས་རིགས་ཀྱི་མཛོད་ཁང་ཆེན་པོ་ཞིག་འཐོར་ཞིག་སོང་ཡོད་པས། ཡུལ་དེའི་མི་མང་ས་ཡ་༢,༥༨ ཙམ་ལ་འཐུང་ཆུ་མེད་པའི་དཀའ་ངལ་དང། གལ་སྲིད་རྒྱུན་ལྡན་བཞིན་གཙང་པོ་ལོངས་སུ་སྤྱད་ན་སྲོག་ལ་ཉེན་ཁ་འཕྲད་བཞིན་ཡོད་པའི་གནས་ཚུལ་ཐོན་ཡོད་པ་རེད།

དེ་ཡང་ཚེས་༢༧ ཉིན་བྷི་བྷི་སིའི་གསར་ཁང་ནས་གནས་ཚུལ་སྤེལ་བ་ལྟར་ན། དེང་སྐབས་དར་སྲོལ་ཆེ་བའི་ལག་ཐོགས་ཁ་པར་ཨ་ཡི་ཧྤོན་IPHONE གྱི་བཟོ་གྲྭ་གཙོ་བོ་ཐེ་ཝན་ནང་ཡོད་པ་དང། དེ་དང་འབྲེལ་ནས་རྒྱལ་ཁབ་མང་པོའི་ནང་བཟོ་གྲྭ་འདི་ཁྱབ་ཆེ་རུ་འགྲོ་བཞིན་ཡོད་ཅིང། རྒྱ་གར་ལྷོ་ཕྱོགས་མཱ་དྷ་ར་སིའི་ནང་ལག་ཐོགས་ཁ་པར་འདིའི་བཟོ་གྲྭ་ཞིག་བཙུགས་ཡོད་པའི་ནང་།

འབར་མའི་དམག་སྤྱི་ཐན་ཤིའུ་རྒྱ་གར་གྱི་ས་ཁུལ་ཁག་ཅིག་གི་ནང་ཉིན་ལྔའི་རིང་ལྟ་སྐོར་དང། དེ་ནས་རྒྱ་གར་གྱི་སྲིད་བློན་མན་མཱོ་ཧན་སིང་སོགས་ཆབ་སྲིད་མི་སྣ་ཆེ་ཁག་དང་ལྷན་དུ་ཚོགས་འདུ་འཚོགས་པར་འབར་མའི་མང་གཙོ་ཚོགས་པ་དང་རྒྱལ་སྤྱིའི་མང་གཙོ་དོན་གཉེར་བ་བཅས་ཀྱིས་རྒྱ་གར་གཞུང་ལ་ངོ་རྒོལ་བྱས་ཡོད་པ་རེད།

ཟླ་འདིའི་ཚེས་༡༩ ཉིན་རྒྱ་གར་གྱི་བརྒྱུད་ལམ་ཁག་ནས་གནས་ཚུལ་སྤེལ་བ་ལྟར་ན། རྒྱ་གར་ནུབ་བྷང་གྷལ་མངའ་སྡེའི་ནང་མེ་འཁོར་གཉིས་གདོང་ཐུག་བརྒྱབ་ནས། ད་ལྟ་མི་གྲངས་༥༢ ཙམ་གྱི་ཕུང་པོ་རྙེད་སོན་བྱུང་ཡོད་པ་དང་། མི་གྲངས་༩༠ ལྷག་ཙམ་མྱུར་སྐྱོབ་སྨན་ཁང་དུ་བསྐྱལ་དགོས་བྱུང་ཡོད་པ་རེད།

རྒྱ་ནག་གི་ལྷོ་ཕྱོགས་ཀཱོན་ཤིའི་ཞིང་ཆེན་གྱི་ས་ཁུལ་ཤིན་ཤིའི་ནང་། རྒྱ་གཞུང་གི་འཆར་འགོད་འོག་ནས་ཧྭ་ཡང་གི་བཟོ་གྲྭ་ཆེན་པོ་ཞིག་གསར་འཛུགས་བྱས་ནས། ཡུལ་དེའི་ཆུ་དང་། ས་ཞིང། མཁའ་རླུང་སོགས་ལ་འབག་བཙོག་ཚབས་ཆེན་བཟོས་པས། ཡུལ་མི་ཁྲི་ཚོ་བརྒལ་བས་ས་གནས་གཞུང་དང་བཟོ་བདག་ཚོར་ངོ་རྒོལ་བྱེད་སྐབས། བཟོ་པ་དང་ཡུལ་མིའི་དབར་འཁྲུག་འཛིང་ཤོར་ནས་བཟོ་པ་༣ རྐྱེན་ལམ་དུ་སོང་ཡོད་པ་དང། ཡུལ་མི་མང་པོ་ཞིག་ལ་རྨས་སྐྱོན་ཕོག་ནས་སྨན་ཁང་དུ་བསྐྱལ་དགོས་བྱུང་ཡོད་འདུག

ཨེ་ཤ་ཡའི་རྒྱལ་ཁབ་ནས་རྒྱ་ནག་ནི་འཇར་མན་གྱི་ཚོང་ཤག་ཆེ་ཤོས་ཡིན་པ་དང་། རྒྱལ་ཁབ་ཕྱོགས་གཉིས་ཀས་ལོ་གཅིག་ནང་ཡུ་སྒོར་དུང་ཕྱུར་༨༢ ཙམ་གྱི་ཚོང་འབྲེལ་བྱེད་ཀྱི་ཡོད་པས། ད་ཐེངས་འཇར་མན་སྲིད་བློན་ཨན་ཇི་ལ་མར་ཀཱལ་མཆོག རྒྱ་ནག་ཏུ་ཕེབས་དོན་ནི་ཕྱོགས་གཉིས་ཀྱི་ཚོང་འབྲེལ་རྒྱུན་གནས་ཐུབ་ཐབས་དང་སྲ་བརྟན་ཡོང་ཆེད་དུ་རེད་ཅེས། བརྒྱུད་ལམ་ཁག་ནས་ཁྱབ་བསྒྲགས་བྱས་ཡོད་པ་རེད།

ཟླ་འདིའི་ཚེས་༡༣ ཉིན་རྒྱ་ནག་གི་ཕྱི་འབྲེལ་ལས་ཁུངས་ཀྱི་མགྲིན་ཚབ་པ་ཆིང་ཀཱང་གིས་ཉེ་ཆར་རྒྱ་གར་གྱི་ཕྱི་འབྲེལ་དྲུང་ཆེ་རྡ་རམ་ས་ལར་ཕེབས་ནས། ༸གོང་ས་མཆོག་དང་མཇལ་འཕྲད་གནང་བའི་སྐོར་ཧ་གོ་རྗེས། གསར་འགོད་གསལ་བསྒྲགས་ཤིག་སྤེལ་ཏེ། རྒྱ་གར་གྱིས་ཏཱ་ལའི་བླ་མའི་གནད་དོན་འོས་འཚམ་ངང་ཐག་གཅོད་བྱེད་པའི་དམ་བཅའ་བརྩི་སྲུང་བྱས་ནས། ཡིད་གཟབ་ངང་འབྲེལ་ཡོད་གནད་དོན་ཐག་གཅོད་བྱེད་པའི་རེ་བ་ཡོད་ཅེས་བརྗོད་པ་རེད།  

“རྒྱ་ནག་གཞུང་གིས་མེ་འཁོར་ལྕགས་ལམ་པཱ་ཀི་སི་ཐན་ནང་མཐུད་འཆར་ཡོད་པ་དེ་ནི། རྒྱ་གར་གཞུང་ཕྱོགས་ནས་ཡིད་གཟབ་བྱེད་དགོས་པའི་གནད་དོན་ཞིག་ཆགས་ཡོད་པས། གལ་ཆེ་ཤོས་རྒྱ་གར་གཞུང་གིས་གནད་དོན་དེ་ལ་གདོང་ལེན་བྱེད་རྒྱུར་གྲ་སྒྲིག་དགོས་པ་རེད་”ཅེས། རྒྱ་གར་བདེ་སྲུང་བློན་ཆེན་མཆོག་གིས་གསུངས་ཡོད་པ་རེད།

ཐེ་ཝན་གྱི་གཞུང་འཛིན་གོ་མིན་ཏང་ཚོགས་པས་རྒྱ་ནག་དང་ལྷན་དུ་ཚོང་དོན་གྱི་གྲོས་གཞི་ཡིག་ཆ་བཞག་ཡོད་པ་དེར། ཕྱོགས་འགལ་མང་གཙོ་ཡར་ཐོན་ཚོགས་པས་གྲོས་གཞི་ལ་མིང་རྟགས་བཀོད་མི་ཆོག་པའི་རྩོད་གླེང་ཤུགས་ཆེན་བྱས་ཏེ། མཐར་གྲོས་ཚོགས་འཐུས་མི་རྣམས་ཕྱོགས་གཉིས་སུ་ལངས་ནས་འཁྲུག་འཛིང་ཤོར་བས། འཐུས་མི་གཉིས་ལ་རྨས་སྐྱོན་ཕོག་སྟེ་ སྨན་ཁང་དུ་མྱུར་སྐྱོབས་ཀྱི་ཆེད་དུ་འགྲོ་དགོས་བྱུང་ཡོད་པ་རེད་།

ཉེ་བའི་ཆར་རྒྱ་ནག་ལྷོ་ཕྱོགས་ས་ཁུལ་ཀྲེ་ཅང་དང་ཨན་ཧུའེ། ཧྥུ་ཅན། སི་ཁྲོན་སོགས་ཞིང་ཆེན་དགུའི་མི་བྱེ་བ༡.༧༡༩ ལ་དྲག་ཆར་བབས་ནས་ཆུ་ལོག་གནོད་འཚེ་ཐེབས་ཤིང། ཞིང་ཆེན་ཁ་ཤས་ལ་ཆུ་ལོག་གི་གནོད་འཚེ་ཚབས་ཆེན་ཐེབས་ཡོད་པ་མ་ཟད། རི་ཉིལ་བ་སོགས་ཀྱི་གནོད་འཚེ་བྱུང་འདུག

ཟླ་འདིའི་ཚེས་༡༡ ཉིན་གྱི་རྒྱ་གར་གྱི་མཚན་མོའི་ཆུ་ཚོད་༡༢ ཐོག་ཕྱི་ལོ་༢༠༡༠ ལོའི་འཛམ་གླིང་རྐང་རྩེད་སྤོ་ལོའི་མཐའ་མའི་འགྲན་སྡུར་དེ་ཉིད། ལྷོ་ཨ་ཧྥི་རི་ཁའི་རྒྱལ་ཁབ་ཀྱི་རྒྱལ་ས་ཇཱོ་ཧ་ནི་སི་བྷག་ཏུ་རྩེད་འགྲན་བྱས་ཤིང། ༢༠༡༠ ལོའི་ཧྥིའི་ཧྥ་འཛམ་གླིང་རྐང་རྩེད་སྤོ་ལོའི་གསེར་གྱི་བུམ་པ་དེ་སི་པན་རྒྱལ་ཁབ་ལ་ཐོབ་ཡོད་པ་རེད།

ཕྱི་ཟླ་༦ པའི་ཚེས་༡༡ ཉིན་ནས་ད་བར་ཉིན་ཉེར་བརྒྱད་རིང་ལ་ལྷོ་ཨ་ཧྥི་རི་ཁའི་རྒྱལ་ཁབ་ཏུ་འཛམ་གླིང་གསེར་གྱི་བུམ་པའི་རྐང་རྩེད་སྤོ་ལོའི་འགྲན་སྡུར་རིམ་པར་བྱས་ཡོད་པ་དང། ཟླ་འདིའི་ཚེས་༡༡ ཉིན་ཆེས་མཐའ་མའི་འགྲན་སྡུར་ནང་དུ་ནེ་དྷར་ལན་ཌི་རྒྱལ་ཁབ་དང། སི་པན་རྒྱལ་ཁབ་གཉིས་ཀྱི་དབར་དུ་འགྲན་སྡུར་བྱེད་རྒྱུ་ཡིན་པ་རེད།

ཤར་ཏུར་ཀི་སི་ཐན་ནང་རྒྱ་གཞུང་ལ་ངོ་རྒོལ་བྱས་ནས་ལོ་གཅིག་འཁོར་བའི་དྲན་གསོའི་ཉིན་མོ་དེ་རྒྱ་གཞུང་གིས་བཀག་འགོག་བྱས་ཡོད་ཀྱང། ཡོ་རོབ་དང་ཨ་རི་སོགས་རྒྱལ་ཁབ་༢༠ ལྷག་ཙམ་ནང་ཡོད་པའི་ཤར་ཏུར་ཀི་སིན་ཐན་གྱི་ཡུ་གུར་བ་ཚོས། ལོ་སྔོན་མར་རང་སྲོག་ཤོར་མཁན་དང་ད་ལྟའི་སྐབས་རྒྱ་ནག་གི་བཙོན་འཇུག་འོག་ཡོད་པ་ཚོའི་པར་རིས་འགྲེམས་སྟོན་སོགས་བྱས་ཏེ། རྒྱ་ནག་ལ་ངོ་རྒོལ་གྱི་ལས་འགུལ་གཞི་རྒྱ་ཆེན་པོ་ཞིག་སྤེལ་ཡོད་པ་རེད།

ཏཱ་ལའི་རུ་ཚོགས་དང་འཐབ་རྩོད་ཀྱི་བྱེད་སྒོ་གཏིང་ཟབ་སྤེལ་རྒྱུ་ནི་བོད་ལྗོངས་དང་ཞིང་ཆེན་བཞིའི་བོད་ཁུལ་གྱི་མཆོང་སྐྱོད་ལྟ་བུའི་འཕེལ་རྒྱས་དང་ཡུན་རིང་བདེ་འཁོད་ཡོང་བའི་གཞི་རྩའི་འགན་སྲུང་ཡིན་ཞེས་རྒྱ་ནག་དབུས་ཆབ་སྲིད་ཁང་གི་རྒྱུན་ལས་དང། རྒྱ་ནག་རྒྱལ་ཡོངས་སྲིད་གྲོས་ཀྱི་གཙོ་འཛིན་ཅཱ་ཆིང་ལིན་གྱིས་ཟླ་འདིའི་ཚེས་༧ ཉིན་པེ་ཅིང་དུ་བརྗོད་ཡོད་པ་རེད།

ཨ་རིའི་གྲོས་ཚོགས་འོག་མའི་ཚོགས་གཙོ་ལྕམ་ནན་སི་པི་ལོ་སི་མཆོག་གིས། “༧ཏཱ་ལའི་བླ་མ་མཆོག་ལ་རྒྱ་ནག་ཏུ་ཕེབས་ནས་ཡུལ་དེའི་ཆེས་མཐོའི་དཔོན་རིགས་ཁག་དང་ཐུག་འཕྲད་གནང་འདུན་ཆེན་པོ་ཡོད་པས། རྒྱ་ནག་གཞུང་ཕྱོགས་ནས་བོད་དོན་གྲོས་བསྡུར་གྱི་ཆེད་དུ། གདེངས་ཚོད་ཡོད་པའི་ཐོག་ནས་གདན་ཞུའི་བརྡ་འཕྲིན་གཏོང་རྒྱུ་དེ་ངའི་རེ་བ་ཡིན་”ཞེས། ༧སྐུ་ཡི་འཁྲུངས་སྐར་དང་བསྟུན་ནས་ཁྱབ་བསྒྲགས་བྱས་ཡོད་པ་རེད།

ཤར་ཏུར་ཀི་སི་ཐན་ནང་གི་ཡུ་གུར་མི་རིགས་ཀྱིས། རྒྱ་ནག་གཞུང་ལ་ངོ་རྒོལ་གྱེན་ལངས་བྱས་ནས་ལོ་གཅིག་འཁོར་བའི་དྲན་གསོའི་ཉིན་མོ་སྲུང་བརྩི་བྱེད་འཆར་ཡོད་ཀྱང། རྒྱ་ནག་གི་དྲག་ཆས་དམག་མི་དང་ཉེན་རྟོག་པ་སྟོང་ཕྲག་མང་པོས་ཁྲོམ་གཞུང་གི་མཐའ་བསྐོར་ནས། ཡུལ་མི་རྣམས་གང་བྱུང་འགྲོ་བསྐྱོད་མི་ཆོག་པ་བཟོས་ཡོད་འདུག

བལ་ཡུལ་གྱི་སྲིད་བློན་ལས་ཐོག་པ་སྐུ་ཞབས་མཱ་ཌ་ཧྤི་ཀུའུ་མར་མཆོག་གིས། “ཆབ་སྲིད་ཀྱི་རྩོད་རྙོག་མཇུག་བསྡུ་ཆེད་དང་། བལ་ཡུལ་དུ་ཞི་བདེ་ལྷིང་འཇགས་ཡོང་ཆེད་དུ། ཁོང་སྲིད་བློན་གྱི་གོ་གནས་ནས་རྩ་དགོངས་ཞུ་འཆར་ཡོད་”པ་བལ་ཡུལ་གྱི་བརྙན་འཕྲིན་བརྒྱུད་ལམ་ཁག་ནས་ཁྱབ་བསྒྲགས་བྱས་ཡོད་པ་རེད།

རྒྱ་ཁྱབ་ངང་ནས་བརྗེ་རེས་ལས་དོན་སྤེལ་ཏེ། ཁྱོན་ཡོངས་ནས་དམངས་གཙོ་བཅོས་བསྒྱུར་བཏང་ཚུན་གྱི་བོད་ཀྱི་ཆབ་སྲིད། དཔལ་འབྱོར། རིག་གནས། ཚན་རྩལ་དེ་བཞིན་འགྲོ་བ་མིའི་ཐོབ་ཐང་དང་སྐྱེ་ཁམས་ཁོར་ཡུག་འཛུགས་སྐྲུན་ལ་སོགས་པར་ཡར་རྒྱས་མགྱོགས་པོ་བྱུང་བའི་སྐོར་ངོ་སྤྲོད་བྱེད་དགོས་ཞེས་ཅཱ་ཆིང་ལིན་གྱིས་དོན་ཚན་བཞིའི་སྒོ་ནས་གཏམ་བཤད་སྤེལ་འདུག

རྒྱ་ནག་དང་ལྷན་དུ་རང་དབང་ཁྲོམ་རའི་གྲོས་མཐུན་ཡིག་ཆ་ལ་མིང་རྟགས་བཀོད་ན། ཐེ་ཝན་གཞུང་དེ་ཆབ་སྲིད་དང་དཔལ་འབྱོར་གཉིས་ཐད་ནས། གསོན་གནས་བྱེད་པའི་གོ་སྐབས་ནམ་ཡང་ཡོང་གི་མ་རེད་ཅེས། ཐེ་ཝན་གཞུང་དང་སྲིད་འཛིན་གཉིས་ལ་ངོ་རྒོལ་བ་སྟོང་ཕྲག་མང་པོས་འཕྲེད་དར་འཕྱར་ནས་སྐད་འབོད་ཁྲོམ་སྐོར་བྱས་ཡོད་པ་རེད།

ཉེ་དུས་ཁེ་ན་ཌའི་ནང་འཛམ་གླིང་སྟོབས་ཆེན་རྒྱལ་ཁབ་ཁག་གི་ལྷན་ཚོགས་སྐབས། རྒྱ་ནག་གི་སྲིད་འཛིན་ཧུའུ་ཅིན་ཐའོ་ཡང་ཚོགས་བཅར་བྱས་ཡོད་པ་དང། སྐབས་དེར་ཁེ་ན་ཌའི་གྲོས་ཚོགས་ཁང་དང་རྒྱ་ནག་གི་གཞུང་ཚབ་ཁང་སོགས་སུ་ལྟ་སྐོར་ལ་འགྲོ་སྐབས། བོད་མི་དང་ཡུ་གུར་མི་རིགས། ཧྥ་ལུང་ཀོང་ཆོས་འཁོར་སྒོམ་སྒྲུབ་ཚོགས་པ། འགྲོ་བ་མིའི་ཐོབ་ཐང་དང་མང་གཙོ་དོན་གཉེར་བ་སོགས་ཀྱིས་ཧུའུ་ཅིན་ཐའོ་ལ་ངོ་རྒོལ་ཤུགས་ཆེར་བྱས་ཡོད་པ་རེད།

བོད་ནང་གི་བརྒྱུད་ལམ་ཁག་ཅིག་ནས་གནས་ཚུལ་སྤེལ་བ་ལྟར་ན། ཟླ་འདིའི་ཚེས་༢༨ ཉིན་རྒྱ་ནག་གི་ཀུའེ་ཀྲུའུ་ཞིང་ཆེན་ཀོན་ལིན་རྫོང། ཀང་ཝུའུ་གྲོང་བརྡལ་ཏ་ཀྲེ་གྲོང་ཚོ་རུ་བདུན་ཕྲག་གཅིག་རིང་དྲག་ཆར་བསྟུད་མར་བབས་པའི་རྐྱེན་གྱིས་རི་ཉིལ་ནས། གྲོང་ཚོ་དེའི་གྲོང་མི་༡༠༧ ལྷག་ས་འོག་ཏུ་མནན་པའི་གནས་ཚུལ་བྱུང་ཡོད་པ་རེད།

འཛམ་གླིང་སྟོབས་ཆེན་རྒྱལ་ཁབ་ཉི་ཤུའི་ལྷན་ཚོགས་དེ། དཔལ་འབྱོར་དང་འཕྲོད་བསྟེན་གྱི་གནད་དོན་གཙོ་བོར་བྱས་ནས་ཚོགས་ཡོད་པ་དང། འབྱུང་འགྱུར་ལོ་༣ གྱི་ནང་ཚུད་རྒྱལ་ཁབ་ཁག་གི་དཔལ་འབྱོར་ཉམས་ཆག་སོང་ཡོད་པ་རྣམས། བྱུང་སོང་ཁ་འདུམ་ཐབས་བྱེད་རྒྱུ་ཡིན་པའི་གྲོས་འཆམ་བྱུང་ཡོད་འདུག

ཟླ་འདིའི་ཚེས་༡༡ ཉིན་ནས་བཟུང་ད་བར་ཉིན་གྲངས་༢༨ རིང་ལྷོ་ཨ་ཕྷི་རི་ཁའི་རྒྱལ་ཁབ་ཀྱི་ནང་དུ། འཛམ་གླིང་རྐང་རྩེད་སྤོ་ལོའི་འགྲན་སྡུར་བྱས་དང་བྱེད་བཞིན་པ་དང། འགྲན་སྡུར་དུ་ཞུགས་མཁན་རྒྱལ་ཁབ་༣༢ ཡོད་དེ་དག་གི་དབར་འགྲན་ཐེངས་༤༨ བྱས་ནས། ཚེས་༢༦ ནས་བཟུང་ཡག་ཤོས་རྒྱལ་ཁབ་༡༦ བར་དུ་འགྲན་སྡུར་བྱེད་པའི་འགོ་བཙུགས་པ་དང། ལྷག་མ་རྒྱལ་ཁབ་༡༦ རྣམས་འགྲན་སྡུར་གྱི་རྒྱལ་ཁ་མ་ཐོབ་པར་བརྟེན། ཡག་ཤོས་༡༦ ཀྱི་གྲས་སུ་ཚུད་མེད་པ་རེད།

“སྲིད་འཛིན་ཨོ་བྷ་མ་མཆོག་གིས། རྒྱ་ནག་གི་དངུལ་ལོའི་འཛའ་ཐང་བསྒྱུར་བཅོས་དེ་ཕྱོགས་སུ་མ་ལྷུང་བ་དང། སྲ་བརྟན་ལྡན་པའི་ངང་ནས་འཕེལ་རྒྱས་གཏོང་རྒྱུ་དང་ལག་བསྟར་བྱེད་རྒྱུ་གལ་ཆེན་ཡིན་པ་ནན་བརྗོད་དང། དེ་དང་འབྲེལ་ནས་ཨ་རྒྱ་ཕྱོགས་གཉིས་ཀྱི་འབྲེལ་ལམ་སྲ་བརྟན་ཆེད། རྒྱ་ནག་གི་སྲིད་འཛིན་ཨ་རིར་གདན་ཞུ་གནང་བར་ཁས་ལེན་བྱས་ཡོད་པ་རེད་ཅེས”ཕོ་བྲང་དཀར་པོའི་སློབ་སྟོན་པ་སྐུ་ཞབས་བྷ་ཌར་མཆོག་གིས་གསར་འགོད་པར་བརྗོད་ཡོད་འདུག

ཟླ་འདིའི་ཚེས་༡༥ ཉིན་ནས་ཚེས་༢༤ བར་དུ་རྒྱ་ནག་གི་སྲིད་འཛིན་གཞོན་པ་ཞིའི་ཅིན་ཕེང་རྒྱལ་དོན་འཚམ་འདྲིར་བསྐྱོད་པའི་ལས་རིམ་ཞིག་འགོ་བཙུགས་པ་བཞིན། ཟླ་འདིའི་ཚེས་༡༥ ཉིན་རྒྱ་ནག་གི་སྲིད་འཛིན་གཞོན་པ་ཞིན་ཅིན་ཕེང་ལའོ་སི་རྒྱལ་ཁབ་ཏུ་ལའོ་སི་རྒྱལ་ཁབ་ཀྱི་སྲིད་འཛིན་གཞོན་པས་མགྲོན་འབོད་བྱས་པ་ལྟར་ཡུལ་དེར་འཚམ་འདྲིར་བསྐྱོད་ཡོད་པ་རེད།

གསར་ལམ་ཁག་ནས་གནས་ཚུལ་སྤེལ་བ་ལྟར་ན། ཟླ་འདིའི་ཚེས་༡༩ དང་ཚེས་༢༠ བཅས་ཉིན་གཉིས་རིང། རྒྱལ་ནག་གི་ལྷོ་ཕྱོགས་ཧྥུ་ཅན་དང་ཅང་ཞི། ཧུའུ་ནན་སོགས་ཞིང་ཆེན་དང་རང་སྐྱོང་ལྗོངས་བསྡོམས་པའི་ལྗོངས་ཞིང་ཆེན་ཁག་དགུ་ལ་དྲག་ཆར་ཐེངས་བཅུ་བཞི་བབས་ཏེ་ཆུ་ལོག་གི་གནོད་འཚེ་ཚབས་ཆེན་ཕོག་ཡོད་པ་རེད། རོབ་རྩིས་བྱས་པ་ལྟར་ན། གནོད་འཚེ་ཐེབས་པའི་མི་གྲངས་བྱེ་བ་གཅིག་དང་ཁྲི་གསུམ་ལ་སླེབས་ཡོད་འདུག

ཐེངས་འདིའི་ཡོ་རོབ་གྲོས་ཚོགས་ཀྱི་ནང་དུ་བལ་ཡུལ་མི་མང་དང། སྐྱབས་བཅོལ་བ་སྤྱིའི་གནས་བབས་ལ་བདེ་འཇགས་དགོས་སྐོར་དང། སྒོས་སུ་བལ་ཡུལ་གྱི་བོད་མི་སྐྱབས་བཅོལ་བ་རྣམས་ལ་རྒྱལ་སྤྱིའི་སྐྱབས་བཅོལ་བའི་གྲོས་ཆོད་ལ་ཁས་ལེན་ཡོད་པ་བཞིན། རྒྱལ་སྤྱིའི་ཁྲིམས་ལུགས་གཞིར་བཟུང་དོན་འཁྱོལ་ཡོང་བའི་འབོད་སྐུལ་ཞུས་འདུག

ཟླ་འདིའི་ཚེས་༡༡ ཉིན་འཛམ་གླིང་རྐང་རྩེད་སྤོ་ལོའི་འགྲན་སྡུར་ཆེན་མོ་ལྷོ་ཨ་ཧྥི་རི་ཁའི་རྒྱལ་ཁབ་ཏུ་འགོ་འཛུགས་བྱས་ནས་ད་བར་ཉིན་བཞི་འགྲོ་བཞིན་ཡོད་པ་དང། འདས་པའི་ཉིན་གསུམ་རིང་རྒྱལ་ཁབ་བརྒྱད་དབར་འགྲན་སྡུར་བྱས་ཡོད་པ་དང་། ལྷོ་ཨ་ཧྥི་རི་ཁར་འཛམ་གླིང་རྐང་རྩེད་སྤོ་ལོའི་འགྲན་སྡུར་བྱས་པ་ཐེངས་དང་པོ་ཆགས་ཀྱི་ཡོད་པ་རེད།

ལོ་འདིའི་ཕྱི་ཟླ་༥ པའི་ཟླ་མཇུག་ཙམ་ནས། རྒྱ་ནག་ནང་བཟོ་གྲྭ་ཆེ་ཁག་གི་ལས་མི་སྟོང་ཕྲག་བརྒལ་བས་ལས་བྱེད་ཀྱི་ཕོགས་འབབ་གཙོས། གཞན་ཡང་གཞི་རྩའི་དགོས་ངེས་ཐོབ་ཐང་ཁག་རྩོད་ལེན་གྱི་ངོ་རྒོལ་ཤུགས་ཆེ་བྱེད་བཞིན་ཡོད་པ་རྒྱལ་སྤྱིའི་གསར་ལམ་ཁག་ནས་གནས་ཚུལ་སྤེལ་ཡོད་པ་རེད།

ཟླ་འདིའི་ཚེས་༡༠ ཉིན་གསར་ལམ་ཁག་ཏུ་གནས་ཚུལ་སྤེལ་བ་ལྟར་ན། འཛམ་གླིང་ན་སྙན་གྲགས་ཆེ་བའི་ཧྥིའི་ཧྥ་འཛམ་གླིང་ཕོར་པའི་རྐང་རྩེད་སྤོ་ལོའི་རྩེད་འགྲན་དེ་སང་ཉིན་ཕྱི་ཚེས་༡༡ ཉིན་ཨ་ཧྤི་རི་ཁའི་གླིང་ཕྲན་ནང་གི་ལྷོ་ཨ་ཧྥི་རི་ཁའི་རྒྱལ་ཁབ་ཀྱི་རྒྱལ་ས་ཇཱོ་ཧ་ནི་སི་བྷག་ཏུ་འགོ་འཛུགས་བྱེད་རྒྱུ་ཡིན་པ་རེད།

ཉི་ཧོང་རྒྱལ་ཁབ་ཀྱི་དཔལ་འབྱོར་བློན་ཆེན་ནའོ་ཀྲོ་ཀན་ཞེས་པ་དེ་རྒྱལ་ཁབ་ཀྱི་སྲིད་བློན་གསར་པར་བསྐོ་བཞག་བྱས་ཡོད་འདུག  དེ་ཡང་ཟླ་འདིའི་ཚེས་༤ ཉིན་བརྒྱུད་ལམ་ཁག་ནང་གནས་ཚུལ་སྤེལ་བ་ལྟར་ན། ཉི་ཧོང་ནང་གི་DPJ Lawmakers ཞེས་པ་ཁྲིམས་ལུགས་ལས་སྣེའི་འགོ་འཁྲིད་མཁན་སྐུ་ཞབས་ཀན་སྲིད་བློན་འོས་མིར་འདེམས་ཐོན་བྱས་པ་དང། གྲོས་ཚོགས་སྟེང་འོག་གཉིས་ཀས་འོས་འཕེན་རྒྱབ་སྐོར་ཤུགས་ཆེན་ཐོབ་ནས་མཐར་སྲིད་བློན་དུ་བསྐོ་བཞག་བྱས་ཡོད་པ་རེད།

པེ་ཅིང་གནམ་བདེ་སྒོ་མོའི་ཐང་དུ་སློབ་མས་ཞི་བའི་གྱེན་ལངས་ཆེན་པོ་བྱས་ནས། མི་ལོ་ཧྲིལ་པོ་༢༡ འཁོར་ལ་ཉེ་བའི་དུས་དང་བསྟུན་ནས། ཧོང་ཀོང་དུ་རྔམ་སྟོན་ཁྲོམ་སྐོར་གཞི་རྒྱ་ཆེན་པོ་བྱས་པ་དང། ཁྲོམ་སྐོར་བ་༡༣ འཇུ་བཟུང་བྱས་ཡོད་པའི་ནང་ནས། ཡུལ་དེའི་གྲོས་ཚོགས་འཐུས་མི་ལི་ཆུའུ་ཡང་ཟེར་བའང་ཡོད་འདུག

“རྒྱ་དཀར་ནག་རྒྱལ་ཁབ་ཕྱོགས་གཉིས་ཀྱི་གནད་དོན་གལ་ཆེན་ཁག་ལ། གཅིག་གིས་གཅིག་ལ་བསམ་ཤེས་ལེགས་པོ་བྱས་ན། ང་ཚོའི་ལས་དོན་གྱི་གནད་འགག་རྩ་འཛིན་ཐུབ་པ་དང། གྲོགས་པོའི་གནས་བབས་དེ་རྒྱུན་གནས་སྲ་བརྟན་ཡོང་ཐུབ་”ཅེས། རྒྱ་གར་གྱི་སྲིད་འཛིན་པཱ་ཊིལ་མཆོག་གིས་གསུངས་ཡོད་པ་རེད།

ཟླ་འདིའི་ཚེས་༢༣ ཉིན་བྷི་བྷི་སི་གསར་ཁང་གིས་གནས་ཚུལ་སྤེལ་བ་ལྟར་ན། ཨ་རིའི་མངའ་སྡེ་ཀཱ་ལི་ཧྥོར་ནི་ཡ་རུ་འཚར་ལོངས་བྱུང་བའི་ལོ་ན་༡༣ ལ་སོན་པའི་ཇོར་ཌན་རོ་མཱི་རོ་ཟེར་བ། རི་བོ་མཐོ་ཤོས་ཇོ་མོ་གླང་མའི་རྩེ་ལ་འཛེགས་ཡོད་པས། འཛམ་གླིང་ནང་ལོ་ན་ཆུང་ཤོས་ཀྱི་གངས་འཛེགས་པའི་མཚན་སྙན་ཐོབ་ཡོད་པ་རེད།

ཟླ་འདིའི་ཚེས་༢༣ ཉིན་བརྒྱུད་ལམ་ཁག་ནས་གནས་ཚུལ་སྤེལ་བ་ལྟར་ན། ༧གོང་ས་མཆོག་ཨ་རིར་ཆིབས་བསྒྱུར་བསྐྱངས་ཡོད་པ་དང་བསྟུན་ནས། རྒྱ་རིགས་རྩོམ་པ་པོ་སྐུ་ཞབས་ཝང་ལི་ཤུན་གྱིས། ཊིའི་ཊར་དྲ་གནས་བརྒྱུད་ནས་རྒྱ་ནག་ཧན་མི་རིགས་༡༢༥༣ ཙམ་ནས། དྲི་བ་༢༨༩ འདེམས་སྒྲུབ་ཀྱིས། དྲི་བ་ཁག་གཅིག༧གོང་ས་མཆོག་ལ་བཀའ་འདྲི་ཞུས་ཡོད་པ་དང།  དེ་བཞིན་དྲི་བ་ཁག་ལ་མོས་མཐུན་ཡོད་མེད་རྒྱ་ནག་མི་མང་ལ་འོས་འཕེན་བཅུག་ཡོད་པའི་ནང། འོས་འཕེན་བ་མི་གྲང་༡༢༤༧༣ ཙམ་འཛུལ་ཞུགས་བྱས་ཡོད་འདུག

ཟླ་འདིའི་ཚེས་༢༣ ཉིན་གྱི་ཞོགས་པའི་ཆུ་ཚོད་༢ དང་སྐར་མ་༡༠ སྟེང་། བསྟུན་མར་ཆར་པ་བབས་པ་ལས་རི་ཉིལ་ཏེ་ལྕགས་ལམ་མནན་པའི་དབང་གིས། ཧྲང་ཧེ་ནས་ཀོས་ལིན་ཕྱོགས་སུ་སྐྱོད་པའི་འགྲུལ་སྐྱེལ་མེ་འཁོར་ཞིག་ཅང་ཞི་ཞིང་ཆེན་མངའ་ཁོངས་སུ་ལྕགས་ལམ་ལས་བརྒལ་བའི་ཆག་སྒོ་བྱུང་སྟེ། གསར་འགྱུར་འདི་སྤེལ་བའི་བར་དུ།

“རྒྱ་ནག་གཞུང་གི་ངོས་ནས་རང་དབང་གི་ཐག་གཅོད་དང་བརྒྱུད་རིམ་ཅན་གྱི་ལམ་ལུགས་འོག་ནས། རྒྱ་ནག་གི་དངུལ་ལོའི་འཛའ་ཐང་གི་སྒྲོམ་གཞི་དེ་རིམ་གྱིས་བསྒྱུར་བཅོས་གཏོང་རྒྱུ་ཡིན་”ཞེས། རྒྱ་ནག་གི་སྲིད་འཛོམ་ཧུའུ་ཅིན་ཐཱའོ་ཡིས་གཏམ་བཤད་བྱས་ཡོད་པ་རེད།

པཱ་ཀི་སི་ཐན་གཞུང་གིས་འཛམ་གླིང་ཐོག་ཡོངས་ཁྱབ་ཏུ་འགྲོ་བཞིན་པའི་དྲ་གནས་ཡུས་ཊུབ་དང་ཧྥ་སི་བྷུག་གཉིས་བཀག་སྡོམ་བྱེད་རྒྱུའི་ཐག་གཅོད་དོན་ནི། དྲ་གནས་དེ་བརྒྱུད་ནས་འཛམ་གླིང་ནང་ཁ་ཆེའི་མི་རིགས་ལ་ངོ་རྒོལ་བྱེད་མཁན་དང། ཁ་ཆེའི་ཆོས་ལུགས་ལ་གུས་བརྩི་མི་བྱེད་མཁན་མང་དུ་འགྲོ་བཞིན་ཡོད་པའི་རྐྱེན་གྱིས་རེད་ཅེས། གཞུང་འབྲེལ་གྱི་འབྲེལ་ཡོད་མི་སྣས་བརྗོད་ཡོད་པ་རེད།

ཐེ་ཝན་དང་རྒྱ་ནག་གཞུང་གཉིས་དབར་རང་དབང་གི་ཚོང་འབྲེལ་གྲོས་གཞི་ཞེས་པའི་ཚོང་དོན་ཡིག་ཆ་ལ། ཟླ་བ་རྗེས་མར་ཕྱོགས་གཉིས་ཀས་མིང་རྟགས་བཀོད་ནས་འགྲེམས་སྤེལ་དང་ལག་བསྟར་བྱེད་རྒྱུའི་ཁྱབ་བསྒྲགས་བྱས་ཡོད་པར། ཐེ་ཝན་ཕྱོགས་འགལ་ཚོགས་པས་འགོ་ཁྲིད་དེ་མི་མང་བརྒྱ་ཕྲག་མང་པོའི་ཐེ་ཝན་གྲོས་ཚོགས་ཁང་གི་སྒོ་འགྲམ་ངོ་རྒོལ་བྱས་ཡོད་པ་རེད།

ཨུ་རུ་སུ་གཞུང་ཕྱོགས་ནས་བོད་ཀྱི་གནད་དོན་སེལ་ཆེད་དུ། ༧ཏཱ་ལའི་བླ་མ་མཆོག་གི་སྐུ་ཚབ་དང་རྒྱ་ནག་གཞུང་གཉིས་དབར་འབྲེལ་མོལ་ཡོང་རྒྱུར་འབད་བརྩོན་དང་མཐུན་འགྱུར་ཞུ་རྒྱུའི་གྲ་སྒྲིག་ཆ་ཚང་ཡོད་ཅེས་ཨུ་རུ་སུའི་ཕྱི་སྲིད་བློན་ཆེན་གྱིས་གསུངས་ཡོད་པ་རེད།

འགྲོ་བ་མིའི་ཐོབ་ཐང་དང་ཆོས་ལུགས་དད་པ་རང་དབང། ངལ་རྩོལ་བའི་ཐོབ་ཐང། ཁྲིམས་ཀྱིས་དབང་བསྒྱུར། དེ་དང་འབྲེལ་ནས་དཔལ་འབྱོར་ཉམས་རྒུད་བཅས་ཀྱི་ཐད་ལ། ཨ་རི་དང་རྒྱ་ནག་གཉིས་དབར་གྲོས་མོལ་བྱས་པ་དེ་ནི། ཕྱོགས་གཉིས་ཀྱི་ལས་དོན་རིམ་གྱིས་རྒྱུན་སྐྱོང་ཐུབ་པའི་རྨང་གཞི་ཡིན་པ་ལས། གྲུབ་འབྲས་མྱུར་དུ་ཐོན་རྒྱུ་ཁག་པོ་རེད་ཅེས། ཨ་རིའི་རྒྱལ་དོན་དྲུང་ཆེའི་ལས་རོགས་ཀྱིས་གསར་འགོད་པར་བརྗོད་ཡོད་པ་རེད།