The Tibet Express

ཟླ་འདིའི་ཕྱི་ཚེས་༡༡ ཉིན་གསལ་ལམ་ཁག་ཏུ་གནས་ཚུལ་ལྟར་ན། རྒྱ་གར་གྱི་སྐར་རྟགས་བརྙན་ཡོལ་གྱི་ལོ་འཁོར་གློག་བརྙན་གཟེངས་རྟགས་དུས་ཆེན་ཐེངས་༡༦ པར་རྒྱ་གར་གྲོང་ཁྱེར་མོམ་བྷེས་ལ་ཚོགས་པ་དང། སྐབས་དེར་གླེན་པ་གསུམ་(3 Idiots)ཞེས་པའི་གློག་བརྙན་ལ་ད་བར་བྱུང་མྱོང་མེད་པའི་ཁེ་བཟང་ཐོབ་མཁན་གྱི་ཧིན་དྷིའི་གློག་བརྙན་གི་མིང་ཐོབ་པ་དང༌། གློག་བརྙན་དེར་གཟེངས་རྟགས་བཅུ་སྟེ། ཕུལ་བྱུང་གློག་བརྙནདང། འཁྲབ་ཁྲིད་པ། བརྙན་སྒྲིག་པ། འཁྲབ་གཞུང། གར་སྟབས་བསྟན་བཅོས། རོལ་གར་འཁྲབ་སྟོན། སྐད་ཆའི་སྒྱུ་རྩལ། གསར་ཐོན་མི་ཤོས། དགོད་བྲོའི་མི་སྣ། མི་སྣ་མ་རབས་འཁྲབ་མཁན། བུ་མེད་མི་སྣ་གཙོ་བོ་འཁྲབ་མཁན་བཅས་ལེགས་ཤོས་ཀྱི་གཟེངས་རྟགས་ཐོབ་ཡོད་པ་རེད།
གླེན་པ་གསུམ་ཞེས་པའི་གློག་བརྙན་འདིའི་བརྗོད་སྙིང་གཙོ་བོ་ནི་དེང་སང་རྒྱ་གར་ནང་མཐོ་སློབ་ཀྱི་སློབ་གཞིར་ཞན་ཆ་དང་དེར་ལེགས་བཅོས་གཏོང་དགོས་པའི་སྐོར་ཡིན་པ་དང༌། དེར་རྒྱ་གར་གྱི་དཔོན་རིགས་མང་པོས་བསྔགས་བརྗོད་དང་དེར་ལྟ་དགོས་པའི་སྐུལ་མ་གནང་ཡོད་པ་རེད།
དེ་དང་འདྲ་བའི་རྒྱ་གར་གྱི་སློབ་གྲྭའི་སློབ་གཞིའི་ཞན་ཆ་དང༌། དེར་ལེགས་བཅོས་དགོས་པའི་བརྗོད་སྙིང་གཙོ་བོར་བཟུང་པའི་ས་སྟེང་གི་སྐར་མ་(Tare Zaamen Par) ཞེས་པའི་གློག་བརྙན་ཞིག་ཀྱང་འཁྲབ་ཁྲིད་བྱས་ཤིང༌། གློག་བརྙན་དེར་རྒྱ་གར་ནང་ལང་ཕྱོགས་གསར་པའི་སྒོ་མོ་ཕྱེ་མཁན་ལྟ་བུ་ཞིག་ཆགས་ཡོད་པ་རེད། གློག་བརྙན་དེའི་འཁྲབ་ཁྲིད་པ་གཙོ་བོ་ནི་ཨ་མན་ཁཱན་ཡིན་ཅིང༌། གླེན་པ་གསུམ་གྱི་མི་སྣ་གཙོ་བོ་འཁྲབ་མཁན་ཡང་ཁོང་ཡིན་པ་རེད། ཁོང་ནི་དེང་སང་རྒྱ་གར་ཙམ་མ་ཟད་ནུབ་ཕྱོགས་སུའང་སྙན་གྲགས་ཇེ་ཆེར་འགྲོ་བཞིན་པའི་ས་སྟེང་གི་སྐར་མ་ཞིག་ཡིན་པ་རེད། ཉེ་ཆར་གླེན་པ་གསུམ་ཞེས་པའི་གློག་བརྙན་འདི་ཧོ་ལི་ཝུ་ཊ་ཡི་རྒྱལ་སྤྱིའི་གློག་བརྙན་སྒྱུ་རྩལ་དང་ཚན་རྩལ་ཁང་གི་དཔེ་མཛོད་དུ་གཏན་འཇགས་འཁྲབ་གཞུང་ཕྱོགས་སྒྲིག་ནང་གདན་འདྲེན་ཞུས་ནས་གཏན་དུ་ཉར་ཚགས་བྱས་ཡོད་པ་རཻད།