23:51:13
༄༅།། བྱང་མཐའི་མྱོང་ཚོར་དམར་པོ།
གདུང་བ་དམར་པོ་ཞིག་གི་ཡུལ་ལུང་འདི་ནས།།
སུན་སྣང་བརྩེགས་མ་ཞིག་གི་འོག་རུམ་ཁྲོད་ནས།།
འཇོན་མདོག་མཁས་མདོག་འཁྲབ་སའི་གཡུར་ས་འདི་ནས།།
སེམས་ཀྱི་དྲོད་སྣང་གཏོར་བའི་ན་ཟུག་བཞག་སོང་།།
ཕ་ཁྱིམ་ཇག་པའི་གཏོར་བའི་ལོ་ཟླ་སྐྱུར་མོ།།
སྤུན་ཟླའི་ཚེ་སྲོག་ཤོར་བའི་རང་ས་འདི་ནས།།
འོད་ཀྱི་ཕུགས་བསམ་ཡལ་བའི་གངས་རིའི་འགྲམ་ནས།།
ཉི་ཟླའི་དྲོད་ཁོལ་ཡལ་བའི་ལོ་ཟླ་འདི་རེད།།
དབའ་བོ་སྟག་འབྲོང་སྐྱེས་སའི་ཕ་ས་འདི་ནས།།
དབའ་མོའི་ཡུམ་སྐད་གླེང་སའི་གནམ་འོག་འདི་ནས།།
སྐྱོ་སྣང་གྲང་རླུང་ཁྲོད་ནས་ལས་དབང་ལྕི་མོ།།
སེམས་ཀྱི་དཀྱིལ་ལ་ལྡང་བའི་ལྷགས་རླུང་འདི་རེད།།
ཞེ་མཁོན་ནག་པོ་ཞིག་གི་ལས་དབང་གཤགས་ཐལ།།
སྐྱོ་གདུང་འཕར་མ་ཞིག་གི་སེམས་ཁམས་གཙབས་ཐལ།།
ཁྲག་རྒྱུན་དྲོན་མོ་ཞིག་གི་ཡུལ་ཁམས་གང་ཐལ།།
མིག་ཆུ་གྲང་མོ་ཞིག་གི་སེམས་པ་འཁྱག་ཐལ།།
གསེར་ལྡོམ་གངས་སྐྱེས་བུ་ངའི་ཧི་མ་ཅལ་ནས།།
མྱོང་ཚོར་ལྷོག་ལྷོག་ལྡང་བའི་ཁ་རླང་དྲོན་མོ།།
བྱང་ཕྱོགས་དྷ་སའི་རི་ནས་ཡིག་ཐོག་ཕབ་སྟེ།།
མ་བཅོས་སེམས་ཀྱི་འཆར་ཡན་འདི་ནས་ཤོར་ཐལ།།
བོད་ཀྱི་རྒྱལ་ས་གཉིས་པ་བཞུགས་སྒར་དྷ་རམ་ས་ནས་གསེར་རྟ་
བསོད་ནམས་ཕུན་ཚོགས་སམ་དབལ་ཤུལ་འབྲོང་སྲས་སུ་འབོད་པས་
ཞོགས་པ་དུསཚོད་དྲུག་དང་སྐར་བཅུ་དྲུག་རིང་ལ་སུག་བྲིས་བགྱིས་སོ།། ༡༠༠༢ ༡ ༣
 |
|
