༄༅།། ཟླ་ཡུལ་འཕྲིན་ལས་འོད་ཟེར་ལ་བྲིས་པའི་རྒྱང་འཕྲིན།
སྦྱང་བརྩོན་འབད་འབུངས་ཆེ་བའི་ང་ཡི་སྤུན་གྲོགས།།
ཤེས་བྱའི་གཤོག་རྩལ་རྒྱས་པའི་ཟླ་ཡུལ་འཁྱམ་པོ།།
གསེར་ལྗོངས་བླ་མ་རུང་གི་ཞིང་མཆོག་འདི་ལ།།
སྦྱང་བརྩོན་ལག་བྱང་དཀར་པོ་ཁུར་ནས་ཕེབས་ཤོག། །
ཤིང་ལོ་རླུང་གི་ཁུར་སའི་ཕ་ས་འདི་ལ།།
ཟླ་ཆུ་དར་གྱི་བཞུར་སའི་སྐྱེ་ལྷ་འདི་ལ།།
ཤེས་རིགས་སྣ་མང་གསོན་པོའི་དྲོ་བ་མངར་མོ།།
ལག་སྐྱེས་གསར་བའི་ཕུགས་བསམ་བསྣམ་ནས་ཕེབས་རོགས།།
ཟླ་ཡུལ་ཁམས་ཕྱོགས་འདི་ཡི་སྤུན་གྲོགས་དམར་མོ།།
ཆོས་དང་འཇིག་རྟེན་གཉིས་ཀྱི་འདྲིས་ཡིན་རིང་བའི།།
སྐྱིད་སྡུག་སེམས་ཀྱི་གླེང་རོགས་ཆོས་མཐུན་གྲོགས་ཁྱེད།།
རེ་བསམ་འཚོལ་བསྙེག་གསར་བའི་ལང་ཚོ་དར་ཤོག།།
དགའ་སྐྱོ་ཚོར་བའི་བཟི་སྐབས་གསེར་ལྡོམ་བུ་ངའི།།
ལྷོ་ཕྱོགས་དོན་ལྡན་གླིང་ནས་སྙུག་རྩེར་ཕབ་སྟེ།།
སེམས་ཀྱི་གཏིང་ན་བསྐོས་པའི་སྤུན་ཆུང་ལགས་ལ།།
བརྩེ་བའི་འཕྲིན་པ་དཀར་པོ་ཁྱེད་ཕྱོགས་ཤོར་ཐལ།།
གསེར་རྟ་བསོད་ནམས་ཕུན་ཚོགས་སམ་དབལ་ཤུལ་འབྲོང་སྲས་སུ་
འབོད་བས་ལྷོ་ཕྱོགས་མ་ལ་ཡི་ནགས་ཀློང་ནས་ཙན་ཏན་དཀར་དམར་གྱི་
དྲི་བསུང་བར་མེད་འཐུལ་ས་མ་ཚད་གླང་ཆེན་དང་ཕག་རྒོད་ཀྱིས་རོལ་རྩེད་འགྲན་སའི་གནས་མཆོག་ཀོ་ལའི་གྷལ་ནས་བྲིས་སོ།། ༢༠༡༡ ༣ ༡༦