There are no translations available.
ལོ་འདིའི་ནང་པར་སྐྲུན་བྱེད་འཆར་གྱི་དེབ་གཉིས།
༡༽ རྒྱ་ནག་ཏུ་བཞུགས་པའི་བོད་རིགས་བུད་མེད་རྩོམ་པ་པོ་གྲགས་ཆེན་འོད་ཟེར་གྱིས་བྲིས་པའི་རིག་གནས་གསར་བརྗེའི་སྐོར་རྒྱ་ཡིག་ཐོག་བྲིས་པའི་དཔེ་དེབ་གལ་ཆེན་གཉིས་ཡོད་པའི་ནང་ནས་༼རིག་གནས་གསར་བརྗེ།༽ཞེས་པ་ཨ་རིའི་དོན་ཁང་གི་ཟུང་དྲུང་ཀུན་དགའ་བཀྲ་ཤིས་ལགས་ཀྱིས་བོད་བསྒྱུར་ཞུས་ཟིན་པས་ལོ་འདིའི་ནང་པར་སྐྲུན་བྱེད་རྒྱུ་ཡིན།
༢༽ རྩོམ་པ་པོ་ཚེ་རིང་འོད་ཟེར་ལགས་ཀྱིས་བོད་དོན་སྐོར་དཔྱད་བརྗོད་སྤེལ་བ་ཁག་ཨེ་ཤ་ཡ་རང་དབང་རླུང་འཕྲིན་ཁང་གི་གསར་འགོད་པ་དང་གཏམ་གླེང་ཞལ་པར་གྱི་གཙོ་སྐྱོང་བ་ཚེ་བརྟན་སྒྲོལ་དཀར་ལགས་ཀྱིས་བོད་བསྒྱུར་བྱས་པ་ལོ་འདིའི་ནང་པར་སྐྲུན་བྱེད་རྒྱུ་གཏན་འཁེལ་ཡོད། ད་དུང་མུ་མཐུད་གལ་ཆེ་བའི་ལོ་རྒྱུས་ཀྱི་དཔེ་དེབ་དང་ཞིབ་འཇུག་བྱས་པའི་དཔེ་དེབ་གང་མང་རྩོམ་སྒྲིག་པར་སྐྲུན་བྱེད་རྒྱུའི་འཆར་གཞི་ཡོད།
བགྲོ་གླེང་གོ་སྒྲིག
འདས་པའི་ལོ་བདུན་ཙམ་གྱི་བརྒྱུད་རིམ་ནང་ཁ་བ་དཀར་པོ་བོད་ཀྱི་རིག་གཞུང་སྲི་ཞུ་ཁང་གསར་འཛུགས་བྱས་པའི་དུས་ཚིགས་དང་སྟབས་བསྟུན་བཙན་བྱོལ་ཁྲོད་ཀྱི་ཤེས་ཡོན་དང་ཉམས་མྱོང་ཅན་གང་མང་ཞིག་གདན་ཞུས་ཀྱིས། རིག་གནས་སྤྱི་དང་བྱེ་བྲག་གསར་འགྱུར་བརྒྱུད་ལམ་ནས་ལས་དོན་བྱེད་ཕྱོགས་སྐོར་ལ་བགྲོ་གླེང་ཚོགས་འདུ་རེ་ཟུང་ཞིག་གོ་སྒྲིག་ཞུས་ཐུབ་པ་བྱུང་ཡོད་པ་དང༌། མ་འོངས་པར་བགྲོ་གླེང་ཚོགས་འདུ་གང་མང་གོ་སྒྲིག་ཞུ་རྒྱུའི་འཆར་གཞི་ཡོད།
ཟབ་སྦྱོང་གོ་སྒྲིག
བཙན་བྱོལ་ཁྲོད་ཀྱི་བོད་པའི་གསར་འགོད་པ་རྣམས་ལ་གསར་འགོད་ལས་རིགས་ཡར་རྒྱས་གཏོང་ཕྱོགས་སྐོར་ཉིན་གསུམ་རིང་གི་ཟབ་སྦྱོང་ཞིག་ཁ་བ་དཀར་པོ་བོད་ཀྱི་རིག་གཞུང་སྲི་ཞུ་ཁང་གསར་འཛུགས་བྱས་ནས་ལོ་བཞི་འཁོར་བའི་དུས་ཚོད་དང་སྟབས་བསྟུན་ནས་ཕུལ་ཡོད་པ་དང༌། མ་འོངས་པར་དེ་མཚུངས་བརྗོད་གཞི་འདྲ་མིན་གྱི་ཐོག་ནས་ཟབ་སྦྱོང་གོ་སྒྲིག་ཐུབ་པའི་འབད་བརྩོན་བྱ་རྒྱུ་ཡིན།
ཁོར་ཡུག་དང་འབྲེལ་བའི་ལས་འགུལ།
བོད་ནང་དུ་སྟག་གཟིག་སྲམ་གསུམ་གྱི་པགས་རིགས་གོས་རྒྱན་བག་མེད་རྒྱས་སྤྲོས་ཧ་ཅང་དར་ཁྱབ་ཆེན་པོར་ཕྱིན་ཡོད་པ་དང༌། གནད་དོན་དེ་ལ་བརྟེན་ནས་འཛམ་གླིང་ཁྱོན་ཡོངས་ནས་བོད་ལ་རྣམ་འགྱུར་དང་ལྟ་སྟངས་ཧ་ཅང་སྡུག་ཏུ་འགྲོ་བཞིན་པར་བརྟེན། བག་མེད་རྒྱས་སྤྲོས་དེ་དག་མཚམས་འཇོག་ཡོང་ཆེད་ཕྱི་ལོ་༢༠༠༦ ལོར་རྒྱ་གར་ལྷོ་ཕྱོགས་འབྲས་སྤུངས་མཆོད་རྟེན་དུ་དཔལ་དུས་ཀྱི་འཁོར་ལོའི་བཀའ་དབང་ཟབ་མོ་དང་སྟབས་བསྟུན་ནས་འདྲ་པར་འགྲེམས་སྟོན་དང༌། གློག་བརྙན་གཟིགས་འབུལ། ཡིག་ཆ་ཁྱབ་སྤེལ་སོགས་ཤུགས་ཆེ་བྱས་ཡོད་ལ། དེའི་རྗེས་སུ་བཙན་བྱོལ་བོད་མིའི་གནས་ཡུལ་རྒྱ་གར་དང་བལ་ཡུལ་ཁུལ་དུའང་དེ་མཚུངས་བཞིན་ལས་འགུལ་སྤེལ་ཡོད། གཞན་ཡང་བོད་པའི་སྤྱི་ཚོགས་དང་རིག་གནས་ལ་ཕན་ཐོགས་ཡོད་པ་དང༌། འདི་ག་སྲི་ཞུ་ཁང་གི་འཇོན་ནུས་ལ་དཔག་པའི་རིགས་གང་ཐུབ་ཅི་ནུས་ཀྱིས་ཧུར་བརྩོན་བྱ་རྒྱུའི་འཆར་གཞི་དང་ཆོད་སེམས་བརྟན་པོ་ཡོད།།
