13:19:14
སྟེང་ཕྱོགས་ལྷ་ཡི་གྲོང་གི།
ཡབ་གཅིག་ཕྱག་ན་པད་མོ།།
བོད་མིའི་སེམས་ཀྱི་ལྷ་སྐལ།།
མགོན་པོ་ཁྱེད་ཉིད་ཡིན་ནོ།།
ཁོར་ཡུག་གངས་ཀྱིས་བསྐོར་བའི།།
གདོང་དམར་བོད་ཀྱི་ཡུལ་འདིར།།
བརྩེ་ཆེན་ཐུགས་རྗེ་རྒྱ་མཚོས།།
ནམ་ཡང་གཟིགས་པ་མ་ཆུང༌།།
ས་ལའི་ལྗོངས་ཞེས་གྲགས་པའི།།
ཁ་བའི་འཇིག་རྟེན་འདི་ན།།
རང་བྱུང་ཁོར་ཡུག་བཀོད་པ།།
ལྷ་ཡུལ་ལས་ཀྱང་མཛེས་མོད།།
འོན་ཀྱང་གང་ཉིད་མེད་པས།།
མི་བཟོད་སེམས་ཀྱི་གདུང་བ།།
ད་དུང་གངས་རིའི་སུལ་ལ།།
ངོམ་ངོམ་ངང་གི་ཐིམ་ཡོད།།
ཁྱེད་ཀྱི་གདུལ་བྱར་གྱུར་བའི།།
བྱང་ཕྱོགས་ཁ་བ་ཅན་རྣམས།།
མཚན་དཔེའི་ཉི་མའི་དཀྱིལ་འཁོར།།
མངོན་པར་འཆར་ན་འདོད་ཡོད།།
ཡབ་རྗེའི་གོང་མའི་གཅེས་ནོར།།
ལུགས་ཟུང་གསེར་གྱི་འཁོར་ལོ།།
ཡང་དག་ཕྱག་གིས་བཞེས་ནས།།
གངས་རིའི་རྒྱན་དུ་ཕེབས་དང༌།།
གདོད་མའི་ཁ་བའི་ཁྲོད་ན།།
ཁེར་རྐྱང་འཚོ་བ་བསྐྱལ་བའི།།
མཐོ་སྒང་མི་རིགས་ཤིག་གི།
བླ་སྲོག་ཁྱེད་ལ་ཐིམ་ཡོད།།
འཕགས་པའི་ཚོགས་འཁོར་དབུས་ཀྱི།།
སྔོན་ཚེ་དམ་བཅའ་བཟང་པོ།།
ཐུགས་དགོངས་ཟབ་མོའི་དབྱིངས་ནས།།
ནམ་ཡང་དོར་བ་མ་གནང༌།།
འཛམ་གླིང་སྐྱེ་འགྲོའི་མགོན་པོ།།
ལྗོངས་འདིའི་ཁྲི་ལ་བཞུགས་ནས།།
བསྐལ་བ་རྒྱལ་མཚོའི་བར་དུ།།
ཆོས་ཀྱི་འཁོར་ལོ་སྐོར་རོགས།།
 |
|
